تتصاعد حالياً المخاوف من تأثير زيادة أسعار السولار على الاقتصاد والحياة اليومية للمواطنين، حيث قد يترتب على ذلك زيادة في أسعار السلع والخدمات بشكل عام. ومن الممكن أن تتأثر أيضاً العقارات بسبب زيادة تكاليف المواد الإنشائية، مثل الأسمنت والحديد، والتي قد ترفع تكلفة البناء والصيانة وبالتالي تنعكس على أسعار العقارات. فهل تشهد الأيام القادمة ارتفاع في سعر العقارات؟ تابعونا لمعرفة التفاصيل:
بعد زيادة أسعار المواد البترولية وخاصة السولار المصريين بيقلقوا من انه ممكن يحصل زيادات في بعض السلع، خاصة السلع والبضايع اللي بتحتاج نقل لمسافات طويلة .
واللي حصل إن لجنة التسعير التلقائي للمنتجات البترولية رفعت سعر السولار جنيه واحد للتر عشان يوصل سعر البيع فى السوق المحلى لـ 8.25 جنيه للتر، لكن في المقابل قررت تثبيت اسعار البنزين بأنواعه عند 8.75 جنيه للتر البنزين 80 و 10.25 جنيه للتر البنزين 92 و 11.50 جنيه للتر البنزين 95 .
وكمان قررت تثبيت سعر بيع طن المازوت لغير استخدامات الكهرباء والصناعات الغذائية عند 6000 جنيه للطن.
هل تتأثر أسعار العقارات بارتفاع سعر السولار؟
مصادر في قطاع الأسمنت، اتكلمت في تصريحات لـ موقع الأسبوع وقالت أن المستهلك المحلي متوقع إنه يتحمل زيادة حوالي 8% في أسعار النقل، طيب ليه؟
ببساطة زيادة سعر السولار، هترفع تكاليف نقل الطن لـ 50 جنيه بدل ما كانت 40 في الأول، وده لكل مسافة 40 كليو متر.
بس خد بالك اسعار الاسمنت على ارض المصنع لسة ثابتة متغيرتش، والزيادة هتبقى عند تجار التجزئة بس، وده بسبب زيادة تكاليف النقل واللي طبعا هيتحملها المستهلك زي ما قلنا.
الفرق بين سعر المصنع وسعر السوق
حسب المصادر، مصانع الأسمنت مش مسؤولة عن تحديد سعر طن الأسمنت برة المصنع ، لكن الغرف التجارية هي اللي في ايديها تحديد سعر بيع طن الأسمنت للمستهلك العادي، وعشان كده كل محافظة بيكون ليها سعر معين.
ولو بتسأل عن أسعار الأسمنت فـ المصادر قالت أن سعر طن أسمنت حلوان على أرض المصنع وصل لـ 1320 جنيه، لكن بيتم تداوله داخل السوق للمستهلك المحلي عند مستوى الـ2000 جنيه.
كمان وصل سعر تسليم طن الأسمنت على أرض مصنع النصر لـ 1330 جنيه، وبيتم تداول الطن عند 2010 جنيهات للمستهلك.وحسب موقع الاسبوع، سعر طن أسمنت السويدي وصل إلى 2060 جنيه.
وسعر طن أسمنت الممتاز عند 2055 جنيه.أما بقى سعر طن أسمنت السويس فوصل إلى 2040 جنيها.طيب هو ليه زيادة أسعار السولار لازم تأثر على أسعار السلع؟
بص يا سيدي هاني جنينة الخبير الاقتصادي والمحاضر في الجامعة الأمريكية، كان سبق واتكلم في تصريحات لمصراوي، وقال إنه المتوقع إن رفع أسعار البنزين والسولار تتسبب في ارتفاع مؤقت في معدل التضخم الشهري والسنوي، خاصة إن السولار هو الوقود الأساسي المستخدم في وسائل النقل التجارية وده اللي بيتسبب في زيادة تكلفة تداول المنتجات.
جنينة قال كمان إن الارتفاع في سعر الوقود ليه 3 نتايج على المدى القصير, أولهم تأثيره على التضخم واللي هنشوفه في ارتفاع سعر النقل، وكمان زيادة أسعار المنتجات والخدمات، واخر تأثير هو ارتفاع الرواتب واليوميات.
دلوقتي قولنا رأيك في ارتفاع أسعار السولار؟
