هل اقترب موعد التعويم؟ هذا السؤال يسأله المصريين الآن بعد إعلان البنك الأهلي عن طرح شهادات جديدة لأن دائما ما يأتي في ذهنهم بعد الإعلان عن أي شهادة جديدة ان التعويم قادم، خصوصا أن هذا يأتي قبل ايام قليلة جدا من اجتماع البنك المركزي
عشان كده في سؤال منتشر على السوشيال ميديا: هو في تعويم جاي ولا لا؟ ولا العكي هيحصل والشهادات دي ممكن تقضي على السوق السودا؟ وهل ممكن تحل ازمة الدولار؟
البنك الأهلي أعلن خلال الساعات الأخيرة عن طرح شهادات دولارية جديدة، وطبعا زي ما طرح الشهادات دي بيفرح ناس كتير بسبب العائد بتاعها المرتفع، إلا أنه بيقلق ناس أكتر وده لأنهم دايما بيربطوا طرح الشهادات الجديدة بتعويم الجنيه
هل طرح الشهادات الدولارية تمهيد لتعويم الجنيه
بص ياسيدي، الدكتور محمد بدرة الخبير الاقتصادي قالنا، إن طرح الشهادات الدولارية مش بداية لتعويم جديد ولا حاجة، بالعكس هي هتزود الحصيلة الدولارية للبلد من المصريين العاملين بالخارج، وقال كمان إن ده إجراء ذكي جدا من البنوك ومن الجهاز المصرفي لاستقبال مدخرات المصريين بالخارج.
مش بس كده ده قال كمان إن الفايدة دي تعتبر أعلى فايدة موجودة في الأسواق لأن بره مصر سعر الفايدة بتكون من 2.5 لـ 3% بس أما فايدة الشهادات دي فالعائد بتاعها 7% كل 3 شهور بالدولار أو9% بتاخدها مقدم بالجنيه المصري وده طبعا رقم كبير، وممكن بعد كده المستثمر يحط العائد من الشهادة في أذون خزانة اللي هي حاليا بتوصل لـ 24%.
ولما سألناه هل هيكون في إقبال على الشهادات دي؟
قال إن من المتوقع إن الإقبال يكون كبير على الشهادات دي وده لأن تم طرحها في وقت ذكي جدا،أما الدكتور شريف الدمرداش الخبير الاقتصادي، لما سألناه عن رأيه في الشهادات ديه، قالنا إن نجاح الشهادات الدولارية متوقف على نظرة العاملين بالخارج للمناخ جوه مصر.
يعني لو المستثمر شايف أن الوضع الاقتصادي في مصر متوتر فهو هيخاف يغامر بفلوسه، أما لو شايف إن مناخ الاستثمار آمن فاكيد هيستثمر في الشهادات دي خصوصا إن الفايدة بتاعتها عالية ومغرية لناس كتير.
بس قال إن الشهادات دي لو نجحت وجمعت حصيلة شرا محترمة هتخفف من حدة السوق السودة اللي انتشرت مؤخرا بعد نقص العملة الصعبة في البلد وده لأن الشهادات دي هدخل العملة الصعبة للبلد.
بس هو إيه تفاصيل الشهادات دي؟
أنا أقولك، حسب موقع اليوم السابع، البنك الأهلي أعلن من ساعات عن طرح شهادتين دولارية وده عشان تلبي احتياجات العملة عشان يستثمروا فلوسهم من العملة الأجنبية في وعاء ادخاري يحافظ على فلوسهم ويزودها كمان.
وكان أول الشهادات اللي طرحها البنك شهادة الأهلي بلس ودي مدتها 3 سنين بعائد سنوي 7% وبيتصرف بعد 3 شهور، ده أنت كمان ممكن تقترض بضمان الشهادة دي لحد 50% من قيمتها بالجنيه المصري وبحد أقصى 10 مليون جنيه وبسعر عائد قيمته 2.25% أقل من سعر اقراض البنك المركزي.
وبالنسبة للشهادة الدولارية التانية فدي يا سيدي أسمها الأهلي فورا ومدتها برضو 3سنين ودي بقى العائد بتاعها 9% بيتصرف مقدم بالجنيه المصري عن الفترة كلها بواقع 27% من قيمة الشهادة عن إجمالي مدتها.
وعلى فكرة فئات الشهادات دي 1000 دولار والعائد بتاعها بيتحسب من تاني يوم ووممكن تستردها بعد مرور 6 شهور من شرائها
ودلوقتي قولنا رأيك في الشهادات الجديدة؟
