أرز.. زيت.. فراخ.. لحمه، كل حاجه أسعارها ارتفعت، لكن هل تتخيلوا أن هذه أول مرة الأسعار تزيد على المصريين؟رؤساء مصر من أول جمال عبد الناصر حتى السيسي كيف تعاملوا مع ارتفاع الأسعار وكيف واجهوا الشعب ؟
خليكم معانا عشانا تعرفوا كل التفاصيل لان اللي قاله مبارك عن صندوق النقد مش هتصدقوه، تمر السنين وتتغير اسماء الرؤساء بس يفضل ارتفاع الأسعار مشكلة بتقابل كل رئيس عدى على مصر.
مثلا جمال عبد الناصر واجه الناس زمان واتكلم عن ارتفاع أسعار اللحمة وازاي الدولة اضطرت تختار بينها وبين بناء المصانع.
عشان كده قال في واحد من خطاباته للجمهور انا قولت اجيبلكم لحمة ولا أعمل مصانع، واخترنا المصانع، بس لما جت اللحمة غليت انتوا زمزقتوا شوية، هو انتوا جعتوا؟ ..
ده احنا كل اللي عملناه اننا بدل منجيبلكم لحمة 7 أيام هنبجيهالكم 4 أيام، واحنا اللحمة بتاعتنا مبتكفيناش، انتوا بتاكلوا لحمة من الإكوادور والصين والارجنتين واستراليا والسودان والصومال!
واللي متعرفوش بقى ان عبد الناصر كان محتاج فلوس لمشاريعه، وده اللي خلاه يجمع 1500 مليون جنيه على مدار 5 سنين طيب منين؟
عبد الناصر قال للشعب احنا لما خدنا ال1500 مليون في ال5 سنين، خدناها من جيوبكم هو انا هجيبها من جيبي انا معنديش، وعشان كده كان لازم تتعبوا شوية بس انتم الفترة اللي فاتت مااستحملتوش اوي.
ولو سبنا عبد الناصر ورحنا للسادات هنلاقيه وقف في واحد من خطاباته يكلم الكل وقالها صريحة: لو ارتفعت الأسعار المحافظ في محافظته هو المسؤول نمرة واحد، ولو حصل اي تلاعب في الأسعار ابعتلي.
بس كل دا كوم واللي قاله مبارك عن صندوق النقد كوم تاني!في التسعينات مصر كانت بتتفاوض مع الصندوق على قرض وطبعا كله بشروط.
وده اللي خلي مبارك يوصف صندوق النقد براجل عاوز يغرقك بأي طريقة عشان يفضل شغال معاك علطول وتفضل انت بقى تعمل إصلاحات في إصلاحات.
ومش بس كده، ده مبارك بيحكي انه كان في ساعتها انتخابات مجلس شعب فالصندوق يعمل ايه؟الكواليس كشفها مبارك.، وقال الصندوق طلب مني استنى الانتخابات تعدي وأخفض الجنيه 30% مرة واحدة من غير ماأقول لحد
وأنا رديت عليه وقولتله انا مبضحكش على حد، تخفض 30% دي معناها الأسعار تزيد 60-70%، فاضطر ازود مرتبات الموظفين ويا إما هفرض ضرايب أو اطبع ورق، وكده التضخم يزيد وندخل في دوامة، وتيجي تقولي تعال نعمل بقى برنامج إصلاح اقتصادي تاني.
عشان كده مبارك شايف إن صندوق النقد ميهموش الناس الغلابة ولا الناس المحدودة.
َوطبعا لما نسيب التاريخ ونرجع للحاضر انتوا شايفين الوضع شكله ايه، معدل التضخم ولأول مرة في تاريخ مصر عدى نسبة 40%
والحقيقة ان الرئيس السيسي، اعترف بأزمة الغلاء وقال إن الوعي لو مش موجود مكانتش الناس استحملت الظروف الصعبة والأسعار الغالية اللي بتمر بها مصر بقالها أكثر من سنة دلوقتي.
وقال الريس: أنا بعترف بده لأنه واقع بنعيشه، إحنا مش سببه صحيح، لكن في عبء كبير جدًا جدًا على كل أسرة وكل مواطن مصري نتيجة التكلفة العالية اللي إحنا بنعيش بيها.
طيب بس كده؟
لا، السيسي سبق ووجه كلامه للناس وقال لو عاوزين تسيطر ا على الأسعار، الحاجة اللي تغلى متشتروهاش.انتوا بقي رايكم إيه في اللي قاله كل رئيس عن ارتفاع الأسعار؟
