كل يوم والثاني الحكومة تفكر في حل جديد لأزمة الفراخ وأسعارها التي تزيد بشكل جنوني، وآخر هذه الحلول كان استيراد فراخ مجمدة وتوفيرها في السوق بأسعار أقل من الفراخ البلدي.
بس المرة دي الحل جاي للحكومة لحد عندها.. لما المسيحيين يبتدوا الصيام.. وساعتها الطلب هيقل على الفراخ.
يا ترى صيام الأقباط في مصر هيكون له دور في تراجع أسعار الفراخ في الأسواق؟ وازاي الحكومة ممكن تستغل الفترة دي؟ كل ده وأكتر سنعرفه من خلال التقرير التالي:
زيادة الطلب
في البداية وعشان نبقى فاهمين، زيادة الاستهلاك وارتفاع الطلب على أي سلعة بيزود سعرها في السوق.. وكذلك العكس، لو الناس بطلت تشتري سلعة معينة، على طول تلاقي سعرها نزل.
والفترة اللي جاية، المسيحيين في مصر هيبتدوا “الصوم الكبير” وبيستمر لمدة 55 يوم، والمفروض خلال الـ 55 يوم دول مش هياكلوا فراخ يعني الطلب على الفراخ هيقل، والمنطقي أن السعر يستقر في الأسواق، و دلوقتي تعالوا نشوف المسؤولين قالوا أيه عن الموضوع ده.
نسبة ضئيلة
الدكتور عبد العزيز السيد، رئيس شعبة الدواجن في الغرفة التجارية بالقاهرة، قال إنه من المتوقع أن أسعار الدواجن ومشتقاتها تنخفض في الفترة الجاية ولكن بنسبة قليلة جدا خصوصا مع بداية صيام المسيحيين.
وقال كمان إن نسبة الانخفاض هتكون قليلة رغم التراجع على الطلب، والسبب في كده أن لسه أزمات صناعة الدواجن نفسها مستمرة.
أسعار الأعلاف
وقال كمان إن أسعار مستلزمات الإنتاج وأسعار العلف لسه عالية.. ده غير إن في انخفاض كبير في معدلات إنتاج الفراخ بسبب خروج عدد كبير من المنتجين من السوق.
وعن احتمال نهاية الأزمة قبل شهر رمضان الكريم، قال إن الخروج من الأزمة مش هيكون بقرارات إعفاء المزارع أو استيراد الفراخ من الخارج وبس.
وأكد على أهمية أن يكون في دعم لصناعة الدواجن لأنها صناعة زي أي صناعة.. وتعتبر صناعة استراتيجية ومهمة جدا.. ويكون في توفير للأعلاف ومراقبة بشكل مستمر على السوق.
وأن الاعتماد على انخفاض الطلب من فئة معينة من الشعب لفترة معينة عمره ما هيكون الحل النهائي للأزمة.
خروج المربين من السوق
أما الدكتور ثروت الزيني، نائب رئيس الاتحاد العام لمنتجي الدواجن، قال إن أسعار الدواجن في مصر لسه متأثرة من أزمة الأعلاف اللي شوفناها في الفترة اللي فاتت.
وقال إن في جزء كبير من المربين خرج من عملية تربية الفراخ في مصر.. ونسبة اللي خرجوا من السوق حوالي 45% والرقم ده كبير جدا.. وعشان كدا أسعار الفراخ كل يوم بتزيد.
الفراخ المجمدة
“الزيني” قال كمان إن الدولة لجأت لموضوع استيراد الفراخ المجمدة.. لكن مهم جدا نحافظ على المنتج الوطني.. وصيام الأقباط مش هيكون مؤثر في أسعار الفراخ نهائيا سواء بالسلب أو بالإيجاب.
وقال إن الحل لاستقرار أسعار الفراخ وأنها ترجع زي زمان.. إذا استمرت عمليات الإفراج عن الأعلاف.. لأن دي أكتر حاجة ممكن تشجع المربين أنهم يرجعوا للسوق من جديد.
وقال إن تراجع أسعار الدواجن مش هيحصل إلا بوفرة الإنتاج وزيادة المعروض في الأسواق.. ده غير أن في عامل خارجي له تأثير في عملية الأسعار.. وهو ارتفاع سعر الدولار مقابل الجنيه.
