مفيش سجائر في السوق ولو لاقيت سجاير فرط يبقي كويس !! هذا ليس كلامي إنما كلام عمرو اديب من برنامج الحكايه، فياتري من له المصلحه الكبيرة في ارتفاع أسعار السجائر ؟! وماذا كان رد رئيس شعبه الدخان والسجائر فيما يحدث هذا وماذا يقصد بالحيتان والبساريا؟
تفاصيل جديدة من سيناريو اسعار السجاير اللي مازال مستمر و جشع التجار ..تابع التقرير للنهاية:
طلع عمرو اديب امبارح من خلال برنامجه الحكايه علي ام بي سي مصر وقال : الواقع ان السجاير بالنسبه للناس سلعه اساسيه.
والواقع برضه إن مبيعات السجاير هي اللي بتدفع ضرائب كبيرة وبتسد اجزاء كبيره من موازنه الدوله المصريه. والمشكلة بقى إن أسعار السجاير بقت واصله لـ ٦٠ و٧٠ جنيه ، والأهم من ده كله أن مفيش سجاير !!
ده كان كلام عمرو اديب في برنامجه الحكايه وقال كمان إنه كان متفاجيء من أحد أصحابه اللي كان مستلف سجارة فرط بسبب إن مفيش سجاير ..!!
عشان يرد ابراهيم امبابي رئيس شعبة الدخان والسجاير في مداخله هاتفيه من خلال برنامجه وقال إن اللي بيحصل ان التجار بيرفعوا السعر بسبب إنه انتشر كلام في السوق عن خطة الحكومة لزيادة التعريفة الضريبية على السجاير.
بس لحد دلوقتي التعديل محصلش، وهنا التجار بدأوا يرفعوا الأسعار على كيفهم والفرق هما اللي بياخدوه !
ولما سأله عمرو اديب ايه اللي مفروض يحصل من المواطن عشان يدفع السعر الرسمي للعلبه؟!رد عليه ابراهيم امبابي وقال إن المفروض المواطن بيعرف السعر الحقيقي من الباركود اللي مكتوب علي العلبه.
وأكد ابراهيم امبابي رئيس شعبه السجاير والدخان إن التأخير الضريبي جاي من الحكومه وان التعديل المفروض كان ينزل من شهر وإنه علي تواصل دايم بحمايه المستهلك.
وأكد إن المفروض علي سبيل المثال إن علبه السجاير ميرت ب٤٩ ج للمستهلك وبتتباع ب٧٥ جنيه، وان لما الضريبه تطلع علي علبه السجاير، علبة سجاير الكليوباترا على سبيل المثال مش هيزيد سعرها عن ٢٥ أو ٢٦ جنيه بالكتير.
وأكد إن جشع التجار ده مش هينتهي الا بفرض التعديل الضريبي بحيث إن كل المخزون من علب السجاير اللي التجار مخزنينها يضطروا يخرجوها من تاني للبيع وبنفس سعر المستهلك .
وتابع امبابي وقال صحيح إننا مش بنشجع علي شرب السجاير ولكن ده قرار شخصي من المشتري وده مالناش دخل بيه لكن لازم نحمي المستهلكين من جشع التجار .
ووضح ابراهيم امبابي بكلام ساخر وقال من خلال كلامه في برنامج الحكايه مع عمرو اديب إن السوق في حوت كلير بياخد فرق الفلوس اللي بيرفعها في سعر العلبه وهو ده الموزع وبيدي للبساريا اللي هو التاجر الصغير السعر الباقي .
كمان أكد ابراهيم امبابي إن القيمه المضافه أو الاضافه التعريفيه مش هتكلف اكتر من ٢جنيه أو 3 جنيه علي الاسعار الرسميه للعلبه .
وواضح إن سيناريو جشع التجار مازال مستمر ولكن الأكيد إن الحكومه متأخره جدا في اصدار التعديلات الضريبيه وان التعديلات دي المفروض كانت تنزل من شهر ، وده اللي كان بيأكد فيه ابراهيم امبابي رئيس شعبه الدخان طول المداخله مع عمرو اديب، وانت ايه رأيك في كلام رئيس شعبه الدخان عن جشع التجار، متنسوش تقولنا رأيكم في التعليقات.
