تتخيلوا هل ممكن أن نسمع عن انهيار الدولار الفترة القادمة؟ فكرة انهيار الدولار تشغل كل العالم وهذا لأن الدولار يسيطر على كل النظم المالية واقتصاديات العالم أجمع وهذا من نهاية الحرب العالمية الثانيه تقريبا.
والسؤال بقى هي إيه توقعات الدولار الفترة الجاية؟ ، وليه في مخاوف من انهيار الدولار لسه بتطارد أمريكا؟
الأيام اللي فاتت أغلب التقارير الاقتصادية العالمية كانت بتسأل عن مستقبل الدولار الفترة الجاية خاصة وإنه بعد الأزمة الروسية الأوكرانية في دول ناشئة كتير اتضررت من ارتفاع أسعار الفايدة الأمريكية على الدولار.
وكانت أغلب الإجابات على التقارير دي بإن الدولار مش هيفضل هو سلطان العملات وده لأنه دول كتير مبقتش مرحبة بيه خاصة بعد الازمات اللي حصلت في الاقتصاد العالمي
واحد هيسأل ويقولى طب إيه اللي قلق الخبراء في الولايات المتحدة مهو الدولار هو الدولار يعني وهيفضل قوي ؟
لا ياسيدي القلق ده طبيعي جدا خاصة إن في دول عشان تهرب من هيمنة وسيطرة الدولار بدأت تعتمد على عملات مختلفة في التبادل التجاري بتاعها
فمثلا عندك البرازيل بدأت تعتمد على عملة برازيلية أرجنتينية جديدة والعملة دي استخدموها بين البرازيل والأرجنتين عشان يدعموا التجارة بين البلدين.
ورغم إن فكرة التعامل بعملة موحدة بين البلاد ده موجود من زمان وتحديدا من فترة التمانينات لكن بدأت الفترة دي تنتشر وتتنفذ في بعض الدول.
وده طبعا عمل مخاوف للأمريكان وده لأن لو التجربة دي نجحت وجذبت دول تانيه في أمريكا الجنوبية ده هيقوي اقتصادهم وهيساعد إنه يحصل دمج اقتصادي بين بلاد تانيه.
والأكيد إن ده لو حصل البلاد دي هتبدأ بشكل تدريجي تبعد عن الدولار في حركة التجارة.وخلي بالك إن في دول كتيرة بدأت تعمل ده زي مصر مثلا في تجارتها مع الهند وروسيا واللي بدأت تستخدم فيها الروبل الروسي والروبية، وده لأن مصر بدأت تقلل اعتمادها على الدولار في حركة التجارة.
طيب هل كده الدولار ممكن ينهار؟
بص ياسيدي في وجهات نظر تانيه من خبراء اقتصاد بتقول إن المخاوف دي مبالغ فيها وأنه مفيش عمله هتقدر تزعزع مكانة الدولار الفريدة واللي بيسيطر بيها على معظم اقتصادات العالم وإن السيناريو ده مستبعد تماما.
لكن خليني أقولك إن الكلام ده في جزء منه صح خاصة وإن في بلاد كتير بتستخدم الدولار بدل العملة المحلية بتاعتها
مش بس كده ده كمان 40% من ديون العالم بتكون بالدولار، وحوالي 60% من احتياطيات العملات العالمية بالدولار
وده اللي أكده خبير مالي في بنك إنجلترا ، اسمه ميتشيل هامفريز، وقال إن الاقتصاد الأمريكي هيفضل هو الملاذ المفضل للمستثمرين العالميين خاصة في الأوقات الاقتصادية الصعبة .
وقال إن الولايات المتحدة هي الدولة الوحيدة اللي بتقدر تسدد ديونها الخارجية بعملته المحلية وده لأنه بغض النظر عن حجم الديون دي الحكومة بتقدر ببساطة تطبع الأموال اللازمة وتسددها
لكن دول تانيه بتضطر تشتري الدولار أو اليورو عشان تسدد ديونها الخارجية وعشان ده يحصل لازم الدولة تصدر اكتر ما تستورد أو تضطر بعض الدول إنها تاخد قروض جديدة عشان تسدد القديمة من السوق الدولية لكن أمريكا مش بتعاني من المشاكل دي.
طيب والجنيه هيعمل ايه مع الدولار؟
لسه توقعات بنوك الاستثمار العالمية زي ما هي، واللي بتأكد إنه هيحصل تخفيض جديد في قيمة الجنيه، عشان يسجل الدولار على المدى المتوسط ما بين 32 أو 35 إلى 40 دولار.
وحتى في العقود الآجلة للجنيه لمدة 12 شهر، سعر الدولار وصل إلى حوالي 41 جنيه، وده يعتبر مؤشر على احساس المستثمرين بأننا في مصر داخلين على خفض جديد في قيمة الجنيه.
فهل تتوقعوا انتوا كمان تراجع سعر الدولار عالميا وهل فعلا ممكن نشوف عملات تانيه أقوى من الدولار ؟
