رغيف العيش ب2 جنيه ولا نعرف إلى أين سيصل بعد ارتفاع سعر الدولار، فما سر ارتفاع سعر رغيف العش رغم إفرج الحكومة عن البضائع المحتجزة في الموانئ، تابعونا سنتعرف على تفاصيل هامة من خلال هذا التقرير.
اللي بيصرف العيش على بطاقة التموين يابخته، واللي معهوش ربنا يعينه، لأن المخابز خلال الفترة الأخيرة زودت سعر رغيف العيش الحر أو السياحي. ودلوقتي الرغيف الصغير بجنيه ، والحجم الوسط بجنيه ونص، والحجم الكبير ب2 جنيه .طيب ليه؟
خالد صبري، سكرتير شعبة المخابز بالغرفة التجارية في القاهرة، قال إن سعر طن الدقيق الحر هو السبب، النوع ده من الدقيق شغال بيه أغلب المخابز السياحية، وسعره قفز مؤخرا إلى 21 ألف جنيه.
أما بقى طن الدقيق المدعم من التموين بسعر 10 آلاف جنيه، فبيوصل ل80 الف مخبز بس على مستوى الجمهورية كلها. وده اللي خلي المخابز تخالف السعر الرسمي المحدد من التموين، وتبيع العيش بسعر السوق الحر.
عشان كده سكرتير شعبة المخابز بالغرفة التجارية بالقاهرة، قدم اقتراح لعلي المصيلحي وزير التموين، بتشغيل مخابز العيش المدعم فترة إضافية في مجال الخبز الحر، ومنحها الدقيق بسعر مدعم حتى يرتفع عدد المخابز المسجلة لدى الوزارة.
وحسب كلامه عدد المخابز البلدية في نطاق محافظة القاهرة حوالي 800 مخبز موزعين على مدن القاهرة، وممكن إضافتهم للعمل في مجال الخبز الحر، عشان يتم توفير الخبز بوزن وسعر مناسب للمواطن.
بس في المقابل، غرفة صناعة الحبوب باتحاد الصناعات المصرية ، قالت إن تفعيل البورصة السلعية لتداول الأقماح المستوردة ساعد في انخفاض أسعار القمح من 13500 للطن إلى 10800 جنيه و11000 للطن ، وكمان انخفاض سعر الدقيق الفاخر 72% حوالى 2000 جنيه لكل طن.
كمان رحبت بمنظومة الحكومة لصرف الأقماح للمطاحن المرخصة بسعر القمح المستورد 9 آلاف للطن عشان تطحنه وتسلمه دقيق لمخابز الشركة القابضة للصناعات الغذائية بسعر 11250 جنيها لطن الدقيق استخراج 72% وبعدين يتم صرفه للمخابز السياحية والإفرنجية بمحافظات القاهرة الكبرى “القاهرة والجيزة والقليوبية”.
وعلى فكرة محافظات القاهرة الكبرى نصيبها 40% من حجم الاستهلاك على مستوى الجمهورية لإنتاج الخبز السياحي والفينو بأسعار مناسبة.
ومش بس كده، غرفة الحبوب توقعت ان استمرار العمل البورصة هيقلل أسعار القمح اكتر في الفترة الجاية، وده هيساعد على استقرار سعر الدقيق الفاخر 72% وتراجع أسعار المنتجات من العيش والمخبوزات لصالح المستهلك.
والخبر الحلو ان الحكومة لسة مستمرة في دعم رغيف العيش على بطاقة التموين رغم ارتفاع أسعار القمح والدولار.
وفي الوقت نفسه رئيس الوزرا وعد بسرعة الإفراج عن السلع المحجوزة في المواني والاولوية للمواد الغذائية واي خامات بتدخل في تصنيعها.
انتوا بقي قوللنا بتشتروا العيش برة التموين بكام؟ وهل سعر الدقيق بيزيد ولا بيقل؟ طيب لو مش معاكم بطاقة تموين بتصرفوا قد إيه على العيش كل شهر؟
