ماذا يحدث لأسعار الذهب؟،ارتفعت بطريقة جنونية وجرام الذهب وصل 2350 جنيه.والسؤال هنا ما هي التوقعات للأسعار الفترة القادمة؟
أسعار الدهب اليومين دول مش مستقرة خالص سواء على المستوى المحلي أو العالمية وده اللي أكده مسؤلين في شعبة الدهب بالغرفة التجارية وقالوا إن سعر الجرام بيعاني من تذبذب ملحوظ وده بسبب زيادة الاقبال على الشراء.
مع نهاية شهر رمضان وقرب عيد الفطر المبارك بيكون في اقبال شديد على شرا الدهب وأكتر ناس بتعمل كده هما العرسان اللي بيتوافق أفراحهم مع العيد.
وعشان كده شوفنا صور كتير الأيام دي على مواقع السوشيال ميديا لزحمة شديدة لكتير من المواطنين موجودين في محلات الصاغة.
وده طبعا خلى الأسعار تولع اليومين دول والنهاردة سجل عيار 21 2350 جنيه بدل من 2270 جنيه للجرام من يوم واحد بس يعني زيادة 80 جنيه في 24 ساعة .
والغريبة إنه الأسعار زايدة في مصر رغم إنها متراجعة في العالم وسجلت الأوقية 2055 دولار، وبحسبة بسيطة هتلاقي إن أسعار الدهب في مصر أزيد بحوالي 600 جنيه من سعر الجرام في العالم .
وطبعا إنتوا عارفين إن في حاجات كتيرة بتأثر في زيادة الفرق ده أهمها إن الدولار ليه سعرين في مصر يعني في السوق السودا الدولار مسجل 42 جنيه وفي السوق الرسمي والبنوك حوالي 31 جنيه.
لكن اللي لازم تعرفه إن التجار بيحسبوا سعر الدولار ف الصاغة على سعر السوق السودا مش السعر الرسمي
ولو بتسأل عن أسعار الدهب النهاردة فـ سوق الصاغة فهي كالتالي:
فوصل سعر جرام الذهب عيار 21 في مصر عند 2350 جنيه للجرام
كمان سجل سعر الجنيه الذهب 18800 جنيه.
وعندك عيار 24 سجل حوالي 2,651 ألف جنيه
و عيار 18 سجل حوالي 1,989 جنيه
طيب يا ترى إيه هو مصير الاسعار الفترة الجاية؟طبعا السؤال ده بيشغل ناس كتيرة خصوصا المقبلين على الزواج
وفي مصادر في شعبة الدهب أكدت إن توقعات الأسعار الفترة الجاية صعب جدا وده لأن في عوامل كتير زي ما قولنا بتتحكم في سعر الدهب في السوق المحلي منها حجم الاقبال وأسعار الدولار.
وأكدوا إنه اللي هيبيع الدهب الفترة دي كسبان ولكن الأفضل عدم البيع إلا في حالة الضرورة عشان يحقق مكسب على المدى البعيد.
اما أمير رزق، عضو شعبة الذهب، في تصريحات خاصة لـ«المصري اليوم»، كان ليه رأي تاني و قال فيها ان في توقعات بأن ترتفع أسعار الذهب خلال الفترة الجاية بعد عيد الفطر 2023 وقبله كمان بكام يوم، وده نتيجة انتعاش حركة العرض والطلب داخل سوق الصاغة المصرية.
انتوا بقا أخر مرة اشتريتوا دهب كان بكام و ايه هي توقعاتكم لأسعار الدهب ؟
