الآن سعر الفايدة في أمريكا يسجل أعلى مستوى له من 22 سنة، وهذا يحدث بعد قرار الفيدرالي الأمريكي برفع سعر الفائدة بنسبة 0.25% خلال الساعات الأخيرة.
وطبعا أي قرار بتطلعه أمريكا بيأثر على العالم كله، وخصوصا سعر الدهب والدولار، فياتري ايه اللي هيحصل في سعر الدهب والدولار عالميا وكمان في مصر؟
من بداية الأزمة الاقتصادية في 2022 وأسعار السلع فى كل حتة زادت مرة واتنين وتلاتة ة، وده اللي رفع معدل التضخم في أغلب دول العالم، عشان كده البنوك المركزية في كل حتة اختارت ترفع سعر الفايدة لمواجهة التضخم، وده كله بقيادة مين؟
ايوة انت فكرت صح: بقيادة الفيدرالي الأمريكي اللي على غير العادة بدأ مسلسل رفع أسعار الفايدة على الدولار علشان تسجل 5.5% وده أعلى مستوى ليها من 22 سنة.
ولو متعرفش فالعلاقة بين الدهب والفايدة على الدولاور طول عمرها عكس بعض، يعني لو الفايدة في أمريكا قلت: سعر الدهب بيزيد.
والعكس صحيح، لو سعر الفايدة زاد: سعر الدهب بيقل، فهل ده اللي هيحصل المرة دي؟
وائل النحاس الخبير الاقتصادي شايف إن الأيام الجاية احتمال كبير نشوف ارتفاع في قيمة الدولار مع انخفاض في سعر الدهب على المستوى العالمي.
بس خد بالك استمرار ده مرهون براجل واحد بس وهو رئيس الفيدرالي الأمريكي جيروم باول، اللي لازم تركز مع كلمة بيقولها، طيب ليه؟
لان تصريحاته تعتبر مؤشر على اللي ناوي الفيدرالي الأمريكي عليه خلال اجتماعات الباقية في 2023، وهنا بقى مربط الفرس:
“بأول” بعد الإعلان عن رفع الفايدة، قال إن الطريق لتقليل معدل التضخم إلى 2% زي ما أمريكا متعودة، لسة محتاجة وقت أطول.
وتقدر تقول كده ان ده تلميح بإن الفيدرالي الأمريكي ممكن يستمر في رفع الفايدة في اجتماعاته الجاية، وطبعا ده لو حصل، هيتسبب في انخفاض بسعر الدهب.
لكن لو حصل العكس والفيدرالي الأمريكي مرفعش الفايدة وكمان خفضها، التوقعات هتختلف تماما، لأن ساعتها وحسب بنك جي بي مورجان سعر الدهب هيعدي 2000 دولار للأونصة بنهاية 2023، وهو دلوقتي فوق ال1900 دولار.
بس هنا بقى لازم تاخد بالك من حاجة، سعر الدهب في مصر مش بس مرتبط بسعر الدهب في مصر، لأ ده كمان مرتبط بسعر الدولار في السوق الموازي.
وده مش كلامنا، ده كلام نادى نجيب سكرتير شعبة المعادن النفيسة فى الغرفة التجارية بالقاهرة سابقا، لما قال إن التجار بيحسبوا السعر من خلال عملية حسابية بضرب السعر العالمى فى سعر الدولار بالسوق السوداء وعلى أساس كده بيتم تحديد الأسعار، وده حسب اليوم السابع.
وده بالنسبة للدهب، أما بقى لو هنتكلم عن الدولار، فعادة رفع الفايدة في أمريكا بيرفع من سعر الدولار أمام باقي العملات.
والوضع عندنا في مصر يعتبر خاص شوية، لأن زي ماكلنا عارفين عندنا سعرين للدولار واحد في البنك بسعره 30 جنيه و90 قرش تقريبا، وسعر في السوق الموازي وصل إلى 38.5 جنيه حسب موقع مصرواي.
ودلوقتي الحكومة شغالة على زيادة موارد البلد من الدولار، وكمان البنوك طرحت شهادة دولارية، فهل تتوقع إن الاجراءات دي هتقلل من سعر الدولار في السوق السودة ولا ليك رأي تاني؟
