قرار البنك المرزي برفع الفائدة 2% لم يكن مفاجأة ، بالعكس فيه خبراء كثيرين توقعوه، لكن بعد الإعلان عنه في أكثر من سؤال نحتاج إجابة عليها:
فهل ده فعلا القرار الصح؟ وإيه علاقته بحجم الديون على مصر؟وأهم سؤال بقى مين البنوك اللي هتطرح شهادات جيدة، والفايدة عليها هتبقى كام؟ وهل ممكن توصل الى 30%خليكم معانا عشان تعرفوا كل التفاصيل
دلوقتي سعر الفايدة في البنك المركزي أصبح 18.25% على الإيداع، و19.5% علي الإقراض، بعد رفع الفايدة 2%.
وطبعا قرار زي ده بيكلف الدولة مبالغ أكبر، لأن الحكومة هي أكبر مقترض من البنوك، وحسب وزير المالية محمد معيط، كل زيادة 1% في سعر الفائدة بيملع الموازنة العامة للدولة بين 30 إلى 32 مليار جنيه عبء دين الدين.
بس برضه القرار ليه أسباب معتبرة، وضحها الخبير الاقتصادي هاني جنينة، وأولها تقليل معدل التضخم اللي سجل اكتر من 40٪.
وخصوصا بقى ان مصر اتفقت مع صندوق النقد الدولي على خفض معدلات التضخم تدريجيا عشان يسجل 16% في مارس وبعدها 15% خلال الفترة الجاية.
وطبعا الفرق بين الرقمين كبير جدا، وده بيحط البنك المركزي تحت ضغوط كبيرة لرفع أسعار الفايدة
أما بقى السبب التاني فهو شهادات ال18 اللي بدأت البنوك في صرف استحقاقتها من 22 مارس، والمشكلة ان حصيلة الشهادات دي 755 مليار جنيه.
فلو البنوك مقدمتش للعملا شهادات بديلة بأسعار فايدة معقولة، الناس دي هتاخد فلوسها وتدور على طرق استثمار تانية ممكن تضر البلد زي مثلا شراء الدولار، وكمان هيرفع أسعار الدهب والعقارات.
وده ياخدنا للسؤال المهم: هل رفع البنك المركزي لأسعار الفايدة، معناه طرح شهادات ادخار بفايدة أعلى؟القرار بيختلف من بنك للتاني حسب وضع كل بنك والتكلفة اللي هيتحملها، بس عادة ده بيزود فرصة إصدار شهادات بفايدة مرتفعة.
وحسب هاني جنينه، لازم البنوك تطرح شهادات بديلة بفايدة متقلش عن 22%.كمان هاني ابو الفتوح، الخبير المصرفي توقع إصدار شهادات بفايدة 26% في 5 بنوك هي العربي الأفريقي وCIB و الأهلى المصري و مصر والقاهرة.
ومش بس كده، ماجد فهمي، رئيس بنك التنمية الصناعية سابقا، توقع طرح بنكي الأهلي ومصر لشهادة بفايدة 30% أمام المصريين العاملين بالخارج مقابل التنازل عن الدولار للاستفادة من الشهادة المطروحة للبيع.
بس يحي ابو الفتوح، نائب رئيس البنك الأهلي نفى نية البنك في طرح شهادة 30%وفي نفس الوقت سهر الدماطي، الخبير المصرفية شايفة ان البنوك مش هتطرح شهادات بديلة لشهادة ال18% لان التكلفة هتبقى عالية جدا
وعموما ده هيبان اكتر يوم الأحد الجاي، مع عودة البنوك من الاجازة الأسبوعية، بس انتوا توقعاتكم إيه، ومن وجهة نظركم إيه سعر الفايدة المناسب اللي يخليك تحط فلوسك في البنك بدل استثمار ها في الدهب والعقارات؟
