أسعار الذهب في العالي، ويوم وراء يوم قيمة الجرام بتزيد، فهل هذا أحسن وقت للشراء قبل ارتفاع السعر أكثر من ذلك أم يفضل أن تنتظر لعله يتراجع؟ تابعونا من خلال التقرير التالي لمعرفة التفاصيل:
في البداية… لازم تعرف ان سعر الدهب في مصر مرتبط ب3 حاجات: السعر العالمي في البورصة، وسعر الدولار أمام الجنيه، وحجم الطلب.
وبعد استقرار سعر الدهب لاسابيع، المعدن الأصفر راجع دلوقتي بكل قوة وسعر الجرام الواحد معدي 1900 جنيه ولسة بيزيد.
والسبب في التغيير ده هو الظروف الاقتصادية خاصة أزمة البنوك الأمريكية، لأن إفلاس بنك سيليكون فالي اتسبب في هبوط الدولار وفي المقابل صعود الدهب.
ده اللي قاله هاني ميلاد، رئيس الشعبة، وضيف على كده كمان اننا في انتظار أحداث مهمة الشهر ده ممكن تأثر على سعر الدهب، زي صرف استحقاقات شهادات ال18%..
فلو البنوك مطرحتش شهادات ادخار جديدة بفايدة مرتفعة الأيام الجاية، احتمال أصحاب شهادات ال18% يشتروا بفلوسهم دهب، وده لو حصل هيزود الطلب عليه.
كمان متنساش التقارير العالمية اللي بتتوقع ارتفاع سعر الدولار على اخر الشهر، وزي ما انت عارف ارتفاع الدولار عندنا معناه ارتفاع سعر الدهب هو كمان.
ومع العوامل دي كلها، هاني ميلاد أكد ان الدهب استثمار طويل المدى وآمن، فلو معاك سيولة كويسة، الدهب هيكون انسب حل عشان تحافظ على قيمتها، لكن العملة الاستثمار فيها مش مضمون.
وعلى فكرة، ناحي فرج مستشار وزير التموين بيتوقع وصول سعر الاوقية عالميا إلى 2500 دولار، خاصة لو الصراع بين روسيا وأوكرانيا اتازم اكتر، وده معناه وصول سعر الجرام في مصر إلى 2000 جنيه
وبناء عليه، الوقت الحالي مناسب لشراء الدهب لأن سعره هيزيد الفترة الجاية، وده برضه رأي أمير رزق خبير المشغولات الذهبية اللي توقعاته هتصدمك اكتر!
الخبير شايف إن جرام الدهب الواحد هيزيد 1000 جنيه في شهر سبتمبر الجاي، مع إقبال المستثمرين على شرائه لتحقيق أفضل الأرباح.
بس خد بالك برضه: سعر الدهب مرهون بقرارات البنك الفيدرالي بخصوص سعر الفايدة، والفكرة ان التصريحات الأخيرة لرئيس البنك أكدت انهم مكملين في رفع الفايدة، وده المفروض يتسبب في انخفاض سعر الدهب.
لكن كلنا شفنا ازاي إفلاس بنك سيليكون فالي اتسبب في موجة من الخساير والانهيارات في بنوك تانية، عشان كده محدش عارف الفيدرالي هيعمل ايه بخصوص الفايدة الفترة الجاية.
واخر نصيحة بقى لو عاوز تشتري دهب للاستثمار يفصل تشتري السبيكة أو الجنيه الدهب، لان سعر المصنعية عليهم أقل من المشغولات الذهبية العادية.
وطبعا لازم تكون متأكد انك مش هتحتاج فلوسه دلوقتي عشان تضمن تبيع بأكبر مكسب، ولو السيولة معاك كبيرة شوية الأفضل انك توزعها على أوزان صغيرة، عشان لاقدر الله لو حصلت ظروف واحتجت سيولة تقدر تبيع على قد المبلغ اللي محتاجه بس.
وفي النهاية بقى يهمنا رأيكم، هل لسة شايفين الدهب افضل استثمار آمن؟ ولا هتستنوا البنوك تنزل شهادات ادخار بفايدة مرتفعة؟
