إن كنت تعمل في السعوديه الكويت الاردن او اي مكان خارج مصر، فإن هذا الخبر يهمك، حيث أن الحكومة خلال ساعات قليلة جدا الحكومه ستعلن قرار هام جدا للمصريين في الخارج.
القرار ده له علاقه بسعر الذهب في مصر، وخصوصا مبادرة السماح للمصريين في الخارج بإدخال كميات من الدهب لمصر من غير ما يدفعوا جمارك؟
ومن هنا لغايه الاعلان عن القرار، في كام سؤال مهم محتاجين ندور على اجابتهم: ليه الدهب في مصر اغلى من بره؟ وايه الفرق بين سعره في مصر وسعره في دول الخليج زي السعوديه مثلا؟
ولو الحكومة وافقت هتسمح بإدخال كل الاوزان ولا هتحط شروط معينه؟
خلال الساعات الأخيرة وزير المالية محمد معيط ، كشف عن آخر الكواليس بخصوص مقترح إعفاء المصريين في الخارج من دفع جمارك على الدهب اللي هيبجبوه بيه من بره.
وفي مكالمة مع الإعلامي عمرو أديب في برنامج الحكاية قاله اديني 48 ساعه وارد عليك رد حاسم بخصوص تنفيذ المبادرة
طيب هي ليه المبادرة دي طلعت من الاساس؟
شعبة الدهب قدمت المقترح ده عشان يزود المعروض من الدهب في السوق، خصوصا بعد ارتفاع سعره الفترة الأخيرة لأكتر من السعر العالمي.
تفاصيل المبادرة
ناجي فرج، مستشار وزير التموين لشؤون الدهب عجبه الاقتراح ده وقال عليه ممتاز.و حسب كلامه لصدى البلد، ممكن تتراوح الكميه اللي هيبقى عليها اعفاء جمركي من 100 ل 150 جرام، في وقت سوق الدهب في مصر بيبيع ما بين 200 و300 كيلو سبائك وجنيهات دهب.
وده لو حصل هيساعد على استقرار السوء والاسعار وكمان هيرفع الحصيله الدولاريه، لأن الدهب عملة معترف بيها في كل دول العالم
وخد بالك سعر الجرام في مصر اغلى من سعره في السعوديه بحوالي 700 جنيه، حسب كلامه في برنامج كلمه اخيرة مع لميس الحديدي.
سبب ارتفاع سعر الذهب في مصر
حسب وصفي واصف مستشار شعبه الذهب في اتحاد الصناعات لموقع فيتو احنا عندنا سببين:
١: توقف استيراد الذهب من سنتين ونص بسبب صعوبه الحصول على الدولار اللازم للاستيراد
2: الاقبال الشديد من المصريين على شراء الذهب باعتباره ملاذ امن لحفظ قيمه فلوسهم وقت الأزمات.
وحسب بيانات مجلس الدهب العالمي الاخيره المصريين خلال 3 شهور بس وفي الفترة من يناير لابريل 2023 اشتروا دهب ب 30 مليار ونص المليار جنيه.
فهل نفهم من كده إن ارتفاع الذهب مش سببه تسعير التجار للدولار بسعر السوق الموازي وأعلى كمان ، زي ماقالت شركة اي صاغة لتدوال الدهب والمجوهرات على الانترنت؟
هاني ميلاد رئيس شعبه الذهب في الغرف التجاريه نفى تهمه تهمة التلاعب عن التجار، نقلا عن المصري اليوم، وقال انهم مش مسؤولين عن تحديد الأسعار، اللي في ايده الدهب وبيمتلكه هو اللي بيحدد سعره دلوقتي،
نرجع بقى للمصريين في الخارج. هتلاقي ان دي مش اول مبادره تطلقها الحكومه ليهم لان قبل اقتراح الدهب، كان في مبادره استيراد السيارات باعفاءات جمركية وصلت الى 70%
وخلاص مدة المبادرة قربت تنتهي وده هيحصل تحديدا في 14 مايو ومفيش اي نية لتحديدها، وده بعد مشاركة حوالي 100 ألف مصري بالخارج سجلوا إلكترونيًا للاستفادة من المبادرة.
ووصلت حصيلة الدفع إلى 525 مليون دولار، وفعلا افرجت الحكومة عن 1000 سيارة مستوردة.
فقولنا بقى ايه رايك؟: لو الحكومة وافقت على مبادرة الدهب ده هيشجع المصريين في الخارج عشان يشتروه وينزلوا بيه لمصر؟
