لو بتفكر تشتري عربية وترى إن الأسعار مرتفعة ولا تعرف كيف تتصرف؟ الحكومة جاءت بالحل، وذلك لأنها ستوفر سيارة صناعة مصرية يمكنك شرائها والحكومة ستمنحك تمويل ما بين 50 و70 ألف جنيه.
وده لانها هتوفرلك عربية صناعة مصرية هتقدر تشتريها وكمان الحكومة هتديك تمويل ما بين 50 و 70 ألف جنيه .
حلم امتلاك العربية مبقاش بعيد خلاص، وده لأن الحكومة دلوقتي مهتمة بتوطين صناعة السيارات في مصر، وكل اللي عايز يشتري عربية هيتحقق حلمه خلاص
وده الكلام اللي أكده وزير المالية الدكتور محمد معيط في تصريحات لـ برنامج الحكاية، وقال فيها إن الدولة مهتمة الفترة دي بصناعة السيارات النظيفة وده اللي ظهر بشكل كبير في مواد قانون تنظيم الصناعة والمعروف بـ استراتيجية صناعة السيارات
مش بس كده، ده كمان قال إن الحكومة الفترة دي بتحاول تجذب استثمارات محلية وأجنبية بقطاع السيارات وده من خلال محفزات بتقدمها للمستثمرين .
طيب السؤال بقا هل المصريين هيقدروا يشتروا عربية صناعة محلية قريب ؟
الحقيقة السؤال ده جاوب عليه وزير المالية وقال إن الحكومة هتدعم المواطنين اللي هيشتروا السيارات الكهربائية اللي هيتم تصنيعها في مصر وعشان كده هتديهم دعم مالي هيتراوح ما بين 50 لـ 70 ألف جنيه
ومش بس كده ده كمان أكد إن الدولة هتقدم حوافز كتيرة لمصنعى السيارات في مصر والمنصوص عليها بـ استراتيجية صناعة السيارات، و منها على سبيل المثال إن المستثمر اللي هيصنع السيارة الكهربائية في مصر هيسترد ما بين 30 لـ 40% من تكلفة إنتاج السيارة .
ولو انت مش عارف فـ حكومتنا بتسعى من 7 سنين إنها تحقق حلم تصنيع أول عربية كهربائية في مصر، لكن نجحت فعلا في 2020 وقدرت تعمل اتفاقية تعاون بين شركة النصر المصرية و دونج فينج الصينية عشان تصنع تصنيع سيارة كهربائية.
لكن للأسف في نوفمبر 2021 انفض التعاون مع دونج فينج ووقف مشروع سيارة النصر E70، وده بسبب تعثر المفاوضات بين الطرفين
وقتها أعلنت وزارة قطاع الأعمال إنها بدأت مفاوضات جديدة عشان تكمل مشروع تصنيع السيارة المصرية.ومن وقتها بدأت تشتغل الدولة ممثلة في وزارات الصناعة والتجارة وقطاع الأعمال العام والمالية عشان تلاقي بدائل محلية أو أجنبية، تخليها تبدأ في التنفيذ الفعلي لمشروع أول سيارة كهربائية واللي هتحمل شعار صنع في مصر.
ومن فترة أعلنت الحكومة عن التعاون مع مجموعة “هندوجا” الهندية واللي بتشتغل فى مجال صناعة المركبات الكهربائية بأنواعها المختلفة .
وقدرت الحكومة توجه التعاون ده لتصنيع الأتوبيسات الكهربائية والسيارات اللي حجمها صغير واللي بتشتغل بالطاقة الكهربائية.
وده اللي أكده محمود عصمت وزير قطاع الأعمال العام في تصريحات ليه نشرها موقع اليوم السابع وقال إن مصر بتمتلك سوق محلي قادر يستوعب أعداد كبيرة من المنتجات، وعشان كده الحكومة قدرت تعمل شراكة مع شركاء هنود واتفقت خلالها على إقامة مركز صناعي متكامل لإنتاج المركبات الكهربائية في مصر.
أما لو بتسأل عن معاد الطرح فـ محمد الغامري، عميد البحوث التطبيقية بالأكاديمية العربية للعلوم والتكنولوجيا والنقل البحري، قال في فبراير اللي فات إن طرح أول سيارة كهربائية مصرية في الأسواق هيكون 6 شهور، نقلا عن اخبار اليوم.
وإن الأنواع اللي مصر هتصنعها هتكون نوعين من السيارات الكهربائية، واحدة بتمشي 60 كيلو متر والتانيه بتمشي 200 كيلو متر لكل شحنة.
قولنا رأيك في جهود الحكومة لتوطين صناعة السيارات وهل لو نزلت هتفكر تشتريها؟
