اليوم بدأت وزارة التموين والتجارة الداخلية في صرف مقررات شهر يناير 2023 والتي بيستفيد منها أكتر من 64 مليون مواطن مصري، من خلال 40 ألف منفذ تمويني.
وللأسف مع موجة غلاء الأسعار بيحاول بعض التجار استغلال الأزمة ورفع أسعار السلع بشكل غير مبرر ، ولكن الحكومة بتطمنك أسعار السلع التموينية منخفضة بس إزاي تعرف السعر الحقيقي للمنتج وتعمل إيه لو شكيت إن التاجر ده مغلي السعر عليك وبـ يستغلك، تعالى أقولك في حلقتنا النهاردة:
لو انت من أصحاب بطاقات التموين يبقي اطمن لأنك هتقدر تجيب 32 سلعة بسعر كويس جدا واللي بيكون داخل المنظومة التموينية و بتوفره ليك الدولة كل شهر، زي مثلا الزيت والسكر والأرز والمكرونة، ده غير كمان الألبان الجافة، والجبن، الصلصة، الخل، والدقيق، التونة، المربى، وطبعًا مقدرش ننسى العدس والفول.
كمان عشان تطمن إنك صرفت السلع الموجودة في بطاقتك مظبوط، وزارة التموين هتبعتلك رسالة نصية على تليفونك كل شهر وده بعد ما بتصرف عشان تتأكد إنت صرفت إيه من حصتك التموينية عشان تفهم وتعرف حقك وتقدر تحسب حسبتك كويس.
وعشان كلام الاشاعات اللي مسبش حد في حالة، وزارة التموين نفت وجود أي زيادة على السلع التموينية، وحددت قائمة أسعار بتنزل كل شهر و بيتعلن عنها تقدر تعرفها شهريا من نشرات الأخبار وصفحة الوزارة الرسمية وتروح للتاجر وانت متطمن وعارف هتطلب ايه وبكام.
والشهر ده لو هنتكلم مثلًا عن السلع الأساسية فهي كالتالي:
- السكر المغلف 1 كجم بسعر 10.5 جنيه.
- وزيت خليط 800 مللي بسعر 25 جنيهً.
- والأرز معبأ 1 كجم بسعر 10.50 جنيه
- والمكرونة الـ 800 جم بسعر 10.5 جنيه
- والمكرونة 400 جم بسعر 5.25 جنيه.
- و عدس مجروش 500 جم بسعر 12 جنيهًا.
- والفول معبأ 500 جم بسعر 7.50 جنيه.
والدقيق معبأ ورقي أو بلاستيك 1 كجم بسعر 11 جنيه
طيب تعمل إيه لو حسيت إن التاجر بـ يستغلك ومغلي عليك الأسعار؟ أولا لازم تعرف إن في هناك قرار من الوزارة بيلزم التاجر أنه يحط السعر على كل سلعة.
وحتى لو السلعة دي مستوردة أو منتج تابع لمصنع بيكون مكتوب عليها سعر البيع للمستهلك، عشان يكون معروف السعر للمستهلك وهامش الربح، عشان ميبقاش في رفع في الأسعار ولا استغلال من التجار.
بس طبعا في سلع مينفعش يتحط عليها أسعار زي مثلا اللحوم والأسماك والجبن واللانشون والبسطرمة، ولكن تقدر تتأكد بردو من سعرها من خلال قائمة الأسعار اللي بتكون موجودة في كل منفذ لبيع السلع التموينية وكمان بيتعلن عنها كل شهر
وانت كمواطن لازم يكون ليك دور إيجابي وتساعد الدولة في ضبط الأسعار، يعني مثلا في حالة لو لقيت حد بيبيع بسعر عالي أو مش حاطت قائمة أسعار، فورا تقدر تبلغ عن المخالفة دي من خلال الأرقام التالية 19588أو 16528، وعلى طول بيتم فحص شكوتك والرد عليك والتحرك فورًا ده كمان الدولة بتضمن سرية بيانات صاحب الشكوى ومش وده مش هيعرضك لأي مشاكل.
قولنا رأيك في المنظومة التموينية للمواطنين، وهل انت شايف إن ده كافي لدعم المواطن؟
