رفع الفائدة من قبل البنوك المركزية في دول الخليج بعد قرار الفيدرالي الأمريكي يعكس تأثيراً مباشراً لهذا القرار على الأسواق المالية العالمية. ومن الممكن أن يتبع البنك المركزي المصري نفس الخطوة ويقرر رفع سعر الفائدة في اجتماعه القادم، ولكن هذا يعتمد على الظروف الاقتصادية والمالية الداخلية في مصر وعلى التوقعات المستقبلية للاقتصاد العالمي.
وبالتالي، يمكن أن يتخذ البنك المركزي المصري قراراً مخالفاً للفيدرالي الأمريكي إذا تطلبت الظروف ذلك. تابعونا لمعرفة التوقعات لقرار المركزي المصري في اجتماعه القادم في يوم 18 فتابعونا:
بص يا سيدي البنك المركزي المصري في 2023 عمل اجتماعين الأول في شهر فبراير و ساعتها قرر يثبت سعر الفايدة، والتاني في أواخر شهر مارس وتحديدا يوم 30، وقرر وقتها إنه يرفع سعر الفايدة 200 نقطة أساس عشان يوصل عائد الإيداع والإقراض لليلة واحدة لـ 18.25%، 19.25%و18.75%، على الترتيب.
أما لو بتسأل عن التوقعات اللي هتحصل في اجتماعه المركزي الخميس 18 مايو، فـ الدكتور محمد عبدالهادي، خبير أسواق المال توقع في تصريحات لـ جريدة المصري اليوم إن البنك المركزي يثبت سعر الفائدة في اجتماعه الجاي.
واتفقت مع الكلام ده الخبيرة المصرفية سهر الدماطي وقالت في تصريحات لـ جريدة الأهرام إن لجنة السياسة النقدية بالبنك المركزي ممكن تاخد قرار بتثبيت سعر الفائدة في الاجتماع الجاي ليها، كمان رجحت عدم إصدار البنوك أي شهادات ادخار جديدة مع وجود شهادات بفائدة تتراوح بين 19 و22%.
توقعات باستمرار رفع سعر الفائدة
لكن خالفتهم في الرأي الخبيرة الاقتصادية حنان رمسيس، وقالت في تصريحات لـ جريدة الأهرام إنها بتتوقع استمرار رفع أسعار الفائدة بنسبة ما تزيدش عن 1% لمواجهة التضخم.
واللي حصل إن بعد قرار البنك المركزي الفيدرالي الأمريكي دول كتيرة عربية خدت نفس الموقف ورفعت سعر الفايدة
منها على سبيل المثال مصرف الإمارات المركزي واللي أعلن مباشرة بعد قرار الفيدرالي رفع سعر الفائدة 25 نقطة أساس .
وده اللي عمله بردو مصرف البحرين المركزي وأعلن أنه رفع أسعار الفائدة الرئيسية بواقع 25 نقطة أساس.
وخالفهم في الاتجاه مصرف قطر المركزي و قرر يسيب أسعار فائدة الإيداع والإقراض وإعادة الشراء زي ما هي، وحسب تصريحات لـ رويترز المركزي القطري قال إنه عمل كده عشان بيسعى للإبقاء على أسعار الفائدة عند مستوى مناسب وده عشان يدعم النمو الاقتصادي المستدام.
تفتكروا بقى المركزي المصري هيعمل زي بنك الإمارات المركزي ومصرف البحرين المركزي وهيرفع سعر الفايدة، ولا ممكن نشوف قرار مختلف زي ما عمل مصرف قطر المركزي ويثبت الفايدة؟
