مفاجأة عن الذي يقف وراء السوق السوداء للدولار

شبح السوق السوداء للدولار يهدد الجنيه .. لكن يا ترى من الذي بيشتري ويبيع الدولار في السوق السوداء؟ هل الافراد العاديين أم تجار كبار ليهم ثقلهم في السوق؟

وإيه حكاية تجار الدهب والسيارات بالذات ؟ وازاي اعفاء واردات الدهب من الجمارك هيخفف الطلب على الدولار؟

كواليس كتيرة بتحصل في السوق السودة، تابعونا للتفاصيل:

لسه مشكلة السوق السوداء بتواجه سعر الصرف في مصر وده اللي كشفته رابطة تجار السيارات، طب ازاي؟

الرابطة طلعت بيان نشرته جريدة المال وطلبت من العاملين في مجال سوق السيارات إنهم ما يساعدوش في زيادة الطلب على الدولار لمدة شهر واحد.

وإنهم يوقفوا شراء الدولار من السوق السوداء لمدة شهر واحد وتحديدا في الفترة من 15 مايو ولحد نص الشهر الجاي وده عشان تستقر أوضاع البلاد.

طيب ياترى إيه السبب اللي خلاهم يطلبوا من التجار إنهم يعملوا كده؟

الرابطة قالت إن الاجراءات دي بسبب الظروف الاقتصادية الاستثنائية اللي وصفتها بالصعبة واللي بتمر بيها مصر بالتزامن مع وجود أزمات عالمية أثرت بشكل كبير على قيمة الجنيه قدام الدولار.

ولو انت فاكر إن تجار السيارات بس اللي موجودين في السوق السودة للدولار، يبقى لازم تسمع تصريحات أمير رزق عضو رابطة تجار الدهب.

واللي كشفه رزق ان سعر الدهب بيكون ليه علاقة بالدولار وده لأنه بيتحدد على حسب سعر الدولار في السوق السوداء

وقال كمان في تصريحات لبرنامج يحدث في مصر مع الإعلامي شريف عامر، إن تجار الدهب بيسعروا الدهب على حسب سعر الدولار واللي وصل في السوق الموازية من 40 لـ 42 جنيه، مقابل 30.95 جنيه في البنوك، وإن سعر الدولار في السوق السوداء مرتبط بالعرض والطلب.

وطبعا في الفترة الأخيرة، كلنا شفنا الدهب بيسجل ارتفاعات جنونيه في الأسعار، وشعبة الدهب قالت إن السبب هو نقص العرض في مقابل زياده الطلب وخاصه ان كتير من المصريين شايفين الذهب ملاذ امن هيحافظ على مدخراتهم وفلوسهم في وقت الأزمة.

وعشان كده سهر الدماطي الخبيرة المصرفية كانت شايفة إن قرار السماح بدخول الدهب من المصريين بالخارج هيساعد في وجود وفرة في معروض الدهب وده اللي هيقلل سعره الفترة الجاية.

والأهم من ده إنها في تصريحات لمصراوي قالت إن القرار ده هيساعد في تحقيق التوازن بين العرض والطلب وإن تجار الدهب هيهدوا من طلباتهم على الدولار من السوق السوداء عشان يستوردوا بيه الدهب، وده اللي هيعمل استقرار في أسواق الصرف.

وده بردو نفس الرأي اللي قاله ماجد فهمي رئيس بنك التنمية الصناعية سابقا وقال إن في مزايا كبيرة من القرار أهمها إن الطلب على شراء العملة من السوق السوداء هيقل وده بعد ما هيتوفر معروض كافي من الدهب.

ومن كام يوم بس الحكومة قررت توافق على مشروع قرار إعفاء واردات الدهب من الخارج من الرسوم والضريبة
حسب الكلام اللي صرح بيه لجريدة المصري اليوم الدكتور ابراهيم العشماوي، رئيس قطاع تنمية التجارة الداخلية

وقال إنه مفيش جمارك ولا قيمة مضافة على مشتريات الذهب من الجنيهات الذهبية والسبائك للعائدين من الخارج، لكن القيمة المضافة اللي بتحدد بتكون على المشغولات الذهبية بس وبتتراوح ما بين من ٦ إلى ١١ جنيها للجرام.

دلوقتي قولولنا رأيكم في اللي بيحصل وشايفين إيه مستقبل الجنيه امام الدولار!