افلاس أمريكا! خبر صادم إذا حدث، فهل أقوى اقتصاد في العالم أوشك على الانهيار؟ ووما تاثير هذا علينا وعلى سعر الدولار والذهب؟
طيب إيه سر انخفاض الدهب في الاسابيع الاخيرة؟ وليه في توقعات بزيادة سعره أواخر مارس؟ ونشتري دلوقتي ولا تستنى؟ والدولار هيبقى بكام خلال سنة؟ كل الاجابات على الاسئله دي بتفاصيلها تعرفوها معانا في التقرير التالي:
الايام اللي فاتت الكل كان في انتظار ارقام مهمة من الاقتصاد الامريكي لتحديد مستقبل الدهب على المدى القريب ونقدر نلخصهم في 3 حاجات: معدل التضخم, مبيعات التجزئه, وبيانات التوظيف..
وصحيح معدل التضخم لشهر يناير انخفض الى 6.4% لكنه كان أعلى من التوقعات اللي حددته عند مستوى 6.2%
وفي المقابل ارتفاع مبيعات التجزئه وزيادة عدد الوظايف الجديدة لاكتر من ضعف التوقعات معناه ان الاقتصاد الامريكي لسه قوي.
وده هيدي فرصة اكبر للفيدرالي الامريكي انه يرفع سعر الفايدة بمعدلات كبيرة ولفترة اطول عشان يواجه التضخم من غير ما يقلق من الدخول في مرحله ركود.
وطبعا رفع الفايدة على الدولار بيقابله علطول انخفاض في سعر الدهب، وده اللي شفناه عالميا ومحليا في الاسابيع الأخيرة، لما خسر المعدن النفيس 120 دولار من قيمته.
وانت ممكن تستغرب ازاي الاقتصاد قوي في وقت وزاره الخزانة الامريكيه بتحذر فيه من افلاس امريكا وعدم قدرتها على سداد الديون؟
الحكايه وما فيها يا سيدي ان الكونجرس بيحدد سقف الديون اللي تقدر تقترضها الحكومه من خلال بيع سندات واذون الخزانة.
ولما الحكومه بتوصل للسقف ده بيكون قدامها حلين: اما تخفيض الانفاق او زياده الضرائب، لكن الحكومه الحالية عاوزة الكونجرس يرفع من سقف الديون.
وهنا ظهر الخلاف بين الطرفين، ووزيرة الخزانة طلعت تحذر من تخلف أمريكا عن سداد ديونها.
وصحيح ساعتها سعر الدولار هينزل وسعر الدهب هيسجل أرقام قياسية بس انهيار امريكا هيدخل العالم كله في أزمة مالية جديدة.
عشان كده البعض ربط اللي بيحصل بأزمة الديون اللي حصلت في أمريكا 2011 وبسببها سجل الدهب أعلى مستوى ليه في تاريخه وقتها عند 1920 للاونصة،، بس صعب الوضع ده يتكرر المرة دي لسببين:
الأول أن أمريكا وقتها كانت خارجة من أزمة الرهن العقاري 2007 والأزمة المالية العالمية 2008، وده كس موجود حاليا
والتاني هو طبيعة الخلاف بين الكونجرس والحكومة، يعني المشكلة سياسية اكتر منها اقتصادية، والمتوقع انه في النهاية هيوافق على رفع سقف الدين الأمريكي.
وحاليا الفرصة مناسبة لشراء الدهب، بس خلي بالك هتشتري عشان تدخر لسنتين او تلاتة على الاقل.
لأننا دلوقتي بنعيش تذبذب في الدهب، يعني السعر هيفضل طالع نازل، فلو هتشتري عشان تبيع بعد شهور، أنت كده بتغامر لان مفيش مكسب مضمون، ومتوقع ان التذبذب ده يستمر ل3 شهور كمان.
وخد بالك انه من 21 مارس لغاية 31 مايو، هيبدأ صرف شهادات ال18% بمبلغ 750 مليار جنيه ، فلو حصل إقبال من اصحابها على شراء الدهب هنشوف ارتفاع جديد في سعره بداية من اواخر مارس أو بداية أبريل.
طيب والجنيه هيعمل ايه مع الدولار؟
لسه توقعات بنوك الاستثمار العالمية زي ما هي، يعني مثلا بنك اتش اس بي سي بيتوقع الدولار يوصل ل 32 او 32 ونص خلال المدى القصير.
كمان المستثمرين في العقود الآجلة غير القابلة للتسليم لمدة 12شهر، توقعوا وصول الدولار الى 36 جنيه على مدار سنة، لكن ده هيحصل ولا لأ؟ صعب خد يقول رقم معين.
انت بقى قول لنا توقعاتك ايه لسعر الدولار والذهب خلال الفتره الجاية: زيادة ولا انخفاض؟
