على الرغم من تعويم الجنيه وارتفاع سعر الدولار بشكل كبير وهو ما تسبب في ارتفاع أسعار العديد من المنتجات، ولكن ليس كل المنتجات ارتفعت ولكن في منتجات قد انخفضت وأبرز هذه المنتجات البيض التي انخفضت بشكل ملحوظ في الأسواق ولكن ما السبب وراء هذا الانخفاض؟ والأهم هل هينخفض أكثر الفترة القادمة؟ أسئلة كثيرة سنتعرف على إجابتها من خلال التقرير التالي:
خلال الفترة اللي فاتت كانت أسعار البيض هي الشغل الشغال لكتير من المصريين.. لأنه زي ما بنقول عليه بروتين الغلابة.. لكن فجأة سعره ارتفع بصورة كبيرة جدا لأكتر من ٣ أضعاف عشان يوصل تمن كرتونة البيض من ٣٠ و٣٥ جنيه ل٨٠ و٩٠ جنيه.. والبيض من جنيه تبقى ب٣ جنيه.
زيادة أسعار البيض بالشكل ده خلت كل الناس تتكلم لين بروتين الغلابة مبقاش الغلابة وأسعاره بقت في السما.. ووقتها طلع كتير من التجار وقالوا مش بإيدينا.. الأمر مرتبط بنقص الأعلاف اللي مركونة في الموانئ ومش قادرين نخرجها بسبب أن مفيش دولار.
لكن بعد التعويم وتوفر الدولار على الرغم من ارتفاع سعره شوفنا كل المنتجات بتغلى إلا البيض بيرخص لدرجة أن وصلت كرتونة البيض ل٧٦ و٦٦ جنيه في الأسواق الأيام دي.
سبب انخفاض أسعار البيض
محمود عناني، رئيس اتحاد منتجي الدواجن، قال إن السبب في انخفاض أسعار البيض هو قلة الطلب في الوقت اللي الأسواق بتشهد فيه زيادة المعروض.
كمان قال إن الأسواق في مصر الأيام دي ومع دخول الشتاء كان البيض بيكون مطلوب بالذات أن الموسم الدراسي بدأ.. لكن على عكس المتوقع شوفنا أن الطلب على البيض بيقل وبالتالي نتيجة قلة الطلب على البيض في ظل ارتفاع أسعاره وبداية توافر الأعلاف أدى لزيادة المعروض وتراجع الأسعار.
أسعار البيض الفترة القادمة؟
محمود عناني قال إن هتكون في مفاجأة كبيرة في أسعار البيض الفترة الجاية لأنه مع الإفراج عن الأعلاف بسبب توفر الدولار وفتح الاستيراد أنها نستورد أعلاف ده هيعمل زيادة في الإنتاج بشكل كبير وبالتالي المعروض من البيض هيكون كتير وده اللي هيخلي الأسعار تنزل أكتر.
رئيس اتحاد منتجي الدواجن قال إن الأمر برضو مرتبط بسلوك المستهلكين وأنهم مش يحاولوا يشتروا كتير الفترة الجاية عشان ميكونش الطلب أكتر من المعروض وبالتالي الأسعار ترتفع تاني.. وأن مدى وعي الناس في السيطرة على الأسواق بيكون سبب كبير في ارتفاع الاسعار او انخفاضها.. لأن العملة كلها قائمة على العرض والطلب.
مش بس كده لكنه قال كمان إن توافر الأعلاف هيكون برضو سبب في انخفاض أسعار الفراخ لكن الأمر ده هيحتاج شهور عشان دورة الإنتاج تتم ويكون في فراخ كتير في الأسواق.
