لماذا يرفض البنك الاهلي طرح شهادة بفائدة 25% أو 30% ، رغم رفع البنك المركزي لسعر الفائدة؟ وهل معنى ذلك أنه لا يوجد شهادادت يتم طرحها قريبا؟
الإجابة عند البرلمان اللي كشف أسعار الفايدة على شهادات الادخار الفترة الجاية بعد التعديل، وكمان قالنا الحكومة طلبت منه ايه؟ عشان كده، خليكم معانا وهتعرفوا كل التفاصيل
مع ارتفاع معدل التضخم لأكتر من 40% لأول مرة في تاريخ مصر، كتير من الخبرا توقعوا طرح البنوك شهادات ادخار بفايدة مرتفعة ممكن توصل الى 30%، عشان تقدم عائد مغري للعملا يخليهم يستثمروا في الجنيه.
لكن يحي ابو الفتوح نائب رئيس البنك الأهلي طلع قلب المشهد كله، وقالك مفيش اي نية لطرح شهادات ادخار بعائد 25% أو 30% ، طيب ليه؟
التكلفة هي السر، لأن تقديم عائد كبير للعملا، بيكلف البنوك فلوس زيادة ويأثر على ارباحها، بس رغم كده متقلقش:
الدكتور فخري الفقي، رئيس لجنة الخطة والموازنة بمجلس النواب، قال إن البنوك هتتحرك لرفع سعر الفايدة على شهادات الادخار في حدود 2% تماشيا مع قرار البنك المركزي.
وعشان كده، من المتوقع وصول فايدة شهادات الادخار الفترة الجاية إلى 20%، بس هاني جنينة الخبير الاقتصادي سبق وقال إن البنوك لازم تطرح شهادات ادخار بفايدة متقلش عن 22%
وصحيح معدل الفايدة الحقيقي هيبقى سلبي برضه بس احسن من الاول، ومعدل الفايدة الحقيقي هو ناتح طرح معدل التضخم المعلن من معدل الفايدة على الشهادة.
وعموما المسؤول عن تحديد أسعار الفايدة على شهادات الادخار هي لجان الاليكو الموجودة في كل بنك.
ودي بتشوف أسعار الفايدة المناسبة على القروض والودائع والشهادات اللي بيقدمها البنك للعملا، عشان كده هي اللي هتقرر البنك يقدر يرفع الفايدة على الشهادات ولا لأ.
وطبعا ده بخلاف الفايدة على الشهادات المتغير، لأنها مرتبطة تلقائيا برفع أو خفض أسعار الفايدة في البنك المركزي.
وفعلا بنكي الأهلي ومصر، أكبر بنكين حكوميين في البلد رفعوا الفايدة على الشهادة الثلاثية المتغيرة عندهم عشان تبقى 18.5% مع دورية صرف ربع سنوية وحد أدنى للشراء 1000 جنيه.
اما بقى لو هنتكلم عن طلب الحكومة من البرلمان، فرئيس لجنة الخطة والموازنة، كشف عن طلب وزير المالية بفتح اعتماد الإضافي في الموازنة بقيمة 165 مليار جينه لتسديد فوائد الدين العام، منهم 85 مليار جنيه بس بسبب رفع سعر الفائدة.
َوطبعا دي مش اول مرة المركزي يرفع الفايدة، لأنه رفعها السنة اللي فاتت بإجمالي 8% بداية من مارس 2022، وكل 1% زيادة في سعر الفايدة بيحمل الموازنة 30 مليار جنيه مصري فوائد الدين العام بعد مرور 12 شهر..
انتوا بقى قوللنا لو البنوك طرحت شهادات بفايدة 20% أو 22% هتشتروها، ولا شايفين العائد مش مناسب؟ كمان شاركونا بأفضل طريقة للحفاظ على قيمة فلوسكم من وجهة نظركم.
