هتكسب 11 الف جنيه وانت في بيتك، أيوة زي ماسمعت كده انت دلوقتي تقدر تكسب كل المبلغ ده لو استثمرت فلوسك في بنك مصر، وده لأنه أصدر شهادة جديدة بعائد محترم، مش بس كده ده كمان البنك الأهلي أصدر نفس الشهادة دي
بس إيه تفاصيل الشهادة دي؟ والعائد بتاعها كام؟ وايه تفاصيل الشهادات الدولارية الجديدة؟ وايه حكاية الشهادة البلاتينية الموجودة في البنك الأهلي؟
الفترة الأخيرة كتير من البنوك في مصر قرروا أنهم يطرحوا شهادات ادخار بعائد تنافسي، وده خلى العملا في حيرة كبيرة عن افضل شهادة ادخار ممكن يستثمروا فيها فلوسهم وتحيبلهم احسن عائد
بس خلاص متدورش ولا تحتار كتير وده لأن بنك مصر أعلن عن إصدار شهادة بنك مصر 2 ودي بقى هتدخلك عائد محترم، لكن هي ايه تفاصيل الشهادة دي؟
شوف يا سيدي، حسب موقع صدى البلد، بنك مصر طرح شهادة اسمها “ابن مصر2” ودي بقى بعائد متناقص لمدة 3 سنين، بيبدأ من 22% في السنة الأولى و18% في السنة التانية، و16 % للسنة التالتة، والعائد بتاعها بيتصرف شهريا.
يعني مثلا لو معاك 600 الف فالعائد بتاعك من الشهادة هيكون 11 الف شهريا من خلال عائد ال22%، الشهادة دي بتتميز بأنك ممكن تقترض بضمانها، دي كمان وبتصدر بطاقات ائتمان بأنواعها بضمان الشهادات.
وعلى فكرة العائد بتاعها بيتحسب من تاني يوم شرا، لكن خالي بالك انت مش هتقدر تسترد الشهادة دي قبل مرور 6 شهور بعد كده بقى ممكن تستردها قبل نهاية المدة لكن وفقا للقواعد والشروط المعلنة في البنك
وبالنسبة بقى للمستندات المطلوبة لشرا الشهادة فبيطلب منك بطاقة رقم قومي سارية وفاتورة مرافق متزيدش مدتها عن 3 شهور
وبالمناسبة البنك الأهلي أصدر نفس الشهادة تحت مسمى الشهادة البلاتينية ودي بعائد “متدرج” لمدة 3 سنين بعائد سنوى 22% لأول سنة و18% السنة الثانية و16% السنة الثالثة ويصرف العائد شهريا
ودي مكنتش اول شهادة بيطلقها بنك مصر والبنك الأهلي مع بعض، وده لأنهم الفترة الأخيرة أصدروا شهادات دولارية جديدة، بس إيه تفاصيل الشهادات دي؟
انا اقولك، بنك مصر كان أعلن خلال الفترة الأخيرة عن إصدار شهادتين دولارية، الشهادة الاولى اسمها شهادة «القمة» ودي بعائد 9% سنويا، ومدتها 3سنين، العائد بتاعها بقى ياسيدي بيكون تراكمي وبيتصرف مقدم بالجنيه المصري وبواقع(27%)
أما الشهادة التانية فدي اسمها «إيليت» بعائد 7% سنويا وبيتم صرف العائد ربع سنوي بالدولار الأمريكي.
الشهادات دي بتشتريها ب1000 دولار، والعائد بتاعها بيتحسب من تاني يوم شراء، انت كمان ممكن تسترد الشهادات دي بعد مرور 6 شهور من تاريخ الشرا، وده وفقا لقواعد البنك,
ودي نفس الشهادات اللي أصدرها البنك الأهلي لكن بمسميات مختلفة بمعنى أن شهادة ايليت في بنك مصر اسمها الاهلي بلس في البنك الاهلي ودي بعائد 7%، والقمة اسمها في البنك الأهلي “الاهلي فورا” ودي بعائد 9% بيتصرف مقدم
وعلى فكرة الهدف الأساسي من اصدار الشهادات الدولارية دي هو تشجيع المصريين المقيمين في الخارج على زيادة تحويلاتهم من العملة الأجنبية من ناحية، ومن ناحية تانية أن العملا يستثمروا فلوسهم في وعاء ادخاري يحافظ على فلوسهم ويزودها كمان.
ودلوقتي قولنا رايك في شهادات بنك مصر؟
