يا احنا يا الدولار.. هذا الشعار الذي رفعته الصين في وجه أمريكا، وويبدو أننا داخلين عل حرب عملات من النوع الثقيل، لكن ما يهمنا في كل هذا هو مصر الجنيه المصري.
يعني من الاخر كده الخناقة اللي دايرة بين الصين وامريكا هترفع من قيمة الجنيه أمام الدولار ولا ملهاش علاقة؟ وهل الحكومة في مصر عندها استعداد تستغني عن الدولار؟تعالوا نشوف ايه اللي حصل مع روسيا وازاي ممكن يتكرر مع الهند والصين؟
روسيا.. باكستان.. إندونيسيا.. بنغلادش.. فيتنام.. كازاخستان ، واخيرا البرازيل، دي اسماء عدد من الدول اللي اتفقت مع الصين على استخدام العملات المحلية في التجارة مابينهم بدلا من الدولار.
والصراحة الصين مقصرتش وبتضغط بكل قوتها عشان تقنع الدول التانية باستخدام اليوان في التسويات التجارية، وده كله ليه؟
عشان تهد أكبر منافس ليها بإنهاء هيمنة الدولار على التجارة الدولية، وطبعا ظروف الصين مساعداها لأنها تاني أكبر اقتصاد في العالم بعد أمريكا ومنتجاتها مغرقة كل الدول حتى أمريكا نفسها.
وفعلا نجحت الصين في توقيع اتفاقيات لاستخدام العملات المحلية للدول في المعاملات التجارية والمالية، وخاصة مع رابطة دول جنوب شرق آسيا وكمان البرازبل اللي تعتبر أكبر اقتصاد في أمريكا اللاتينية.
ومش بس كده، الصين بقالها فترة في مفاوضات مع السعودية عشان عاوزة تشتري النفط باليوان، واللي متعرفوش ان في حاجة اسمها نظام البترو دولار.
وده سببه اتفاق قديم بين السعودية وامريكا في السبعينات على بيع نفط السعودية للعالم بالدولار، ومن بعد السعودية في دول كتير خدت نفس الخطوة وده معناه ايه؟
معناه ياسيدي ان اي حد عاوز يشتري نفط لازم يشتريه بالدولار، وعشان يعمل كده لازم يكون عنده احتياطي من العملة الأمريكية، وده واحد من الأسباب اللي زودت الطلب على الدولار وخلته العملة رقم واحد في العالم.
عشان كده في سؤال مهم: هل الصين هتقدر تنهي هيمنة الدولار فعلا؟الاقتصادي أيمن عبد العزيز، شايف إن تحركات الصين بتأكد ان في قوي تانية بدأت تناطح الدولار وتهز عرشه
بس رغم كده هيفضل الدولار العملة الأولي في العالم لوقت طويل، وقدامنا كتير أوي عشان نقول ان اليوان بقوة الدولار
وخصوصا يعني ان العملة الأمريكية واخدة قوتها من حاجتين: الأولى ربط بيع النفط بالدولار زي ماقلنا، والتانية إقرار الدولار كعملة احتياطية للعالم بعد الحرب العالمية التانية.
وهنا ييجي السؤال التاني: هل تراجع الدولار في صالح الجنيه؟للاسف ضعف الدولار عامة مش معناه قوة الجنيه المصري، والنقطة دي وضحها الخبير الاقتصادي مدحت نافع لما قال إن تراجع الدولار لو حصل هيبقى في صالح عملات تانية قوية واقتصادها قايم على ناتج إجمالي عظيم وتجارة خارجية مرعبة واحتياطيات هائلة…
وساعتها العملات دي هتكون البعبع الجديد لينا.ومن الآخر كده احنا ازمتنا في حجم انتاج من السلع والخدمات اللي تقدر تغطي احتياجاتها وكمان نصدر منها للخارج، بس ده ميمنعش ان الحكومة بدأت تمشي بمبدأ الصين.
وفعلا بدأنا نتعامل مع روسيا بالروبل ودلوقتي بندرس التعامل بالروبية واليوان في التبادل التجاري مع الهند والصين، عشان تقلل الطلب على الدولار ونزود التبادل التجاري بينا وبينهم.
فهل تتوقعوا ان ده هيخفف الضغط على الجنيه؟
