هل يمكن أن يتخطى الدولار حاجز الـ32 جنيه؟، وما السر هذه الاييام في الارتفاعات في أسعار الدولار وهل هذا معناه إن سوق الصرف المصري غير مستقر؟، ومتى يستقر الأخضر أمام الجنيه المصري؟ تابعونا من خلال التقرير التالي لمعرفة التفاصيل:
ناس كتير قلقانه من ارتفاع سعر الدولار وده لأنه بيأثر بشكل رئيسي على الأسعار في مصر، وبيسألوا امتى هنقدر نشوف استقرار في سعر الدولار.
وحسب تصريحات حنان رمسيس، خبيرة سوق المال المصرية، قالت إن الدولار الأمريكي هيشهد ارتفاعات طفيفة خلال الفترة الجاية، لكن اطمنوا لأنها أكدت إنه مش هيتجاوز حاجز الـ 32 جنيه في كل الأحوال.
قالت كمان إن خلال الفترة اللي كانت في ارتفاعات قياسية في أسعار الدولار مقابل الجنيه المصري.وده بسبب ضعف الجنيه المصري ومش بسبب قوة الدلار زي ما احنا فاكرين.
وده لأنه بمجرد ما الولايات المتحدة الأمريكية بدأت توقف ارتفاعات أسعار الفايدة بمعدلات عالية بدأ سعره يستقر قدام كل العملات العالمية بشكل عام، وقدام الجنيه بشكل خاص.
خبيرة سوق المال كمان قالت أننا لو بنسأل عن أسباب ارتفاع الدولار قدام الجنيه فلازم نعرف إن مشاكل كثيرة بتتعلق بالدولار في مصر، وطبعا أول حاجة هتيجي في بالكم هي نقص عملة الدولار ، ولكن الحقيقة إنه الأزمة بسبب سلوكيات المواطنين وعمليات الاكتناز اللي بتحصل كل ما نسمع عن اشاعات ارتفاع سعر الدولار قدام الجنيه.
وطبعا الاشاعات دي بيروجها المضاربين عشان يحققوا مبيعات قياسية مستغلين الأزمة طبعا.
كمان ” رمسيس ” قالت إنه محدش يقدر ينكر إن في فجوة دولارية كبيرة جدا في مصر وهي الفرق بين سعر الدولار والجنيه، لكن الأكيد إنه ممكن نسيطر عليها وإن الحكومة تقدر تضبط الاسعار وده من خلال شوية إجراءات لازم تعملها الأول.
طيب إزاي الكلام ده وهل فعلا الأسعار ممكن تقل في مصر؟
بص يا سيدي، حسب تصريحات خبيرة سوق المال الدولة تقدر تعمل كده فعلا، بس في البداية لازم نفكر ازاي نوسع دايرة التبادل التجاري بعملات تانيه غير الدولار الأمريكي.
وعلى فكرة في دول كتير بدأت تعمل ده ومنهم مصر وروسيا والصين، والهند، يعني من الاخر الصادرات وعمليات التجارة تبقى بالجنية باليوان بالروبل الروسي لكن متبقاش بالدولار وده طبعا هيحققلنا مكاسب ويخف الضغط على الجنيه المصري وهيدعم استقرار الاقتصاد وسعر الصرف.
مش بس كده ده كمان خبيرة سوق المال قالت إن الحكومة المصرية لازم تفكر كمان في حلول مختلفة غير الاقتراض من صندوق النقد الدولي.
وده ممكن يحصل عن طريق طرح أسهم أو حصص من الشركات الحكومية في البورصة للاكتتاب العام أو لمستثمر استراتيجي.
وطبعا عمليات الطرح دي بستهدف جذب استثمارات اجنبيه وده هيزود العملة الصعبه والنقد الأجنبي في مصر وهيكون بديل كويس بدل القروض.
مش بس كده عمليات الطرح والبيع في البورصة هتزود من قوة الجنيه بشكل تدريحي قدام الدولار وده هيجبر الأخضر إنه يتراجع وسعره يستقر.
طيب ياترى إيه هو السعر العادل للدولار وهل كده المفروض سعر الجنيه ينخفض أكتر؟
هقولك يا سيدي خبيرة سوق المال قالت إن سعر صرف الدولار أمام الجنيه بيشبه أي سلعة ممكن تكون بتشتريها في السوق بتخضع لعملية العرض والطلب، يعني كل ما الطلب يزيد كل ما السعر يزيد والعكس.
وده بيخلي مفيش ثبات بشكل دائم في سعر الصرف مرة هتلاقوه بيرتفع ومرة بينخفض.لكن الأكيد إن السعر العادل للدولار أمام الجنيه هيكون بيتراوح ما بين 30 لـ 32 جنيه لكل دولار وده هنشوفه الفترة الجاية، ده مش بس كده ده كمان ممكن نشوف الدولار بينخفض بشكل تدريجي قدام الجنيه.
وفي النهاية بقى يهمنا نعرف رأيكم هل تتوقعوا إنه يحصل تراجع في سعر الدولار الفترة الجاية؟
