كم تبقى معك الـ 200 جنيه؟ وماذا لو طبع البنك المركزي ورقة ب500 جنيه هل سيكون أفضل؟ اخبار كثيرة عن اصدار البنك المركزي لورقة نقدية جديدة بقيمة 500 جنيه؟ فهل فعلا البنك المركزي ناوي يطرحها السوق؟
خلال الساعات الاخيره انتشر كلام على السوشيال ميديا عن اصدار البنك المركزي 500 جنيه قريب أوي واحتمال كبير تبقى بعد العيد.
وطبعا الكلام ده قلب الدنيا لان اصدار ورقه نقديه بقيمه اكبر مش قرار سهل ودلالاته مش احسن حاجة، طيب ليه؟
بص على الدول اللي اضطرت تطبع أوراق نقدية من عملتها بقيمة كبير، هتلاقي ان ده غالبا بيحصل لما يكون اقتصادها في الأرض والعملة بتاعتها بتبقي أرخص من الورق اللي بتطبع عليه.
وخد عندك بقى جنون في الأسعار ومعدلات تضخم تاريخية، وعملة مممكن تلاقيها كل يوم بسعر مختلف.
واقرب مثال على كده اللي حصل مع دولة فنزويلا وعملتها البوليفار:
البنك المركزي هناك أعلن في مارس 2021 عن طباعة 3 أوراق نقدية جديدة : الأولى ب 200 ألف، والتانية ب500 ألف، والتالتة بمليون بوليفار.
وده بعد ما التضخم عندهم سجل 3000% والأسعار بقت في العالي لدرجة ان كيلو الطماطم و8 ارغفة عيش وإزازة صودا بقى تمنهم حوالى مليون بوليفار.
وفوق ده كله الدولار الواحد وصل إلى مليون و800 ألف بوليفار، اه والله زي ماسمعت أرقام خيالية خلت الفلوس في إيد الناس ملهاش قيمة، لدرجة إن عدد كبير من المحلات رفضت التعام بالعملة المحلية واستخدموا الدولار في البيع والشراء.
نرجع بقى لل 500 جنيه اللي ناس نشرت صورتها وقالت دي العملة الجديدة، مع وصول التضخم إلى 39% الشهر اللي فات وتراجع سعر الجنيه أمام الدولار.
بس الحقيقة عكس كده خالص، لأن مصدر مسؤول في البنك المركزي، نفى أي إتجاه أو دراسة لإصدار ورقة جديدة بقيمة 500 جنيه في السوق المصري، وأكد إن أعلى قيمة متداولة هي من فئة 200 جنيه.
كمان قال إن كل الكلام المنشور على السوشيال ميديا غلط في غلط، ده حتي شكل التصميم المتداول مختلف تماما عن التصميمات اللي البنك المركزي ماشي عليها.
وطبعا دي مش اول مرة يطلع كلام عن اصدار عملة جديدة وكان اخرها إصدار العشرين الجنيه البلاستيك على العيد، وخصوصا يعني انها كانت المفروض تنزل السوق على نهاية 2022، حسب المهندس خالد فاروق، وكيل محافظ البنك المركزي المصري لدار طباعة النقد..
واللي قال في تصريحات إن البنك المركزي قرر طباعة النقود البلاستيك المصنوعة من مادة البوليمير بطريقة برايل تيسيرا على المكفوفين.
لكن دي برضه محصلتش وفي مصادر نفت الكلام ده، وقالت للناس لو في عملة جديدة البنك المركزي هيعلن عن ده في بيان رسمى.
