رغم أنه في مشكلة في الأرز وسعره في السوق المصري، لكن هذا ليس مبرر أننا نوافق بأي حل نجده أمامنا دون أن نفكر في الأمر، وهل هو مناسب لاحتياجاتنا وذوقنا أم لا.
ما حكاية الرز الصيني اللي هيتزرع في مصر ده؟ وتفتكروا ده أفضل حل لأزمة ارتفاع سعر الرز في الأسواق؟ تعالوا نعرف الحكاية في التقرير التالي:
الحل الصيني
البداية كانت مع التصريحات اللي قالها السفير الصيني في القاهرة لياو ليتشانج، لما قال إن الصين بتسعى لتعزيز الشراكة الاستراتيجية والاقتصادية مع مصر خلال السنة دي.. عشان مصر والصين يكونوا مع بعض قوة اقتصادية كبيرة ورئيسية في المنطقة.
وخلال اجتماع السفير مع جمعية رجال الأعمال المصريين، قال إن الصين مستعدة للتعاون مع مصر في صناعة العربيات.. وكمان في زراعة الرز الصيني في مصر.
والسفير وقتها قال إن الرز الصيني بيتحمل الجفاف وممكن يتم زراعته في الصحراء الغربية.. وأن في خطة تم طرحها على وزير الزراعة السيد القصير من كام يوم.
الأرز كله واحد
الدكتور نادر نور الدين، أستاذ الأراضي والموارد المائية، علق على الكلام ده وقال إن مفيش اختلافات كبيرة ما بين أنواع الرز المختلفة.. لكن الاختلاف بيكون في طريقة زراعة كل نوع.
الدكتور نور الدين قال كمان خلال مداخلة مع الإعلامية كريمة عوض، في برنامج «حديث القاهرة»، اللي بيتذاع عبر قناة «القاهرة والناس»، إن الرز المصري مختلف عن باقي الأنواع سواء في طعمه أو في طريقة زراعته.. وهو أفضل نوع رز بالنسبة للمصريين.
سمعة الأرز المصري
وقال أنه لازم نحافظ على المحصول المصري من الرز.. لأن الرز المصري مسجل عالميا.. وله سمعة طيبة في العالم.
وبالنسبة للرز الصيني فنقدر نقول عليه الرز الجاف.. لأنه مش بيحتاج مايه كتير زي كميات المايه اللي بيحتاجها الرز المصري خلال شهور الزراعة.
الرز الجاف
وفي باحثين توصلوا لنوع رز جديد اسمه “الرز الجاف” وهو شبه الرز الصيني جدا.وبالنسبة لمسألة زراعة الرز في الصحراء.. الدكتور نور الدين قال إن الرز المصري بيحتاج لغمر الأرض بالمايه بنسبة كبيرة.. ومش ممكن يتم زراعته في الصحراء لأن زي ما كلنا عارفين الصحراء في مصر بتعاني من ندرة المياه.
وفكرة زراعة الرز الجاف اللي توصل لها الباحثين تم تطبيقها في بعض المناطق في محافظة الشرقية.. وممكن يتم تخصيص جزء من أراضي الصحراء لتجربة الرز الصيني لأنه مش بيحتاج مايه كتير زي ما قولنا.
أسعار السوق
وفي الفترة الحالية سعر كيلو الرز في التموين حوالي 10 جنيه.. وفي معارض أهلا رمضان اللي الدولة بتعملها عشان تساعد المواطنين في مواجهة غلاء الأسعار حوالي 14 جنيه ونص.والأسعار دي أقل من أسعار السوق بكتير جدا لأن سعر كيلو الرز في بعض المناطق وصل أكتر من 20 جنيه.
المعادلة الصعبة
موضوع زراعة الرز الصيني يبان أنه حل حلو للأزمة.. وهيحل المعادلة الصعبة ما بين توفير اللي البلد محتجاه من الرز.. وفي نفس الوقت يوفر المايه اللي بتستهلكها زراعة الرز المصري.
لكن المشكلة هنا إن المستهلك المصري نفسه مش بيفضل الرز المستورد.. خصوصا المستورد من دول شرق آسيا.. والمصريين نفسهم قالوا على الرز اللي الحكومة استوردته من الدول دي قبل كدا أنه “رز بلاستيك مالوش طعم”.
تفتكروا أيه أفضل حل لأزمة الرز؟ وقولولنا بتجيبوا الرز بكام من السوق دلوقتي؟
