معاك قرشين شايلهم للزمن على جنب، وبتقول ياترى هيفضلوا زي ما هما ولا قيمتهم هتقل مع زيادة التضخم؟، وحابب تستثمرهم في حاجة تحافظ عليهم ومتضيعش وقتك ؟
دلوقتي هنقولك على استثمار آمن من البنك الأهلي يخليك تاخد 5500 جنيه في الشهر، خليك معانا في الفيديو ده وانت تعرف كل التفاصيل:
ناس كتيرة بعد ما عرفت بقرار وقف طرح شهادات الادخار من البنوك بدأت تقلق وتحتار وتسأل ياترى إيه البديل ولو عايزين نستثمر فلوسنا في حاجة مضمونة نروح فين.
واللي حصل إن بنوك القطاع الخاص في مصر، قررت توقف طرح شهادات الـ 22.5%، وده بعد أيام من وقف طرح شهادة الـ 25% في بنوك «الأهلي المصري ومصر والقاهرة».
والقرار ده كان قبله بكام يوم قرار البنك المركزي المصري بتثبيت سعر الفائدة على الإيداع عند 16.25%.وده فيما معناه إنه خلاص البنوك مكنتش محتاجه لطرح منتجات مصرفية بعائد عالي.
لكن المفاجأة بقى إنه رفع البنك المركزي المصري، بالنيابة عن وزارة المالية، سعر الفائدة على أذون الخزانة لـ أجل عام لـ 22.25% في آخر مزاد ليه، الأسبوع اللي فات
ولو انت عايز تعرف الفروق الموجودة في السوق دلوقتي؟، فـ أحب أٌقولك إن أسعار الفايدة اللي بتقدمها البنوك الأيام دي على الشهادات وصلت لـ 18%.
وطبعا في الحالة دي هيكون اختيار أذون الخزانة حل كويس جدا لكل اللي عايزين يستثمروا فلوسهم الفترة دي وده عشان هتديهم عائد مضمون بيتجاوز الـ 22%، وطبعا العائد ده حاليًا أفضل بكتير وأعلى من الشهادات الادخارية.
كيف تقدر تكسب 5500 جنيه من أذون الخزانة؟
هقولك ياسيدي البنك الأهلي المصري بيقدم للعملا ميزة كوسه جدا وهي إنه يقدروا ياخدوا العائد بشكل مقدم من أذون الخزانة المصري.
بمعني إنك لو قررت تستثمرفي أذون الخزانة المصرية هتقدر تاني يوم مباشرة من علمية الشرا دء إنك تقبض أول عائد بشرط واحد إن يكون الحد الأدنى لشراء أذون الخزانة 25 ألف جنيه ومضاعفاتها، وساعتها هتقدر تقبض عائد 5500 جنيه بمجرد ما تشتريها وهتكون مدتها عام واحد.
وتقدر بقى بالمبلغ ده تشتري دهب او تحطه في حساب توفير أو كمان تقدم على شهادة إدخار وتبقى استفادت بالفلوس مرتين.
وعندك بقى في إذون الخزانة المصرية اللي بيقدمها البنك الأهلي 4 أنواع مختلفة لمدة الأذون، منها أذون بتكون لـ3 شهور بس و6 شهور وفي 9 شهور وسنة كاملة، ومتقلقش لأن العائد بتاعك مش هيقل عن 21% وهيزيد عن 22.25% لكن خلي بالك وزارة المالية بتخصم 20% ضريبة على عائد أذون الخزانة المصرية.
وفي بنوك بتقدم العائد بشكل مقدم بعد ما تخصم الضريبة، وفي بنوك تانيه بتخصم الضريبة دي في نهاية مدة الاستحقاق ومنهم البنك الأهلي المصري.
ما الفرق بين الأذون والشهادات ؟
بص يا سيدي الأذون وسندات الخزانة شبه شهادات الادخار شوية لكن مدتها بتكون أطول وبتسهدف الدولة من طرحها جذب المستثمرين الأجانب وتدعيم الاحتياطي النقدي الأجنبي، وبتقدر الدولة تاخد منها ضرائب تساعدها وتدخل خزينة الدولة.
وطبعا كلنا عارفين إن مصر بتعاني من ارتفاعات في معدل التضخم الأساسي، واحنا شوفنا إنه ارتفع معدل التضخم واللي زاد عن 31% واللي يعتبر أعلى معدل مصر وصلتله من 5 سنين.
دلوقتي قولنا لو معاك فلوس تحب تشتري أذون الخزانة من البنك الأهلي؟
