إن كان معك مبلغ من المال وتريد أن تستثمره، وتحافظ على قيمته، فلابد أن تفكر في الاستثمار في الذهب، وهذا لأنه أفضل استثمار آمن ولكن كيف يمكن أن تستثمر دون ان تخسر أي اموال ؟ تابعنا من خلال التقرير التالي سنكشف المفاجأة
كلنا دلوقتي بنواجه خطر التضخم وارتفاع الأسعار اللي بقي في كل حاجة تقريبًا، بس الأكيد إن الاستثمار في الدهب هيفضل أفضل طريقة للاستثمار عموما خاصة وأنه بيحافظ على الفلوس من خطر التضخم وارتفاع الأسعار.
وطبعا وأنت رايح تشتري دهب لازم يفرق معاك إذا كان الدهب ده مستعمل ولا كسر وده لأنك ممكن تضطر تبيع جزء منه فيما بعد لو احتاجت لأي فلوس:
وأكيد إنت مش هتكون حابب تخسر في الدهب ده، بالعكس كلنا لما بنشتري دهب بنستنى نكسب فيه مع مرور الوقت مش العكس.
طيب ياترى في خطورة لو اشتريت دهب كسر أو مستعمل وإيه الأفضل ؟في البداية لازم تعرف الفرق بين الدهب الكسر والمستعمل.
بص ياسيدي المستعمل بيكون دهب اشتراه التاجر من زبون تاني غيرك وبيبيعه مرة تانيه وبيكون هامش الربح فيه للتاجر قليل يعني في حدود من 5 لـ 10 جنيه.
ولازم وانت بتشتريه تتأكد جدا إن مفيهوش أي كسور وإن حالته كويسه والموديل مش قديم أوي وإنه يكون مفيهوش شوائب ولا متغير لونه من الركنة.
وخلي بالك عشان مفيش حد يضحك عليك الدهب المستعمل مش بيكون عليه ضريبة ولا دمغه وده لأن الحاجات دي بتتفرض على القطع الجديدة.
الجميل بقى انك لو اشتريت دهب مستعمل مش هتخسر لما تيجي تبيعه زي ما بيتقال عنه وده لأنك هتستفاد من سعر الجرام وأصلا مش هتكون دافع عليه ولا ضريبة ولا دمغة من الاساس وانت بتشتري، ده غير كمان إن مصنعيته أقل من الجديد بكتير.
وخلي بالك إنه أصلا في محلات بتكون مشهورة بـ بيع الذهب المستعمل بس طبعا لازم تتأكد من وجود سجل تجاري مع التاجر ويكون ثقة عشان تتجنب الغش والتزوير.
أما بقى الدهب الكسر بيكون فيه عيب ولو فكرت تشتريه انت هتشتريه على حالته عشان تكسب فيه بعدين
وده لأن تجار الدهب نصحوا المواطنين اللي عايزين يستثمروا في الدهب إنهم يشتروا الدهب الكسر وده لأنه بيختلف عن الدهب المستعمل وطبعا بيحتاج لعمليات تنضيف وتلميع من التاجر.
وده اللي أكده نادي نجيب سكرتير عام شعبة الذهب بغرفة القاهرة التجارية سابقا، ونصح المواطنين اللي عايزين يستثمروا فلوسهم في الدهب إنهم يبعدوا عن أي مشغولات ذهبيه مصنعيتها مرتفعة، وإنهم يدوروا على السبائك الخام أو الدهب المستعمل أو الكسر.
وتعتبر أهم ميزة فى شرا الدهب الكسر إنه بيكون أغلى بمبلغ بسيط عن سعر الجرام العادي، لكن ده بيكون مكسب التاجر وبعد فترة هتقدر تبيعه مرة تانيه وتستفيد بزيادة سعر الجرام.
أهم حاجة وانت رايح تشتري تاخد معاك حد ليه خبره في الدهب وتروح منطقة الصاغة لتاجر يكون مشهور بإنه آمين وعلى ثقة.
وخلي بالك الاستثمار في الدهب الكسر أو المستعمل مضمون جدا وده لأنه بيحافظ على فلوسك وبتقدر تحقق مكسب كويس وقت البيع.
دلوقتي قولنا لو معاك قرشين على جنب هتجيب بيهم دهب كسر ولا مستعمل ؟
