كل من يريد الاستثمار ومعه أموال، هل يضع أمواله في شهادات الاستثمار أم ينتظر حتى 30 مارس؟ وماذا سيحدث في هذا اليوم، وكيف سيؤثر على شهادات الاستثمار، وهل ممكن أن نري شهادات جديدة بفائدة أعلى؟
في الايام الاخيرة، أعلنت الحكومة عن ارتفاع معدل التضخم في مصر لأعلى مستوى ليه من 5 سنين، في نفس الوقت تاريخ استحقاق شهادة ال18٪ هيبدأ في النص التاني من مارس.
النقطتين دول بالذات مهمين جدا قبل اجتماع السياسة النقدية في البنك المركزي لتحديد سعر الفايدة في 30 مارس، والسؤال دلوقتي هل المركزي مضطر لرفع الفايدة ومن بعدها طرح شهادة ادخار بفايدة مرتفعة لمواجهة التضخم؟
هاني أبوالفتوح، الخبير المصرفي، بيتوقع رفع سعر الفايدة مابين 1 إلى 2% بالاجتماع الجاي.
وصحيح زيادة الفايدة بيرفع التكلفة على الموازنة العامة للدولة لانه بيزود الفايدة على القروض اللي بتاخدها الحكومة، بس برضه المركزي لازم يوازن بين النقطة دي وبين تآكل قيمة أموال المودعين بسسب التضخم، وكمان يحافظ على استمرار التدفقات الأجنبية في أذون الخزانة.
ومن وجهة نظره، استقرار الأسعار مش هيحصل قبل نص السنة ، وغالبا البنوك هتطرح شهادات ادخار مرتفعة العائد.
واتفق معاه محمد بدرة الخبير المصرفي، لما قال إن كل التوقعات بتأكد طرح بنكي الأهلي ومصر شهادات ادخار جديدة، عشان يمنع خروج السيولة الموجودة في شهادات الادخار بعائد 18% واللي عدت 750 مليار جنيه.
في الوقت نفسه خلال الأيام الأخيرة، اتكلمت مصادر عن دراسة بنكي الأهلي ومصر فعلا لطرح شهادات ادخار جديدة بالجنيه والدولار، خصوصا ان البنوك التانية بتقدم عوائد أعلى لأي حد عاوز يربط شهادة في الوقت الحالي.
أما بقى لو بتسأل سعر الفايدة عليها هيبقى كام؟
فالنقطة دي فيها اختلاف، بس الأكيد انها هتبقى اكتر من 18% حسب المحللين، وفي توقعات انها هتبقى 20%.
بس خد بالك في شهادات دلوقتي بفايدة 22.5% زي شهادة البنك العربي الأفريقي الدولي مدتها 18 شهر والفايدة عليها 22.5% في نهاية تاريخ الاستحقاق أو 20% لو العائد شهري.
وحتى لو بنتكلم عن شهادات ثلاثية مش استثنائية، هتلاقي بنك المشرق أعلن عن شهادة جديدة بحد أدنى للشراء 1000 جنيه، وبأسعار فايدة وصلت إلى 19% في حالة العائد السنوي.
ومن بعده شهادة بنك ابو ظبي التجاري، والفايده عليها: 18.50% للعائد السنوي، أو 15.5% للعائد اليومي، أو 17.75% للعائد ربع السنوي.
وده طبعا اعلى من اللشهاده البلاتينيه المتاحة خاليا في البنك الأهلي أو شهادة القمة، وسعر العائد عليهم 16% شهري, 16.25% ربع سنوي16.50% نصف سنوي, 17.25% سنوي.
وبكده يبقى من الأفضل انك تستنى تشوف البنك المركزي هيعمل ايه في اجتماعه الجاي وهيتصرف ازاي مع صرف ال 750 مليار جنيه حصيلة شهادة ال18%.
كمان شاركنا برأيك في تحركات البنك المركزي االفترة الجاية: هيرفع الفايدة فعلا؟ ولاهيفاجئنا للمرة التانية ويثبتها؟ وايه العائد اللي شايفيينه مناسب مع معدلات التضخم الحالية؟
