سميح ساويرس مختلف عن أخيه نجيب ساويرس، وقليل جدا عندما يظهر في الإعلام، ولكن عندما ظهر وتحدث أحدث ضجة كبيرة بسبب ما قاله، والردود عليه كانت قوية فماذا حدث؟
ياتري سميح ساويرس اي واحد من دول: رجل الاعمال اللي استفاد من البلد وعمل على قلبه مليارات قد كده من خيرها، وفي اول ازمه نط من المركب؟ ولا المستثمر اللي بيتكلم بالأرقام؟
اللي قاله سامح ساويرس عن الدولار في مصر مكنش سهل، وفي نفس الوقت رده مصطفى بكري عليه كشف مفاجأة
فتعالوا نشوف ايه حكاية ال75 مليار جنيه اللي بيعايره بيهم؟
“ايوة طبعا وقفت، ازاي هعرف اذا كان المشروع ده هيكسب ولا هيخسر وانا مش عارف هحسب الدولار على كام، 42 ولا 36 ولا 31 زي البنك”
هما دول الكلمتين اللي قالهم سميح ساويرس لما كشف عن وقف اي مشاريع جديدة ليه جوة مصر، في تصريحاته لموقع قناة العربية، ومن ساعتها الدنيا اتقلبت:
مصطفي بكري، طلع كشف كل الأوراق في تغريدة على تويتر وقال:” سؤالي بس للمهندس سميح انت نصيبك من المشروعات القوميه اللي اتعملت في مصر، 75 مليار جنيه في سبع سنين.
ومش بس كده، ده انتم حققتم مليارات الدولارات في مصر، بس واضح كده أن نكران الجميل بقى صفة اليومين دول
وخليك واثق ياسيد سميح مصر هتعدي أزمتها وكل محاولات إفشالها بفضل أبنائها المخلصين اللي بيعشقوا البلد دي اكتر من عشقهم للفلوس”
ومع كل ده ما سكتش مصطفى بكري وقال له” فاضل لي سؤال مهم انتم يا عيله ساويرس عندكم ثروه بتقرب من العشره مليار دولار تقدر تقول لي في كم مليار منها جوه مصر؟ للاسف ولا مليار!!!”
ولو فاكر ان الموضوع خلص على كده تبقى غلطان، لأن فرد تاني من ال ساويرس على الخط. وايوة زي ماتوقعت هو نجيب ساويرس اللي علق على كلام مصطفى بكري في تويتة برضه وقال وقال” صراحة لازم يدورا علي وجه جديد، ده اتهرى ، حتى اسألوا أخوه».
طيب هو سميح اتكلم عن مشاريعه وبس؟ الإجابة لا، ده كمل كلامه ل العربية وقال ان المستثمرين صعب يدخلوا مشاريع وهما مش عارفين الدولار بكام ولو دخلوا هيعرفوا يطلعوا بيه ولا لأ، ده غير مشكلة توفير الخامات يعني هو مثلا في خامات مكنش عارف يجيبها، وفي خامات وصلت مصر فعلا بس معرفش يدخلها.
وكل ده في كفة واللي قاله عن مشاريعه الفترة الجاية في كفة تانية:
دلوقتي سميح بيتفاوض على مشاريع في قطاع السياحة بالسعودية نقلا عن الشرق بلومبرج، وشايف انها بعد كام سنة هتبقى منطقة الاستثمار نمرة واحد في المنطقة كلها هنشوف فيها نسخ كتيرة من مدينة دبي، وفقا للعربية.
ورغم كده، قال إن الأوضاع في مصر مش هطول كتير وازمة العملة هتتحول اما بالتعويم أو بتحديد سعر واقعي، حسب كلامه لقناة cnbc عربية.
وهو نفسه استفاد من التعويم، لأنه زود أرباح الفنادق التابعة ليه، وتوقع ان 2023 تكون أفضل سنة سياحية عدت على مصر من 2011, بس في المقابل بيرفع تكلفة المشاريع العقارية اللي ينفذها، نقلا عن الشرق بلومبرج والعربية.
انتوا بقي رايكم إيه في كلام سميح ساويرس، ورد مصطفى بكري عليه؟
