لا توجد قضية أصعب من قضية الطالب محمد عادل اللى أنهى حياة صديقته وحبيبته نيره أشرف، بسبب رفضها لحبها ليه، المتهم خلاص هيظهر بالبدلة الحمراء الأيام اللى جايه.
تفتكروا محمد عادل هيحصل معاه إيه يوم 9 فبراير اللى جاى؟.. وإيه المفاجأة اللى ممكن تحصل؟ .. كل ده هنعرفه مع بعض في التقرير التالي:
خلال الأيام اللى جاية مصير الطالب محمد عادل اللى أنهى حياه حبيبته نيرة أشرف قدام الجامعة وشهادة كل الخلق هايتحسم فيها، يا اما ياخد طريقة لعشماوي ويودعنا يا فيه مفاجأة ممكن تحصل في القضية، إيه هي المفاجأة ده اللى هنقوله ليكم بس تعالوا دلوقتى نشوف محمد هيلبس البدلة الحمراء أمتى.
يوم 9 فبراير اللى محكمة النقض هاتعقد أولى جلساتها للنظر في الطعن اللى قدمه المتهم محمد عادل على الحكم الصادر من محكمة جنايات المنصورة ضدة واللى هوا يروح لعشماوى عدل، بتهمة أنهاء حياة حبيبته نيرة أشرف واللى عمل الجريمة قدام جامعه المنصورة قدام كل الناس ولا همه حاجة.
ومن فترة تقريبا يوم 22 يونيو اللى فات، كان أمر المستشار حمادة الصاوى النائب العام المصري بإحالة المتهم محمد عادل إلى محكمة الجنايات، لمعاقبته في التهم اللى عليه وهي إنهاء حياه نيرة أشرف عمدا مع سبق الإصرار والترصد، باستخدام أداة جزارة أحنا مش عارفين نقول أسمها علشان الفيس بوك وكده، بس أنتم اكيد فاكرين هوا استخدم إيه يعنى.
المهم أن النيابة العامة وقتها أخدت الدلائل بتاعتها على المتهم وشهادة كام واحد من اللى كانوا موجودين وقت الواقعة ومنهم أفراد من أمن الجامعة وعمال بمحلات محيطة بالمكان، وكلهم أكدوا رؤيتهم للمتهم وقت ارتكاب الجريمة، وغيره كتير وكتير.
ومن ضمن الناس دى كام واحد حاول محمد عادل أنه يمشيه بعيد وكان بيلوش بالأداة اللى معاه ضدهم عشان يمشوا ومنهم زملاء ليه في الجامعه، واللى شهدوا بردوا في التحقيقات أنه كان بيحاول يقرب لنيرة اشرف أكتر من مره بدون رغبة منها، وهى مش عايزاه يعنى وبترفضه وهو مصمم يقرب، لدرجة أنه راح أكتر من مره لأهلها عشان يتقدم لخطبتها وهما يرفضوه، لأنها الله يرحمها ماكنتش عيزاه خالص.
وعلى فكرة لما أهلها كانو بيرفضوا مقابلته كان هو بتعرض ليهم ويقف قدامهم عشان يعنى يكشوا منه ويرجعوا في رأيهم، لحد ما حصل اللى حصل والمجرم ده عمل عملته.
المفاجأة بقى أن محمد عادل يوم 9 فبراير اللى جاى لو الطعن بتاعه انقبل فا هو مش هيروح لعشماوى دلوقتى، ويمكن يحصل في الأمور أمور، ولو ما اتقبلش المعلم هيروح لعشماوى عدل وبدون نقاش، وللعلم الناس كلها بتتمنى أنه ياخد جزاءه ويروح لعشماوى خصوصا بعد المنظر البشع اللى شافوه ده منه ضد نيرة الله يرحمها.
نسيت أقولكم، النيابة كمان أكدت أن قبل الواقعة بأيام حاول محمد التواصل مع نيرة أشرف عشان يعرف توقيت ركوبها العربية اللى هتوديها الجامعه، وهى وقتها رفضت تقوله، وده اللى خلى النيابه تقول أن المتهم كان نيته مبيته ضد نيرة الله يرحمها.
وأكد على الكلام ده صاحب الشركة مالكة العربية، واللى عرف من السواقين أن محمد بيتابعالمجني عليها دائما، وكمان شهد رئيس المباحث اللى عمل التحريات أنه كان فيه خلافات تطورت بين المجني عليها بسبب رفضها الارتباط به، وأنه دائم التعرض لها.
وبكده يكون مصير محمد عادل في الأغلب وأنه رايح لعشماوى، ومستبعد أنه يتقبل النقض بتاعه، مش بس كده ده في مطالب ان الحكم يتنفذ على الهواء قدام الناس.. اكتبوا لينا في التعليقات رأيكم هل مع أن الحكم يتنفذ على الهواء ولا لاء ؟
