ما هو أحسن استثمار في مصر ذهب أم عقارات؟.. هذا السؤال الذي يسأله ملايين من الناس الآن لكين يستثمروا فلوسهم بشكل آمن من غير أي مخاطرة قبل حدوث أي تعويم جديد للجنيه.
عشان كده رجل الأعمال نجيب ساويرس طلع وجاوب على السؤال ده وكشف عن أحسن وأمن استثمار تحط فيه فلوسك. فياترى نجيب ساويرس قال ايه؟ وايه احسن استثمار موجود دلوقتي؟
كل اللي معاه دلوقتي مبلغ من الفلوس ايا كان بقى كبير ولا صغير بيفكر ازاي يستثمره ويكبره اكتر قبل ما يحصل أي تخفيض جديد للجنيه ويخسر اكتر، بس للاسف كتير من الناس دلوقتي في حيرة يستثمروا فلوسهم فين خصوصا لو المبلغ اللي معاهم كبير ومش عايزين يخاطروا بيه.
َودلوقتي في توقعات دولية كتير بإنه هيحصل تعويم جديد في الجنيه منهم مثلا وكاله فيتش اللي توقعت وصول الدولار في البنك رسميا إلى 38 جنيه عشان يقرب من سعره للسوق السوداء عند40 جنيه.
ودائما الناس بيسألوا ايه الاحسن استثمار في مصر؟
ده السؤال اللي جاوب عليه نجيب ساويرس اكبر وأشهر رجل أعمال في مصر خلال تصريحات تليفزيونية في الساعات الأخيرة، وقال الاستثمار العقاري دايما بيكون الملاذ الآمن، بس للأسف فيه مشكلة بتواجه المطورين العقاريين في مصر، وهي ارتفاع مدخلات الإنتاج من حديد وأسمنت بشكل كبير وبسرعة
عشان كده في خطورة على المطورين العقاريين اللي بيأخروا بناء الوحدات، بسبب ارتفاع التكلفة، وده هيأدي لخسارتهم، لكن رغم كده قال إن الطلب زايد على شرا العقارات خوفا من ارتفاع الأسعار
ولما إتسال إيه أحسن استثمار الدهب ولا العقارات؟
قال ” أنا رأيي أنه الافضل الاستثمار في الاتنين مع بعض، اللي معاه فلوس ومش عايز يعمل مضاربات ويعمل مخاطر كبيرة، يستثمر جزء كبير في الدهب وجزء كبير في العقارات”
وحسب تصريحات الدكتور وائل سلام الخبير الاقتصادي، لجريدة الوطن، أن الاستثمار في العقار أفضل من الاستثمار في الدهب، لأن العقار لو كان تجاري زي محل او ورشة مثلا فممكن يكون نواة لعمل مشروع كبير يجيب دخل لصاحبه، ولو مش عايز تشغله ممكن تأجره وتاخد منه عائد شهري
وقال أن لو شخص اشترى وحدة سكنية على سبيل المثال ممكن يأجرها وتجيب له عائد شهري وده بعكس الدهب اللي مش ممكن يجيب أي عائد بشكل شهري
وقال كمان إن الدهب يعتبر مخزن للقيمة بس، بالإضافة إلي أنه في حالة بيع الدهب بعد سنة من شرائه من المؤكد أن صاحبه هيتعرض لخساير كبيرة في حالة تراجع الأسعار، بعكس العقار اللي دايما بيحافظ على سعره ويزيد مع الوقت
لكن مش معنى كده إن الاستثمار في الدهب غير مجدي وده لأنه قال أن اللي بيميز الدهب أنه سهل البيع بشكل سريع، على عكس العقار اللي محتاج لشهور طويلة لبيع الوحدة السكنية عشان تقدر تاخد سيولة منها
وقال أن أي مواطن عايز يحفظ قيمة أمواله عن طريق الدهب فلازم يشتري سبايك دهبية وجنيهات دهب، افضل بكتير من المشغولات الدهبية اللي بمصنعية عالية، وفي حالة بيع المشغولات بيتم خسارة المصنعية
أما لو هتستثمر فلوسك في عقار فلازم تراعي الموقع الخاص بالعقار أنه يكون مميز، ولازم كمان تتأكد من صحة المستندات عشان متتعرضش للنصب أو الاحتيال وشرا العقار من شركات ثقة عشان تتفادي الوقوع في أي مشاكل بعد كده
ودلوقتي قولنا هتستثمر فلوسك في إيه؟
