الدولار في السوق السوداء منذ فترة يقترب من حاجز 40 جنيه، لكن تفتكروا بعد تصريحات الرئيس عبد الفتاح السيسي الأخيرة ممكن نشوف الدولار يتراجع في السوق السوداء؟، وياترى متوقع يصل لكم؟
وهل كده مفيش تعويم دلوقتي خالص؟ وإيه تأثير كل اللي بيحصل ده على الأسعار؟، خليكوا معانا واحنا نقولكم إيه الحكاية:
خلال الاسابيع الأخيرة وحسب متعاملين في سوق الصرف، الدولار في السوق الموازية أو السودة كان في مستوي 40 جنيه تقريبا.
وبظبط بيتراوح ما بين 39 جنيه لـ 40.5 جنيه لكل دولار والمفترض إن ده أعلى من السعر المتداول في البنوك بحوالي من 8 لـ 9.5 جنيه
وده لأن الدولار سعره الرسمي في البنوك سجل 30.95 جنيه.بس دلوقتي الوضع اختلف، والرئيس عبد الفتاح السيسي اتكلم بصراحة عن خفض سعر العملة وقال بالنص: وانت بتقرب من سعر الصرف لازم ننتبه عشان مندخلش في أزمة فوق الخيال واحنا حاليا بنتمتع بمرونة في سعر الصرف لكن لما يتعرض الموضوع لأمن مصر القومي والشعب يضيع فيها يبقي لأ .
والتصريحات دي وضحت نية استبعاد قرار التعويم في الفترة الحالية خاصة وإنه بيأثر بشكل مباشر على المصريين
وطبعا الكلام ده كان ضربة قوية جدا للسوق السوداء وده لأن سعر الدولار في السوق السوداء بيتأثر بأي اخبار ممكن تأثر في سوق العملات وبينخفض لو الأنباء ايجابية والعكس
وعشان كده عمرو الألفي من برايم المالية كان شايف إن مصر مش هتستفيد في الوقت الحالي من أي تخفيض يحصل للعمله، وإن تصريحات الرئيس ليها تأثير نسبي بالايجاب على المعاملات في السوق الموازية
ودلوقتي الدولار في السوق السودة بيتداول عند مستويات 37 لـ 38 بعد ما كان بيحوم من اسبوع واحد عند 40 جنيه للدولار
طيب ياترى ليه الفترة اللي فاتت كان الدولار سعره في الطالع ؟
حسب مصادر اتكلمت لموقع مصراوي قالت إن استمرار ارتفاع سعر الدولار بسبب نقص المعروض المتاح من العملة في السوق الموازية نفسها
وكمان البنوك والصرافات مش قادرة تدبر النقد الأجنبي للعملا بشكل سريع وكافي،لكن اللي حصل من حوالي اسبوعين كده إن الدولار انخفض قدام الجنيه في السوق السوداء بحوالي من 4 لـ 6 جنيه وتراجع وكان بيحوم ما بين 34 لـ 36 جنيه وده حصل بعد قرار الحكومة بإعفاء القادمين من الخارج من جمارك الدهب اللي معاهم .
لكن بعدها وبفترة مش كبيرة رجع الدولار يرتفع تاني في السوق السوداء وده بردوا حسب كلامهم بسبب استمرار نقص توافر النقد الأجنبي في البنوك والصرافات
وعلى فكرة الأزمة دي مش جديدة والحقيقة إن البنوك والصرافات بتواجه أزمة نقص النقد الأجنبي من الربع الأول لـ 2022 وده بعد ما ظهرت المشكلة الروسية الأوكرانية واتسببت وقتها في خروج استثمارات اجنبيه غير مباشرة من مصر بحوالي 22 مليار دولار وطبعا البنك المركزي هو اللي سدد الأموال دي.
بعدها شوفنا سعر الدولار بيرتفع قصاد الجنيه وعلى مدار أكتر من سنة ارتفاع حوالي 96% وده خلى السعر يزيد وبدل ما كان الدولار بـ20 جنيه في مارس 2022 وصل حاليا لـ 30.95 جنيه.
ولو بتسأل امتى ممكن تختفي السوق السوداء فـ محمد عبد العال الخبير المصرفي لمصراوي قال إن السوق السوداء لتجارة العملة هتفضل زي ما هي ومش هتتأثر حتى بعدم خفض الجنيه الفترة الجاية وده لأن الطلب على الدولار مستمر والبنوك ما زالت بتتبع سياسات نقدية بتخليها متمولش كل الطلبات الخاصة بالمستثمرين
وأكد إن القضاء على السوق السوداء بيحتاج إن البنوك توفر الدولار بشكل كافي للعملاء وإن الدولة يكون فيها زيادة في تدفقات النقد الأجنبي.
دلوقتي قولولنا وجهة نظركم وهل شايفين إن السوق السوداء ممكن تختفي قريب؟
