مفاجأة بشأن سعر البنزين وهل ترفع الحكومة الأسعار قريبا؟

ياترى ممكن نرى زيادة جديدة لأسعار البنزين الفترة القادمة؟ وماذا سيحدث في اجتماع لجنة التسعير التلقائي للمنتجات البترولية وياترى ما سر التوقعات بحدوث زيادات في الأسعار؟ وهل هذا سيؤثر على أسعار السلع؟

خبراء الاقتصاد توقعوا إن لجنة التسعير التلقائي للمنتجات البترولية هترفع أسعار البنزين في اجتماعها المنتظر الفترة الجاية مع تثبيت أسعار السولار. طيب في البداية كده هو ليه لازم يحصل زيادة أو خفض في أسعار البترول ؟

بص ياسيدي المفترض إنه لجنة التسعير التلقائي للمواد البترولية بتعمل إجتماع كل 3 أشهر بيكونوا في الأسبوع الأول من الشهور دي يناير وأبريل ويوليو وأكتوبر من كل عام وده عشان تحدد مصير أسعار الوقود

وبتراجع الحكومة أسعار المواد البترولية كل 3 أشهر من خلال اللجنة اللي تم تشكيلها بقرار من رئيس الوزراء فـ يوليو 2019، وده طبعا بيتم حسب تطورات الأسعار العالمية للبترول ومتوسط سعر خام برنت، وسعر صرف الجنيه مقابل الدولار، بشرط إنه متتجاوزش نسبة الزيادة أو الخفض 10% كحد أقصى.

ولو انتوا فاكرين فـ يوم 4 مايو اللي فات أعلنت اللجنه رفع سعر السولار جنيه واحد وتثبيت أسعار البنزين بأنواعه والمازوت لغير استخدامات الكهرباء والصناعات الغذائية ، وده حسب اللي اعلنته وزارة البترول في بيان رسمي ليها

وبعد قرار اللجنه سجل سعر لتر السولار 8.25 جنيه، ووصل سعر لتر بنزين 80 لـ 8.75 جنيه، ولتر بنزين 92 لـ 10.25 جنيه، ولتر بنزين 95 لـ 11.50 جنيه.

ودي مكنتش أول مرة ترفع فيها اللجنة أسعار البنزين في 2023، وده لأنها قررت ترفع أسعار البنزين في مارس بين 75 قرشا وجنيه للتر الواحد.

مصير الأسعار الفترة القادمة

حسب تصريجات مدحت يوسف نائب رئيس هيئة البترول الأسبق، لـ موقع مصراوي فتوقع إنه يحصل زيادة طفيفة لأسعار البنزين 92 و95 وتثبيت أسعار السولار .

لكن مدحت يوسف مستبعدش خيار تثبيت أسعار البنزين لكن قال إن ده لو حصل هيكون “مراعاة لموجة الغلاء” الحالية في مصر.

وقال مدحت يوسف، إنه رغم رفع الحكومة أسعار السولار والبنزين في 2023 فـ أسعار التكلفة أكتر بكتير من الأسعار المحلية، وده بعد الارتفاع الكبير في سعر الدولار مقابل الجنيه من مارس 2022.

كمان كان شايف أنه رغم الانخفاض الطفيف فـ أسعار البنزين والسولار عالميا المرتبطين سعريا بأسعار خام برنت القياسي
لكن حسب كلامه الأوضاع الحالية بتجبرنا اقتصاديا إننا نطبق الحد الأقصى للزيادة محليا وهي 10%.

و قال إننا لو هنحسبها اجتماعيا وعشان مراعاة الظروف الاقتصادية الصعبة اللي بيمر بيها المواطنين ومنها ارتفاع الأسعار فـ من المتوقع إنه يحصل تثبيت لأسعار السولار واللي بيرتبط أكتر بتكلفة نقل السلع والمواصلات.

واتفق معاه في الكلام ده هاني جنينة الخبير الاقتصادي والمحاضر في الجامعة الأمريكية، وتوقع بردو إنه يتم رفع أسعار البنزين بحد أقصى 50 قرش للتر، مع تثبيت أسعار السولار.

وفي تصريحاته لموقع مصراوي قال جنينة إنه بيتوقع رفع أسعار البنزين بسبب تحركات سعر الصرف خلال آخر 16 شهر فاتوا، كمان قال أن سعر البنزين في مصر أقل من سعره العالمي حتى مع تراجع سعر البترول عالميا

انتوا بقى قولولنا توقعاتكم للي هيحصل الفترة الجاية وهل شايفين أسعار البنزين هتزيد الفترة الجاية؟