انسى الأرز ابو 18 جنيه، من اليوم سيكون هناك أسعار جديدة وليس في الأرز فقط ولكن في العديد من السلع حتى كرتوة البيض التي وصل سعرها إلى 160 جنييه.
للأسف رمضان السنة دي جاي في وقت صعب والكل بيسأل الأسعار رايحة على فين؟ وإيه المطلوب عشان ترخص؟ وهل الحكومة عندها خطة لضبط السوق؟ طيب والتجار والمنتجين شايفين الوضع ازاي؟خليكوا معانا عشان تعرفوا كل التفاصيل وتشتروا منين بأرخص الأسعار؟
خلال الساعات الأخيرة ، كله بيتكلم عن الرز، سواء بقى الناس اللي مش لاقياه اصلا، أو الناس اللي لقياه بس بأسعار عالية.
وهنا رجب شحاتة رئيس شعبة الرز، حب يطمن الناس، وقالهم الحكومة والقطاع الخاص هيستوردوا كميات كبيرة و سعر الكيلو هيبدأ من 20 ل25 جنيه.
والناس على السوشيال ميديا ابتدت تسأل: هو 25 جنيه ده رقم يطمن؟ اهو نقيبب الفلاحين طلع يقول انه لو فضلنا على الوضع الحالي، هنلاقي سعر كيلو الأرز ب30 جنيه، ايوة 30 جنيه بسبب ارتفاع الطلب قبل رمضان وكمان إلغاء التسعيرة الجبرية للارز.
بص بقى على الفراخ والبيض هتلاقي كيلو الفراخ دلوقتي مابين 80 إلى 90 جنيه، وطبق البيض عدى ال100 جنيه من بدري.
وصحيح الحكومة هتستورد فراخ مجمدة عشان توازن السوق وسعرها هيبقى اقل من الفراخ المحلية ب25 جنيه، لكن ثروت الزيني، نائب رئيس اتحاد منتجي الدواجن قال إن الفراخ المستوردة مش كفاية عشان تحل أزمة الأسواق، طيب إيه الحل؟
الزيني قال مفيش غير حل واحد: نوفر الاعلاف بكميات كبيرة ومستدامة وبأسعار مناسبة عشان صغار المربين اللي خرجوا من السوق يرجعوا تاني والانتاج يزيد فالمعروض في السوق كمان يزيد وتقل الأسعار.
ولما سألوه من كام اسبوع: ممكن كرتونة البيض توصل إلى 200 جنيه على رمضان؟
قال لأ، صحيح احنا في أزمة محدش يقدر ينكرها لكن الكرتونة آخرها 150, 160 جنيه، لو استمر ارتفاع الأسعار على المعدل الحالي.
وبما اننا داخلين على رمضان مينفعش منتكلمش عن اللحمة اللي وصل سعرها ل250 جنيه واكتر كمان في بعض المناطق.
وبرضه المشكلة الأساسية في ارتفاع أسعار الاعلاف، لدرجة إن مساعد وزير التموين، ابراهيم عشماوي، كشف عن لجوء مجموعة من المربين لاستخدام الرز كبديل للعلف لان سعره أرخص.
وطبعا ده رفع الطلب على الرز وزود سعره، خصوصا ان في تجار بيضاربوا في الرز ولا كأنه زي الدولار.
وتسيب بقى السلع الأساسية وتدخل على ياميش رمضان هتتفاجئ بأسعار خيالية، الأسعار زادت من 30 إلى 60٪ واللي كان بيشتري 3 كيلو من صنف واحد دلوقتي هيشتري كيلو واحد بس.
ده اللي قالته شعبة العطارة لما رصدت أسعار الياميش في السوق السنة دي، كيلو البندق واللوز بين 250 و260 جنيه مقابل 200 و220 جنيه السنة اللي فاتت.
وسعر كيلو القراصية ارتفع إلى 230 جنيه مقابل 140 جنيه، والمشمية ب380 جنيه مقابل 220 جنيه.
وسعر كيلو الزبيب المستورد ب 120 جنيه مقابل 90 جنيه، أما أسعار كيلو البلح بين 20 جنيه و100 جنيه، بحسب النوع.
وطبيعي لما تسمع الأرقام دي تسأل نفسك: هي كده خلاص قفلت من كل ناحية؟
معارض ومنافذ الحكومة هي البديل، زي مثلا معارض اهلا رمضان اللي بتبيع إزازة الزيت ب35 جنيه، وكيلو الرز ب14, ومنافذ امان اللي بتبيع كيلو اللحمة ب170 جنيه.
كمان في أمل باستقرار الأسعار لما الرز والفراخ المستوردة ينزلوا السوق، وضيف علي كده تأثير طرح الزيت الروسي على أسعار باقي الأصناف.
فقوللنا بقي هل جربتوا تشتروا من معارض الحكومة ولا لأ؟ وإيه اكتر سلعة حسيتوا بارتفاع سعرها في الشهور الأخيرة؟ وهل في سلعة معينة دورتوا على بديل ليها أو بطلتوا تجيبوها خالص؟ شاركونا في التعليقات.
