الدينار الكويتى سعره تخطى ال100 جنيه ،والريال السعودى داخل على ال8 جنيه،والكل فى مصر طول الأيام الماضية يبحث عن فرصة شغل وخاصة فى الكويت.
طيب بالنسبة للمصريين فى الكويت والسعودية هيفضل اللى رايح على قد اللى جاى؟،ولا المفروض فى ظل الظروف الإقتصادية اللى كلنا بنمر بها حتى هم كمان على فكرة يكون ليكوا طريقة تستثمروا فيها ويكون العائد بتاعها بقيمك العملة بتاعك يعنى هتدفع بالدينار العائد يرجعلك بالدينار بردوا ،فلو إنت مغترب فى الكويت والسعودية الفيديو ده ليك ،يالا أقولك التفاصيل ..
لو معاك مبلغ ومحوشه فى الغربة،وعايز تستثمره مش هيبقى قدامك غير 3 حاجات ملهموش رابع ،الدهب ومش مضمون الحقيقة يوم النازل ويوم فى الطالع،العقارات ومحتاجة دراسة وتدقيق وعوامل كتير لازم تحطها فى الحسبان علشان ميضحكش عليك ،فرصتك بقى فى شهادات الإدخار وخاصة الشهادات الدولارية مضمونة 100%.
تقدر تعمل الشهادة الدولارية ذات العائد المرتفع بعد رفع الفايدة عليها وتوصل ل 5.30% دى خلال بنك من البنوك ال4 دول جوة ومصر وبراها .
الأهلى ومصر والتجاري الدولي CIB والقاهرة أعلنوا الفترة اللى فاتت رفع الفائدة بأكثر من الضعف على الشهادات الدولارية للعائد الثابت آجال 3 سنوات و5 سنوات و7 سنوات لأول مرة من 5 سنوات ومتاحة لكل المصريين دون استثناء.
طبعا الشهادات الدولارية دى متاحة للأفراد الطبيعيين والشركات، وبيتم استرداد قيمة الشهادة وفقاً لقواعد الاسترداد الخاصة بالشهادة.
هجاوبك حالا على سؤالك تشترى إزاى الشهادات دى ؟ الحقيقة فى 3 طرق تقدر من خلالها تحصل على الشهادات الدولارية دى ،ممكن تشتريها من أى فرع من فروع اى بنك من ال4 دول ولكن بشرط تفتح حساب دولارى علشان تودع العائد بشكل دورى.
كمان ممكن تعملها من خلال خدمة الإنترنت البنكى على مدار 24 ساعة وطول أيام الأسبوع ،ولكن الخدمة دى متاحة للعملاء القائمين والمشتركين في الخدمة من خلال حساباتهم، ولكن لو إنت جديد لازم تعمل بالطريقة الأولى .
ممكن كمان تشتريها من خلال خدمة الموبايل البنكي أبلكيشن البنك اللى هتحمله على موبايلك ويتبع نفس إجراءات الإنترنت البنكي ومتاح على مدار اليوم وطوال أيام الأسبوع.وخلى بالك لازم علشان تفتح حساب دولارى تقدم ما يفيد مصادر تدفق موارد النقد الأجنبي سواء من تحويلات من أحد أقاربك أو من جهة عملك .
طيب نيجى بقى للمهم ياترى سعر الفايدة كام فى البنوك دى ؟
الأهلي ومصر والقاهرة تقريبا نفس العائد المرتفع والمطبق على الشهادات الثلاثية والخماسية ،الشهادة أجل ال3 سنين: سعر العائد يتراوح بين 5.30% سنوياً لدورية صرف العائد السنوية، و5.25% سنويا لدورية صرف العائد نصف السنوية، و5.20% سنويا لدورية صرف العائد ربع السنوية، و5.15% سنويا لدورية صرف العائد الشهرية.
وتقدرتشترى الشهادة الثلاثية في البنك الأهلي من 500 دولار كحد أدنى، وفي بنكي مصر والقاهرة من 100 دولار.
أما شهادة أجل ال 5 سنين: سعر الفائدة بيتراوح بين 5.15% للعائد السنوي، و5.10% سنويا لدورية صرف العائد نصف السنوية، و5.05% سنويا لدورية صرف العائد ربع السنوية، و5% سنويا لدورية صرف العائد الشهرية.
وبيدأ سعرها فى البنك الأهلي من 500 دولار كحد أدنى، وفي بنكي مصر والقاهرة من 100 دولار.
نيجى بقى على سعر الفائدة على الشهادة أجل 7 سنوات في بنكي الأهلى والقاهرة: بتوصل ل 5.05% بدورية صرف سنوية، و5% سنويا بدورية صرف نصف سنوية، و4.95% سنويا بدورية صرف ربع سنوية، 4.90% سنويا بدورية صرف شهرية.،وتقدر لو معاك 100 دولار تشتريها كحد أدنى علشان تستفيد من العائد المرتفع لمدة طويلة.أما بقى أسعار الفايدة فى البنك التجارى الدولى بيختلف عن ال3 بنوك دول .
شهادة أجل 3 سنوات: سعر العائد السنوي يصل إلى 5.25% يصرف شهريا، وشهادة أجل 5 سنوات: سعر الفائدة 5% سنويا لدورية صرف العائد الشهرية، شهادة أجل 7 سنوات: سعر الفائدة سنويا يصل إلى 4% ويصرف العائد شهريا.
ويبدأ الحد الأدنى لشراء أي شهادة دولارية من الشهادات دى من ألف دولار.
بكده أكون قولتلك كل التفاصيل الخاصة بالشهادات الدولارية ،معاك كام بقى علشان تقدر تستثمر فلوسك بالشهادة الدولارية المناسبة؟
