كل واحد فينا دلوقتي بيدور على اللي يخصه، اللي له بضاعة في الجمارك مستنيها يتفرج عنها وتطلع، واحنا كمان مستنيين المعروض يزيد والاسعار تقل
واللي له عربية مستوردة ومتراكمة في الجمارك مش عارف يطلعها، بيسأل لو الشهر خلص ومطلعتش الدولة هتدهاله فعلا، ولا هتنفذ القانون وهترجع البلد اللي جات منها تاني، تعالى نطمنك على العربية، ونعرفك الحالات اللي فيها تقلق انها مش هتخرج من الجمرك.
في وسط ان البنك المركزي طلع قرارات جديدة، لسه الدولة عندها قرارات كتير مخدتهاش، وازمات متحلتش، زي ان المفروض نظام الاعتمادات المستندية لتمويل الواردات، هيتلغي بشكل كامل مع نهاية شهر ديسمبر.
ولسه لغاية دلوقتي مشكلة البضايع المتراكمة في الموانئ، متحلتش، ومفيش بضايع افرجوا عنها، وده مسبب قلة البضايع المعروضة في الاسواق من كل السلع، فبالتالي الموجود سعره غالي.
لا وكمان في مشكلة مخدناش بالنا منها، ان من ضمن البضايع دي، في عربيات 2022 متراكمة لسه مخرجتش، في الوقت اللي القانون المصري بيرفض فيه دخول عربيات في سنة غير سنة الموديل، يعني العربيات دي لو عدى عليها يوم 31 ديسمبر هتكون في سنة غير سنة صنعها، طب وايه الحل، كدا العربيات دي مش هتدخل السوق المصري، او هترجع تاني البلد المصدرة؟ .
وعشان القلق ده، نجوى زغمور رئيس الإدارة المركزية للسياسات والإجراءات بمصلحة الجمارك، ردت ووضحت ان القانون بيفرق بين العربيات اللي جاية من برا في سنة غير سنة صنعها، وبين العربيات اللي هي موجودة اصلا على ارض مصر بس لسة في المينا، بس متعطل خروجها لأي سبب.
يعني معنى كدا ان العربيات اللي متراكمة في الموانئ هتتعامل معاملة انها موجودة في مصر من قبل ما ينتهي عام الصنع، وبالتالي العربيات دي هيفرجوا عنها عادي في 2023.
لكن المشكلة الحقيقية هتبقى موجودة مع العربيات الموجودة لسه في المناطق الحرة، اللي متثبتش دخولها في البيان الجمركي قبل ما شهر ديسمبر يخلص، وللاسف العربيات دي هترجع البلد اللي جاية منها تاني.
ومؤخرا سمحت الدولة بتسهيلات أكبر في مبادرة استيراد للمصريين بالخارج بدون جمارك، زي إلغاء الشرط الخاص بإيداع قيمة الوديعة قبل التحويل بـ 3 أشهر على الأقل، مع الاكتفاء بتقديم كشف حساب بنكي للحساب المُحول منه المبلغ.
وكمان ألغت الدولة الشرط الخاص بالتصديق لدى وزارة الخارجية على الإقامة وكشف الحساب البنكي وشهادة بيانات السيارة.
وده حصل استجابة من الحكومة لطلبات المغتربين وخبراء السيارات بتعديل شروط المبادرة، عشان يحصل إقبال أكبر على التقديم فيها.
والمهم هنا ان طالما عربيتك دخلت المينا هي كده بقت في الأمان خلاص وهتوصلك هتوصلك، إنما لو لسة في المنطقة الحرة فدي لسة فيها كلام.
انتوا بقى تتوقعوا سوق السيارات في 2023 هيبقى ازاي؟ والأسعار هتزيد اكتر ولا هتقل؟
