تريد أن تشتري سيارة؟ ادفع بالدولار واستلم المفتاح!.بسبب هذه الجملة حصل جدل كبير جدا على السوشيال ميديا خلال الساعات الاخيره والبطل فيه ماركه السيارات الشهيره تويوتا.
وطبعا كلام زي ده ما يعديش بالساهل، انت متخيل يعني ايه البيع والشرا جوة البلد يبقى بالدولار؟ يعني قول على الجنيه يا رحمن يا رحيم.
فهل فعلا المعلومه دي صح؟ وفعلا شركه تويوتا بتشترط بيع عربياتها الجديدة بالدولار؟ وايه سبب اللخبطة دي كلها؟
خلينا نقول في البدايه ان سوق السيارات في مصر من اكثر الاسواق اللي اتأثرت بأزمة الدولار، وده لأن معظم السيارات بيتم استيرادها من الخارج.
والفكرة ان كل فتره والتانية بتظهر مشكلة ما بين أصحاب الشركات والمعارض من ناحية، والزباين من ناحيه تانية.
وهو ده اللي حصل بالظبط في الكام ساعه اللي فاتوا، بعد ما انتشر كلام بان شركه تويوتا أجبرت الحاجزبن على دفع تمن عربياتهم بالدولار.
وطبعا الدنيا اتقلبت، لأن استخدام الدولار في البيع والشراء لو حقيقي هيكون ضربة جديدة للجنيه، فهل الكلام ده صح؟
الحقيقية ان الإجابة لا هي ايوة ولا هي لأ، بس إزاي؟
بص ياسيدي، منتصر زيتون، عضو مجلس إدارة الشعبة العامة للسيارات بالاتحاد العام للغرف التجارية، وضح التفاصيل وقال إن القانون في مصر بيمنع بيع السلع داخل مصر بالعملات الأجنبية سواء بقى كانت دولار أو عملة تانية غير الجنيه.
عشان كده مفيش حد يقدر يعلن عن البيع بالدولار لأن دي مخالفه قانونية يعاقب عليها القانون، بس الكلام لسة مخلصش لأن ده هيبقى صح لو هتشتري من معارض السيارات جوة السوق المصري نفسه.
ولو بصيت على أحدث قايمة بأسعار سيارات تويوتا مصر والصادرة بتاريخ 13 يوليو اللي احنا فيه هتلاقي ان الأسعار نازلة بالجنيه المصر دي.
إنما بقى لو هتشتري من المنطقة الحرة، ساعتها الكلام يختلف وحسب زيتون خلال تصريحاته للقاهرة 24، بيع سيارات تويوتا بالدولار الأمريكي مسموح بس في المنطقة الحرة.
وأيوة زي مافهمت: المناطق الحرة الوحيدة اللي الدولة بتسمح فيها بالتعامل بالدولار في البيع، لأن القانون بيعاملها معاملة المناطق الأجنبية بمصر.
وفي تصريحات سابقة لموقع فيتو. قال عضو مجلس الشعبة العامة للسيارات، إن عدد من وكلاء السيارات اتجهوا لبيع السيارات من المناطق الحرة في محاولة لتحقيق بعض المكاسب وتعويض الخساير.
والفكرة ومافيها ان الزبون بيمضي عقد مع الوكيل، ويحوله الفلوس بالدولار من خلال البنك، وبعدين بيعملوا توكيل للمستخلص لاستلام السيارة في المنطقة الحرة أو في الميناء.
وحسب رصد منتصر زيتون للسوق، مبيعات المناطق الحرة وصلت إلى 35% من مبيعات السوق، ومن طرازات 2023، وده لغاية آخر أبريل اللي فات، لكن الوضع العام واقف ومفيش بيع بسبب الأسعار المرتفعة.
وعلى فكره مجموعه ابوغالي موتورز وكيل عربيات جيلي الصينية في مصر سبق وأعلنت انها هتبيع عربية GX3 Pro بالدولار والتسليم في المنطقه الحرة، حسب موقع مصرواي.
ودلوقتي قوللنا بقى شايفين إيه تأثير حركة زي ده على سوق السيارات في مصر؟ وهل هيرفع الأسعار زيادة؟ طيب لو انت محتاج عربية لسة عندك نية تشتري ولا خلاص صرفت نظر مع جنون الأسعار؟
