ازمه الدولار هتنتهي وهتبقى تاريخ.. هذا ما قاله الرئيس السيسي، لكن يظل السؤال المهم الذي نبحث له على إجابة:كيف؟ وما خطة الرئيس السيسي لحل الأزمة؟
في وقت الناس كلها قلقانة من تعويم جديد للجنيه، وتوقعات عدد من البنوك بوصول الدولار الى 40 جنيه، الريس طالع يطمن الكل ويأكد إن أزمة الدولار زيها زي غيرها من الأزمات اللي عدت على مصر وبكره تنتهي، فياترى إيه الخطة؟
السيسي سبق قال احنا عندنا فجوة دولارية بقيمة 30 مليار دولار كل سنة، وعشان نسدها محتاجين 100 مليار دولار استثمارات خلال 5 سنوات.وده ياخدنا لأهم مصادر الدولار في مصر وهي السياحة وقناة السويس وتحويلات المصريين في الخارج.
الدولة دلوقتي بتحاول تزود إيرادات كل المصادر دي، زي مثلا مبادرة استيراد السيارات للمصريين بالخارج، وتسهيل الحصول على الجنسية المصرية مقابل استثمارات أو عقارات أو ودائع بتبدأ من 250 ألف دولار، وكمان هيبقى في نظام جديد لمنح التأشيرات المتعددة للسياح بسعر 700 دولار..
وطبعا متنساش برنامج الطروحات الحكومية لبيع 32 شركة كمرحلة أولى، وهو ده بالذات اللي كانت المؤسسات العالمية بتراهن عليه لحل أزمة الدولار في وقت قريب.
عشان كده، لما الحكومة اتأخرت في تنفيذ البيع، البنوك العالمية خفضت من قيمة الجنيه، وتوقعت ارتفاع الدولار لمستويات محصلتش قبل كده.
وده ياخدنا للسؤال التاني واللي يهمنا كلنا: هل الحكومة عشان تعدي الأزمة هتيجي على حساب الدعم والمرتبات؟
لو تفتكروا الرئيس السيسي في 2021 قال إنه جه الوقت لزيادة تمن رغيف العيش، اصل مش معقول أدي 20 رغيف بتمن سيجارة، وصحيح الدولة مش هتبيعه بيغر التكلفة الحقيقي، لكن لازم سعره يزيد شوية.
كمان وزير التموين سبق واقترح تطبيق منظومة الدعم النقدي في العيش، لكن تطبيقها مرهون باستقرار معدلات التضخم وسعر الدولار.
ولغاية لوقتي لسة الحكومة بتبيع الرغيف ب5 قروش، ووزير المالية أكد اكتر من مرة ان دعم العيش مستمر وصندوق النقد مجبش سيرته من قريب أو بعيد.
ولو هنتكلم عن المرتبات، فالريس قال إن الواحد عشان يعرف يعيش محتاج 10 آلاف جنيه اقل حاجة، بس طبعا الدولة متقدرش تقدم الرقم ده بسبب الالتزامات الكتير اللي عليها، خصوصا انها شغالة على كل المحاور في نفس الوقت.
ومع الأزمة الروسية الأوكرانية، الحكومة زودت الحد الأدنى للمرتبات اكتر من مرة عشان يوصل إلى 3500 جنيه من اول مرتب أبريل 2023, كمان بتصرف علاوة استثنائية بقيمة 300 جنيه، وده غير زيادة جديدة لأصحاب المعاشات بنسبة 15% ، ولاصحاب تكافل وكرامة بنسبة 25%.
فهل تفتكروا احنا كده ماشيين كويس عشان نحل أزمة الدولار؟
