انتشرت رسائل وتدوينات لناس المفروض إنها تعمل في شركة ريلمي والمعروفة بصناعة التليفونات في مصر، وقالوا إن في رسائل وصلتهم اتبلغوا فيها بشكل رسمي بإنهاء عملهم في الشركه.
وطبعا قامت الدنيا مقعدتش واتقال إن الشركة هتخرج من السوق المصري، فهل الكلام ده صحيح فعلا وليه الكلام ده بيحصل دلوقتي؟
فجأة كدة المصريين صحيوا على خبر إن شركة ريلمي هتقفل خلاص وإنها هتعمل تخارج من السوق المصري، وطبعا البوستات انتشرت بشكل واسع على كل مواقع السوشيال ميديا.
بس في الأول كدة القصة دي مش بتفكرك بحاجة؟
ايوه بظبط كدة نفس الكلام ده من فترة قريبة اتقال على شركة oppo، واللي تعتبر شركة ريلمي تابعة ليها وده قبل ما تعلن ريلمي الانفصال عنها ف 2018 والاتنين معروفين بصناعة التليفونات
لكن الحقيقية شركة أوبو وقتها كانت صريحة جدا وطلعت قالت إنه الكلام ده مش صح وإن كل اللي بيتقال عن خروجها من السوق المصري إشاعات.
مش بس كدة دي كمان وضحت وقالت إن كل أنشطة الشركة وأعمالها في مصر ماشية بشكل طبيعي واعتيادي، وده لأنها بـ تعتبر السوق المصرية إحدى أهم الأسواق الواعدة في المنطقة وأنها عندها ثقة كبيرة في الإمكانيات الكبيرة المتوافرة فيها.
كمان وقتها طلعت مصادر اتكلمت في تصريحات صحفية واكدت اعتزام شركة Oppo الصينية أكبر شركات توزيع المحمول في مصر فتح مصنع كامل لتصنيع المحمول في مصر واتقال إنه مقرر الانتهاء من إجراءاته في شهر مارس، واللي هيكون ضمن الشركات الهامة في تصنيع المحمول بتصنيع مصري كامل.
ده كمان اتقال إن الشرمة الجديدة هتعتمد بشكل كلي على العمالة المصرية في المصنع الجديد يعني هيتم تصنيع الهاتف المحمول داخل مصر بعمال مصريين، وده اللي أعلنته بردو شركة سامسونج السنة اللي فاتت.
الله وده إيه علاقته باللي بيتقال عن شركة ريلمي؟
بالعكس ده نفس اللي حصل بظبط مع شركة ريلمي، بس الحمد لله الكلام اللي اتقال مطلعش حقيقي وده اللي أكده محمد هداية، عضو مجلس إدارة شعبة المحمول والاتصالات، قال في تصريحات للمصري اليوم إن شركة real me بتحاول ترشد النفقات خلال الفترة الأخيرة، وعشان كدة بعتت رسايل لبعض الموظفين وأنهت معاهم العمل داخل الشركة.
قال كمان عضو مجلس إدارة شعبة أن الشركة لم تقم بالتخارج من السوق، و مستحيل تاخد القرار ده خاصة وأن السوق المصري يعتبر من أكبر الأسواق العالمية في بيع المحمول الصيني من النوعية دي.
ده كمان أكد إن في تواصل بين الشعبة والمسؤولين في الشركة واللي أكدوا كلهم عدم التخارج. بس الأكيد إن الشركة طلعت بيان رسمي قالت فيه إنها مستمرة في تقديم خدمتها ومنتجاتها من الهواتف الذكية للسوق المصري، وإنه الكلام اللي بيتقال إنها هتتخارج من السوق المصري غير صحيح ومجرد إشاعات.
وقالت إن كل فروعها المنتشرة في مصر شغالة بشكل طبيعي وإنها مستمرة في ضخ الاستثمارات في مصر .
وطالبت وسائل الإعلام المختلفة بتحري الدقة والموضوعية وان المعلومات تتاخد من مصادرها الرسمية.
واللي أكد إن الكلام اللي طلع كله فشنك زي ما بيقولوا هو تشيس شو نائب رئيس شركة realme اللي قال في تصريحات صحفية ليه إن الشركة بتدرس تصنيع الهواتف المحمولة وإن ده هتعمليه العلامات التجارية “أوبو” و”ريلمي” في مصر خلال الفترة الجاية.
وقال كمان إن معاد إطلاق التليفون الذكي الجديد Realme GT 3 في مصر هيكون خلال شهرين.وإن الهاتف مميزات كتير زي إنه بيقدملك أسرع شحن للبطارية في الهواتف الذكية بقدرة 240 وات وده اللي بيخليه يشحن البطارية كلها في أقل من 10 دقائق بس.
دلوقتي قولنا لما بتشوف خبر منتشر على مواقع السوشيال ميديا بتصدقه ولا بترجع للمصادر الموثوقة؟
