أسعار السجاير ارتفعت جدا الفترة الأخيرة وأيضا لم تصبح موجودة في السوق، لذلك ظهر كلام عن اتجاهنا لاستيراد السجائر من الخارج من أجل زيادة المعروض الذي يساعد في تخفيض الأسعار.
بس ياترا إيه حقيقة الكلام ده؟ وهل هنستورد السجاير من بره؟ وليه مصر مش بتزرع التبغ؟ وإيه هي الدول اللي بنستورد منها؟
الأيام الأخيرة انتشر كلام باتجاه الدولة لاستيراد السجاير عشان نزود المعروض ونخفض أسعارها وده بعد ما ارتفعت بشكل كبير جدا ونقصت في السوق لدرجة إن مبقاش حد عارف يشتريها الفترة اللي فاتت وظهرت السوق السودة للسجاير
عشان كده شعبة الدخان طلعت ووضحت حقيقة الكلام اللي اتقال، بس يا ترا هي قالت إيه؟
بص يا سيدي، بحسب تصريحات إبراهيم إمبابي، رئيس شعبة الدخان والسجاير باتحاد الصناعات، لموقع صدى البلد: السوق المصري مش في حاجة لاستيراد السجاير كمنتج نهائي وده لأننا عندنا اكتفاء ذاتي من الإنتاج
وقال إن مصر مش منتجة للتبغ وده اللي بنستورده من بره عشان مش بيتزرع هنا، ده إلى جانب بعض مستلزمات الإنتاج والخامات، لكن المنتج النهائي بيتم تصنيعه في المصانع جوة مصر.
ومش بس كده ده قال كمان إن مصر عندها اكتفاء ذاتي من السجاير وده لأن عندنا 53 مصنع للدخان شغالين وبينتجوا 4 مليار علبة سجاير سنويًا يعني بمعدل 83 مليار سجارة كل سنة، وده عشان نلبي احتياجات المستهلك
ولما اتسأل إيه سبب ارتفاع أسعار السجاير طالما محققين اكتفاء ذاتي من تصينعها؟
رد وقال، إن الزيادة دي ناتجة بسب جشع التجار مش الشركات، عشان كده لازم المستهلك يتأكد من سعر العلبة قبل ما يشتريها وده من خلال الباركود اللي عليها، وطلب من أي مواطن إنه يمتنع عن الشرا وكمان يبلغ عن أي تاجر يبيع بسعر أعلى من السعر الحقيقي
وبحسب تصريحات سابقة لـ إبراهيم إمبابي لليوم السابع، عن إمكانية زراعة التبغ هنا في مصر، إن الاستيراد أفضل بكتير من زراعته، وده لأنه حتى لو تم زراعته فنوع واحد بس اللي هنقدر نزرعه أما باقي الأنواع فهنستوردها من بره وده بسبب البيئة المناخية لأنه التبغ بيحتاج لبيئة باردة عشان ينمو فيها، يعني الزراعة مش هتمنع الاستيراد
وكمل وقال إن من ضمن أسباب عدم زراعة التبغ في مصر هو ارتفاع الضرايب وجمارك التبغ عليه ده بجانب عدم ملائمة المناخ المصري إلا لنوع واحد بس من بين عشرات الأصناف
استيراد التبغ
شوف يا سيدي، حسب موقع اليوم السابع، في 5 دول، العالم كله بيعتمد عليها في إنتاج التبغ أولهم الصين اللي بتعبتر أكبر منتج للتبغ في العالم وده لأنها بتنتج أكتر من 2 مليون و800 ألف طن تقريبا من التبغ كل سنة
بعدها بتيجي الهند اللي بتنتج تقريبا 761 ألف طن سنويا، وعلى الفكرة الصين و الهند بينتجوا هما الاتنين 50% من الانتاج العالمي للتبغ
بعدهم بتيجي البرازيل برصيد 675 ألف طن سنويا، وفي المرتبة اللي بعدها الولايات المتحدة بإنتاج 285 ألف طن سنويا، وبعدهم بقى أندونيسيا ودي بتنتج 196 ألف طن سنويا
ودلوقتي قولنا شايف إن استيراد السجاير هيقضى على غلاء أسعارها؟
