قلقان على أسعار الدولار الفترة القادمة، لا داعي للقلق وهذا ليس مجرد كلام، ولكنه توقعات مؤسسات تصنيف عالمية تحدثت عن مستقبل الجنيه والدولار وقالت كلام يهم كل المصريين الآن.تفاصيل مهمة سنتعرف عليها من خلال التقرير التالي:
كل الناس بتسأل ياترى إيه هو مستقبل الجنيه السنة دي، خاصة وإن مصريين كتير الفترة اللي فاتت اشتروا شهادات بالفلوس اللي معاهم وعندهم أمل إن الاقتصاد وضعه يتحسن عشان قيمة فلوسهم متقلش، والنهاردة الحكومة بتقولهم مايقلقوش حلاص.
وده لأنه في تصريحات مهمه لوزير المالية طمن المصريين بيها على مستقبل الاقتصاد وقال إن مؤسسة «ستاندرد آند بورز» المالية أبقت على التصنيف الائتماني لمصر بالعملتين المحلية والأجنبية عند مستوى «B» ، ومش بس كده دي كمان ادت مصر نظرة مستقبلية مستقرة للاقتصاد المصري للمرة الثانية خلال ثلاثة شهور.
ولو انت مش عارف فـ مؤسسة «ستاندرد آند بورز» بتعتبر واحدة من أهم مؤسسات تصنيف الاقتصاد العالمية واللي على أساس تقاريرها بيبدأ بيطمن المستثمريين اللي بيفكروا يدخلوا مثلا دولة زي مصر ويستثمروا فيها.
طيب الكلام ده معناه إيه؟هقولك ياسيدي، وزير المالية قال إن دي تعتبر شهادة ثقة دولية جديدة بتأكد إن الاقتصاد المصري بدأ يتعافى من كل الظروف العالمية والمحلية الاقتصادية الاستثنائية اللي واجهها الفترة اللي فاتت، زي مثلا كورونا والأزمة الروسية الأوكرانية.
وده معناه إن العالم كله شايف إن القرارات اللي أخدتها الحكومة المصرية والبنك المركزي ساعدت في استقرار الوضع الاقتصادي، وأن مستقبل اقتصادنا هيكون أحسن مع مرور الوقت.
ده كمان وزير المالية قال إن مصر دلوقتي بتنفذ برنامج إصلاح اقتصادي وطنى عشان تضمن استقرار الأوضاع الاقتصادية وتحافظ على سوق الصرف وده هيساعدنا نزود استثماراتنا، وهيدعم الجنيه الفترة الجاية.
والمفاجأة بقى إن مؤسسة ستاندرد آند بورز العالمية توقعت إنه خلال الـ3 سنين اللي جايين هيزيد معدل النمو الاقتصادي المصري وهيوصل ٤٪ سنويًا، وقالت إن في عوامل كتيرة هتساعد الاقتصاد المصري إنه يحقق ده.
منها نمو قطاعات البناء والتشييد والطاقة، وكمان النمو اللي هيحصل في قطاعات تكنولوجيا المعلومات والاتصالات، وتجارة الجملة والتجزئة، والصناعات التحويلية، والزراعة، والصحة.
والكلام ده كمان أكده أحمد كجوك نائب الوزير للسياسات المالية والتطوير المؤسسي، وقال إن مؤسسة «ستاندرد آند بورز» اتكلمت في تقريرها بشكل إيجابي، عن رغبة الحكومة في تشجيع وجذب القطاع الخاص وده طبعا عشان تزود حجم استثماراته وتواجده بالسوق المصري.
يعني الاقتصاد بتاعنا ماشي في الطريق صح؟ أيوة بالظبط كده وعشان كده مينفعش الناس تقلق وده لأن اللي بيطمن إن الموؤسسات العالمية شايفه إن مصر تقدر تحقق معدلات نمو كويسه ، خاصة وإنها تقدر تستغل الفرص الاستثمارية الكبيرة والهايلة اللي بيمتكلها الاقتصاد المصرى.
وده لأنهم شايفين إن برنامج الإصلاح الاقتصادى الوطنى اللي الحكومة بتنفذه الفترة دي قادر يجذب استثمارات خارجية ، مش بس كده دول كمان شايفين إننا قادرين نخفض الدين الحكومي بتاعنا لاغم الظروف الاقتصادية الصعبة اللي بنعيشها
قولنا رأيك في آداء الاقتصاد المصري، وهل إنت شايف فعلا إن الحكومة ماشية صح؟
