من فترة انتشر كلام يقول إن الملياردير المصري سميح ساويرس بخطط إنه ينقل استثماراته الشخصية إلى السعودية وهذا في قطاعات كثير أهمها قطاع السياحة.
بس يا ترى إيه حقيقة الكلام ده وهل فعلا ساويرس هينفذ مدينة سياحية زي الجونة بظبط لكن في المملكة العربية السعودية؟خليكوا معانا لمعرفة التفاصيل
رجل الأعمال سميح ساويرس بيخطط إنه يستثمر في السعودية السنة دي وتحديدًا في قطاع السياحة وده لأنه حسب تصريحاته اللي نشرها موقع الشرق بلومبرج
بيخطط يبني مشروع مدينة الجونة المصرية لكن في المملكة.
وده اللي أعلنه ساويرس في مقابلة مع الشرق بلومبرج على هامش مؤتمر الأعمال العربي الصيني واللي انعقد في الرياض
وقال فيها إن استثمارات المرحلة الأولى من المشروع اللي بيطل على البحر الأحمر مش هتقل عن 500 مليون دولار
وإنه هيتم تنفيذه بالشراكة مع مستثمرين من القطاع الخاص السعودي
وكمان قال للعربية إنه بيخطط كمان لمشروع سياحي في في منطقة جدة القديمة بالسعودية، وده هيكون عبارك عن تحويل النباتي القديمة في المنطقة الي غرف فندقية لجذب السباح للمنطقة، وده هيكون ضمن خطط المملكة لإبراز التراث والثقافة السعودية.
والمفترض ان تشغيل المشروع ده يبدأ خلال السنة دي، وحسب سميح ساويرس التوسع بالاستثمار في السعودية جه بدعم التسهيلات اللي بتقدمها المملكة للمستثمر، وسهولة دخول وخروج الأموال”.
مش بس كده ده قال كمان إنه بيخطط لإنشاء فندق جديد في سويسرا باستثمارات 200 مليون دولار، واللي هيبدأ في تنفيذه السنة الجاية
وطبعا دي أول مرة سميح ساويرس يتكلم عن مشاريعه في السعودية بالتفصيل، بعد حالة الجدل اللي عملها بسبب تصريحاته السابقة عن توجيه استثماراته للسعودية باعتبارها هتكون المنطقة رقم واحد في جذب الاستثمار الاجنبي خلال الفترة الجاية، خاصة وإنه شايف إنها منطقة استثمارية واعدة جدا
طيب هل ده معناه إن استثماراته في مصر هتقف خلاص؟
لأ يا سيدي الملياردير المصري اكد في تصريحاته إن استثماراته في مصر مش هتوقف، وإنه مستمر في التوسع في مشروع الجونة، وهيضخ 100 مليون دولار خلال عامين لإنشاء فندق جديد وتوسعة فنادق قائمة بالفعل.
وفي تصريحات سابقة لـ الشرق بلومبرج اتكلم الملياردير سميح ساويرس وقال إنه بعد كام سنه المملكة العربية السعودية هتصبح أكتر مكان بتجرى فيه استثمارات.
وبدل ما في دبي واحدة هنشوف في السعودية أكتر من مدينة بنفس الشكل
وقال سميح ساويرس إن التحركات السريعة للمملكة العربية السعودية وخاصة في الملف السياحي عملت نقلة كبيرة شجعتنا على ضرورة التواجد في السعودية
وكان بيشكر في سرعة إنجاز الإجراءات والتصاريح الخاصة بسياحة اليخوت واللي كان شايف إنها زودت من تنافسية السوق السعودي
مش بس كده فترة في مؤتمر صحفي سابق عقدته شركة أوراسكوم للتنمية اتكلم سميح ساويرس وقال إنه ساب المناصب التنفيذية في شركة أوراسكوم للتنمية
وقال انه هيركز الفترة الجاية على استثمارات سياحية وفندقية في بعض المناطق المحلية وده غير الاسواق الاقليمية المجاورة.
وحسب تصريحاته وقتها فقال إنه فضل سنين بيشرف على حجم ضخم من الأعمال في الشركة وخلال الفترة دي عايز ياخد راحة من النوعية دي من الأعمال
والأهم من ده كله إنه وقتها أعلن إنه بيدرس بشكل شخصي مشروعات كتيرة في أسواق خارجية زي السعودية والمغرب، لكنه قال إنه هيعرض كل الفرص دي على شركة أوراسكوم للتنمية عشان لو الشركة حبت تستثمر فيها.
لكن طبعا وقتها التصريحات اللي قالها ساويرس لوسائل إعلام سعودية، عملت جدلا كبير وفي ناس اعتبرت إنها جت في وقت صعب بالنسبة للاقتصاد المصري وممكن تضر بمساعي الحكومة لجذب المستثمرين للبلاد.
دلوقتي قولنا رأيك في اللي بيحصل بشكل عام وهل شايف إن ده بيشكل أي خطر على اقتصادنا؟
