رغم إن مجموعة النساجون الشرقيون قدرت إنها تحافظ إمبراطوريه صناعية ضخمة موجودة في حوالي 130 دولة على مستوى العالم، وده لأنها تمتلك حوالي 31 منشأة صناعية في مصر والصين وأمريكا، إلا إننا اتفاجئنا بخبر صادم بيقول إن ياسمين وفريدة محمد فريد خميس باعوا حصصهم في الشركة اللي بتقدر بمجموع 24.6% في الشركة لصالح شركة “FKY limited”.فما هي خلفيات هذا القرار وما مصير شركة النساجون الشرقيون؟ سنتعرف على كل هذا في التقرير التالي:
اللي حصل إنه أعلنت ياسمين محمد فريد خميس للبورصة المصرية في إفصاح رسمي إنها باعت نسبة 12.31% من حصتها في شركة النساجون الشرقيون بقيمة 687.7 مليون جنيه، وكمان باعت فريدة محمد خميس نسبة 12.31% من حصتها بالشركة بقيمة 687.7 مليون جنيه وبكده تكون حصتهم في المجموعة بعد تنفيذ الصفقة صفر.
سبب بيع النساجون الشرقيون
بحسب إفصاح الشركة للبورصة، وصل عدد الأسهم المباعة لحوالي 163.7 مليون سهم واللي بتتقدر قميمتهم بحوالي مليار و375 مليون جنيه ، واللي أكدت الشركة إن الصفقة بهدف إعادة هيكلة داخلية دون أي تغييرات في هيكل الملكية سواء للمساهمين الرئيسين أو المجموعات المرتبطة.
قالت كمان إن إعادة الهيكلة بتستهدف تعزيز قدرة شركات المجموعة على تنويع مصادر التمويل الدولية وخلق منصة استثماريه أكثر شمولًا.
وكانت اتوزعت حصص الراحل محمد فريد خميس بعد وفاتة على أولاده، وبلغت ملكية ابنه الوحيد محمد 142.2 مليون سهم تعادل 21.373% من رأس مال الشركة، وبعد منه بتيجي حصص اخواته فريدة وياسمين بحصة بلغت 81.871 مليون سهم واللي بتعادل 12.310% لفردية و 12.282% لياسمين، أما وزوجته “ميلو سلافا” فبلغت حصتها 35.3 مليون سهم تعادل 5.304%.
وكان المعروف بين الأوساط الاقتصادية إن ياسمين الابنة الكبرى كانت خير خلف لرجل الأعمال فريد خميس، واللي أدارات ببراعة الكيان الأم لاستثماراته وهي مجموعة النساجون الشرقيون للسجاد، بعدما كانت هي واختها أعضاءً بالمجلس
وتولت ياسمين فريد خميس قيادة مجموعة النساجون الشرقيون عقب وفاة والدها، وذلك في سبتمبر من العام 2020، وفعلا استمرت المجموعة في تحقيق النمو والربحية، وده على الرغم من الأزمات الكبيرة اللي شهدتها دول العالم خلال العامين الماضيين واللي في مقدمتها تداعيات جائحة كورونا، و تعطل سلاسل الإمداد، و حدوث الأزمة الروسية الأوكرانية واللي أثرت بشكل كبير على كافة اقتصاديات العالم
وقدرت تنجح النساجون في تحقيق مبيعات بلغت قيمتها 11.4 مليار جنيه خلال 2021 مقارنة بمبيعات بلغت حوالي 9.4 مليار جنيه خلال عام 2020، بزيادة نسبتها 17.5%.
وحافظت “ياسمين” على نفس التشكيل للمجلس واللي ضم شقيقتها فريدة، وابن عمها محمد محمود خميس، وحتى نفس الأعضاء المستقلين وده بخلاف ممثلين المساهمين الآخرين.
وبعد القرار ده طبعًا الدنيا اتقلبت وفورا هبط سهم شركة النساجون الشرقيون بنسبة 4.71% خلال تعاملات جلسة النهاردة ووصل 9.91 جنيه للسهم الواحد.
ولو انت مش عارف فتعتبر شركة النساجون الشرقيون إحدى أكبر مصنعي السجاد في العالم، واللي بتشتغل في سوق المفروشات الأرضية من أكتر من 30 سنة
وكان رجل الأعمال الراحل محمد فريد خميس بيشغل مناصب كتيرة، وده طبعا بحكم تنوع نشاط استثماراته، ولأنه كان كمان حريص على المساهمة في العمل الخيرى والاجتماعي، ومشي ابنتيه ياسمين وفريدة على نفس خطى والدهم، عشان يحيوا ذكراه والتمسك بنفس المناصب.
قولنا رأيك في تصرف بنات محمد فريد خميس ؟
