من فترة أعلنت الحكومة عن منظومة كارت العيش الذكي للناس التى ليس لديها بطاقة التموين، لكن حتى الآن لم يتم التنفيذ، فما السبب وراء هذا التأخير؟ وهل تم إلغاء الفكرة أم أنها مازالت تحت الدراسة؟
في إعلان مهم، وزير التموين الدكتور على المصيلحي، قال إن الوقت حاليا مش مناسب لتطبيق منظومة كارت الخبز الذكي لغير حاملي البطاقة التموينية، خاصة يعني إن شهر رمضان كده كده معدل استهلاك العيش فيه أقل من باقي الشهور السنة.
كمان الدولة محتاجة وقت أكتر عشان تتأكد ان الشبكه الماليه اللي هتشغل المنظومه متأمنة كويس.
وكانت الحكومة أعلنت في وقت سابق عن نيتها لتطبيق منظومه جديده للناس اللي معهاش البطاقه المخصصة لصرف العيش المدعم بسعر خمس قروش.
ساعتها زادت الأسئلة عن طريقة تطبيق القرار ومين هيستفيد منه، بس واحدة واحدة الدنيا بدأت توضح اكتر، واللي هيحصل كالتالي:
الحكومه هتنزل كروت في مكاتب البريد، واللي عاوز يستفيد هيروح ياخد الكارت ويشحنه بالقيمه اللي عاوزها عشان يصرف العيش من المخابز البلدي التابعة للحكومة، ولما الفلوس في الكارت تخلص هيروح يشحنه عشان يصرف بيه تاني وهكذا.
وطبعا الخطوة دي هدفها تساعد المواطنين بعد الشكاوى الكتيرة من ارتفاع سعر العيش الحر واختلاف وزنه من مخبز للتاني.
أما بقى لو انت من الناس اللي معاها بطاقة تموين وبتصرف العيش المدعم، فاطمن خالص ومتقلقش لان المنظومة الجديدة مش هتأثر على حصتك في العيش.
والخبر الايجابي ان المنظومة دخلت مرحلة الاختبارات النهائية في آخر فبراير اللي فات، عشان تبدأ تتنفذ على أرض الواقع ويستفيد منها 32 مليون مصري.
وعلى فكرة، وزن الرغيف هيبقى 90 جرام زيه زي العيش البلدي بالظبط نفس الشكل والوزن والجودة والطعم، بس لغاية دلوقتي متمش الإعلان عن سعره صراحة.
بس حسب وزير التموين، البيع بسعر التكلفة يعني احتمال يكون ب90 قرش، وطبعا مع أي زيادة في الدولار التكلفة بتزيد، فهل ده معناه ان السعر هيتغير حسب تغير سعر الدولار أمام الجنيه؟
ده اللي هنشوفه الأيام الجاية، بس عشان تبقى عارف مصر فيها 72 مليون واحد بياخدوا دعم على العيش، ومع اخر قفزة في سعر الدولار، رئيس الوزرا
قال إنه حصل زيادة 10 مليارات جنيه في إنتاج سعر الخبز بسبب فرق العملة، بس الدولة قررت متحملش المواطن أعباء جديدة.
وصحيح وزير التموين سبق واتكلم عن تحويل الدعم العيني للعيش إلى دعم نقدي زي التموين، لكنه أكد إن السوق مش مستعد لتنفيذ الاقتراح ده في الوقت الحالي بسبب التضخم وتذبذب سعر الدولار
انتوا بقى ايه رايكم في منظومة الكارت الذكي للعيش؟ وهل فعلا هتسهل الأمور على ناس كتير مبتاخدش دعم؟ طيب شايفين فكرة تحويل دعم العيش العيني إلى نقدي ازاي؟
