هل يعقل أن يصل سعر الدولار إلى 25 جنيه؟ الساعات القادمة ستحدد مصير الجنيه، ولكن من الضروري أن نعرف نية البنك الملاركزي وخطواته القادمة، وهل سيترك الجنيه ينهار امام الدولار؟ هذا ما نتعرف عليه من خلال التالي:
البنك المركزي بقيادة حسن عبد الله اعلن اعتماد سعر صرف مرن للجنيه، وقال في بيانه إن سعر صرف الجنيه المصري هيعكس قيمة العملة أمام العملات الأجنبية التانية حسب قوى العرض والطلب.
وفي لحظتها، سعر الدولار طلع في السما عشان يسجل أعلى سعر في تاريخه، ويقرب من مستوى 23 جنيه. بس برضه، بالنسبة لكتير مننا كلمة سعر صرف مرن للجنيه مش مفهومة، هل المقصود بيها تعويم ولا حاجة تانية؟
هاني جنينة، الخبير الاقتصادي، توقع التعويم الكامل لسعر صرف الجنيه المصري مقابل الدولار عشان يوصل سعره إلى 24 أو 25 جنيها للدولار.
ومن وجهة نظره، في احتمال باتفاق البنك المركزي مع صندوق النقد الدولي على تدخل محدود في سعر الصرف باستخدام جزء من الاحتياطي الأجنبي.
وحسب توقعاته قيمة مبلغ التدخل ممكن تبقى مليار دولار، وغالبا هيحصل تذبذب في سعر الصرف على مدار الجلسة.
على اي أساس يصل الدولار إلى 25 جنيه
توقعات الخبير الاقتصادي مبنية على أسعار الصرف الأخيرة في السوق الموازي، واللي تتراوح دلوقتي تتراوح بين 23 إلى 24 جنيه.، حسب كلامه.
ومع الاعلان عن تحرير سعر الصرف، توقع جنينه تسجيل الدولار لأعلى مستوياته، وبعدين هيسجل هبوط مع استلام الشريحة الاولي لمصر من صندوق النقد الدولي والمتوقع وصولها في منتصف نوفمبر الجاي.
وحسب الإعلان الرسمي للحكومة، مصر في انتظار قرض بقيمة 9 مليار دولار، منهم 3 مليار دولار من صندوق النقد الدولي، و5 مليار دولار من مؤسسات دولية، ومليار دولار من صندوق الاستدامة.
وقبل الإعلان رسميا عن قرض الصندوق النقد بساعات، البنك المركزي فاجئ المصريين باعتماد مرونة سعر الصرف. كمان رفع سعر الفايدة 2% لأول مرة من 5 شهور، والبنك الأهلي وبنك مصر طرحوا شهادة ادخارية بفائدة 3 سنوات وبسعر عائد يوصل إلى 17.25%، حسب دورية صرف العائد.
ودا كله عشان يقلل المضاربات على الدولار في السوق الموازي، ويمنع الصعود الكبير في سعر الدولار. وهنا اقترح طرح شهادات استثمار لمده سنة بأسعار فائدة مرتفعة، بس بشرط تكون متاحة للافراد اللي هيبيعوا الدولار اللى معاهم للبنوك.
انتم بقى توقعاتكم سعر الدولار هيوصل لكام؟ وهل ال9 مليار دولار كفايه عشان يحلوا ازمة البلد؟ طيب لو معاكم فلوس بتفكروا تشتروا بيها الشهادات الجديده في البنك الاهلي وبنك مصر بفايدة 17.25%؟ ولا هتستنوا يمكن البنك المركزي ينزل شهادات ثانيه بسعر فايده أعلى؟
