نجبرهم يحولون نصف مرتبهم للبلد لكي نوفر العملة الصعبة، هذا ما قاله نائب برلماني خلال جلسته في مجلس النواب بخصوص تحويلات المصريين في الخارج، مش بس كده كده قال كمان إنه لازم يكون في قانون بكده
بس ياتري هما فعلا هيصدروا قانون بده؟ وتحويلات المصريين وصلت لكام دلوقتي؟ وايه اللي حصل لما طلبوا ده من فترة؟ملايين من المصريين قرروا انهم يسافروا بره مصر عشان يلاقوا فرصة شغل مناسبة تقدر توفر ليهم حياة كريمة وتأمن مستقبلهم، بس تخيل لو في يوم من الأيام صدر قانون بتحويل نص مرتبك لمصر قولي هتعمل إيه؟ وهل ده المطلوب فعلا؟
شوف يا سيدي، حسب موقع صدى البلد، الساعات الأخيرة النائب أحمد عاشور، مقرر مساعد لجنة القضية السكانية في الحوار الوطني، قال إن تحويلات المصريين بالخارج انخفضت بنسبة كبيرة خلال الفترة اللي فاتت، ودي بنعتمد عليها بشكل كبير في توفير العملة الصعبة
عشان كده بيقترح إن مكتب العمل في مصر ياخد نسخة ضوئية من عقود العمل بين العامل المصرى وجهة العمل الخارجية برة مصر.
وبناء على النسخة دي يتم إلزام العاملين بالخارج بتحويل 50% من قيمة مرتباتهم للبلد من خلال البنوك والطرق الشرعية، وده بهدف زيادة تحويلات العاملين بالخارج للبلاد وتوفير العملة الصعبة.
طيب هي تحويلات المصريين في الخارج انخفضت قد ايه؟
انا أقولك، حسب بيانات البنك المركزي إن تحويلات المصريين العاملين بالخارج اترجعت خلال النص الأول من العام المالي الحالي بنسبة 23% مقارنة بنفس الفترة من عام 2021-2022
وحسب بيان البنك عن ميزان المدفوعات الصادر من ساعات، فتحويلات المصريين بالخارج وصلت خلال النص الأول من عام 2022-2023 إلى 12 مليار دولار مقابل 15.6 مليار دولار في نفس الفترة من العام المالي اللي فات.
وحسب كلام محمد الأتربي رئيس بنك مصر واتحاد بنوك مصر مع عمرو اديب جزء كبير من تحويلات المصريين بالخارج بره البنوك بسبب إن سعر السوق السوداء 38 جنيه، وفي البنوك يقرب من 31 جنيهًا فقط، ولكن مع بيع اصول بقيمة مليار و900 مليون دولار حدثت هناك سيولة”.
بس على فكرة دي مش أول مرة يكون في كلام بخصوص مرتبات المصريين في الخارج، وده لأن من فترة انتشر كلام على لسان النائب بهاء ابو شقة، وكيل مجلس الشيوخ ، بإن الدولة يكون ليها نسبة مئوية من مرتبات المصريين في الخارج كحق ليهم لأنها ربتهم وعلمتهم وده حسب صحيفة الشرق الأوسط
طبعا الكلام ده قلب الدنيا والناس كلها هجمته عليه، بس هو طلع يرد دي وقال إن الكلام ده اتفسر غلط وأن مقترحه ده مكنش إجباري بس كان من باب رد الجميل والوفاء للدولة اللي متأخروش عنها في يوم من الأيام ومواقفهم تشهد على كل ده
وقال انا مكنش مطلبي الوحيد اقتطاع جزء من مرتبات الموظفين لصالح الدولة لا انا طلبت كمان بوضع ضوابط تضمن ليهم حقوقهم القانونية
بس رغم تبريرات أبو شقة لتصريحاته دي إلا أنها ممرتش مرور الكرام ده الكل هجمه زي عمرو هندي نائب مجلس النواب عن المصريين بالخارج وعضو لجنة الشؤون الاقتصادية بالمجلس اللي رفض تصريحاته
وقال “انا برفض بصفتي نائب عن المصريين في الخارج أي حد يمس راتبهم حتى لو كان دولار واحد الا اذا كان ده في صالح بناء الدولة”، ومقترح أبو شقة مرفوض شكلاً وموضوعاً، حتى لو كان ده بصورة ودية، أو من باب رد الجميل زي ما قال يعني
وقال هو إحنا بندور على الناس البسيطة عشان ناخد منهم فلوسهم حتي لو كان ده بصفة ودية؟
دي كمان وزارة الهجرة علقت على كلام ابو شقة، ووزيرة الهجرة سها الجندي قالت إنه مفيش نية للحكومة لاستقطاع أي جزء من تحويلات المصريين بالخارج
كمان البنك المركزي سبق وأكد إن تحويلات المصريين بالخارج في امان، ومن حقه يطلب صرف الفلوس بالعملة اللي محول بيها أو بالجنيه المصري لو عاوز، يعني محدش هيجبر اهله ياخدوا الفلوس بالمصري.
ودلوقتي قولنا رأيك في مقترح إلزام المصريين بالخارج بتحويل نص مرتبهم بمصر عن طريق البنك؟
