لكل عملاء البنوك، البنك الاهلي يجهز مفاجأه: شهادات جديدة بأسعار فائده مرتفعة.. فهل ستكون مثل شهادات ال 25% أم أكثر أم أقل؟
طيب ليه في التوقيت ده بالذات؟ وليه البنوك بتتسابق على طرح شهادات بعائد مرتفع رغم ان البنك المركزي في اجتماعه الاخير ثبت سعر الفائده؟ وإيه أعلى شهادة موجودة في السوق؟
انترو..
البنك الاهلي المصري بيدرس حالياً إصدار شهادات جديدة بالدولار والجنيه المصري بفايدة مرتفعة ، والسبب في كده هو المنافسه اللي شغاله بين البنوك في طرح شهادات بتقدم عائد اعلى من اللي بتقدمه بنك مصر والبنك الاهلي
ضيف على كده كمان اقتراب موعد استحقاق شهاده ال 18% في مارس الجاي وده هينتج عنه سيوله جديده في السوق.
عشان كده البنك الاهلي ممكن يطرح شهادات جديده عشان يحافظ على السيوله دي جوه البنوك بدل ما تخرج للسوق وتتسبب في زياده التضخم، او تروح لربط الشهادات في البنوك التانيه.
طيب هي ايه اعلى الشهاده موجوده في في السوق دلوقتي الاجابه هي شهاده البنك العربي الافريقي الدولي الشهاده مدتها 18 شهر الفائده عليها 22.5% لو هتاخد العائد في تاريخ نهايه الاستحقاق او 20% لو هتاخد العائد شهري
كمان عندنا بنك ابو ظبي التجاري اللي بيقدم شهاده ثلاثيه الفايده عليها: 18.50% للعائد السنوي، أو 15.5% للعائد اليومي، أو 17.75% العاذد ربع سنوي.
والشهادة موجودة تحت اسم (اكسيلنسي) بحد أدنى يبدأ من 100 ألف جنيه ومضاعفاته.
وده طبعا اعلى من الشهاده المتاحه حاليا للشراء في البنك الاهلي وهي الشهاده البلاتينيه مدتها 3 سنوات، وسعر العائد 16% شهري, 16.25% ربع سنوي16.50% نصف سنوي, 17.25% سنوي.
واللافت للنظر هنا ان البنوك في الايام الاخيره بتتسابق على طرح شهادات بفائده مرتفعه رغم ان البنك المركزي في اجتماعه بتاريخ 2 فبراير ثبت سعر الفائده ، بعد رفعها 4 مرات بمجموع 8% خلال 2022 عشان تسجل 16.25% للإيداع و17.25% للإقراض.
والسبب من وجهه نظر الخبير الاقتصادي محمد عبد العال هو محاوله البنوك الحفاظ على عملائهم من الاتجاه لشراء الشهادات في بنوك تانيه.
كمان رفع الفائده على اذون الخزانه شجع البنوك انها تطرح شهادات ادخار بعائد مرتفع عشان تستثمر فلوسها في اذون الخزانه المطروحه من الحكومه.
ضيف على كده، ان الشهادات الثلاثيه معفيهةة من نسبه الاحتياطي الالزامي اللي فرضها البنك المركزي على البنوك ورفعها من 14 الى 18%.
وده يشجع البنوك انها تزود الفائده على الشهادات اكثر من الودائع او شهادات الادخار قصيره الأجل.
والاحتياطي الإلزامي، هو نسبة من إجمالي ودائع العملاء بالبنوك بالعملة المحلية أقل من 3 سنوات، بيفرض البنك المركزي على البنوك إيداعها عنده من غير حصولها على عائد مقابل الإيداع.
والسؤال دلوقتي هل الشهادات الجديده اللي هتنزل في البنك الاهلي هتبقى بفايده 22.5% برده زي اعلى شهاده موجوده دلوقتي في السوق؟ ولا هتبقى اكثر من كده عشان تجذب عملاء اكتر؟
شاركونا بتوقعاتكم وقولوا لنا هل شايفين شهادات الادخار هي الاستثمار الافضل في الوقت الحالي ولا عندكم اختيارات تانية؟
