لو انت من أصحاب شهادات الـ 19% من البنك الأهلي ومصر، استعد للمفاجأة حيث أنه بإمكانك الحصول على قرض من أجل شراء سيارة، تابعنا لمعرفة التفاصيل:
بنوك كتير الفترة الأخيرة طرحت شهادات جديدة بفوايد عالية وكان أبرزهم شهادات البنك الأهلي ومصر وقتها أعلن البنكين عن إصدار شهادات ادخار لمدة 3 سنين
الشهادة الأولى كانت ثابتة لمدة 3 سنوات بسعر 19٪ سنوي و العائد شهري، والثانية متناقصة لمدة 3 سنين بسعر سنوي 22٪ لأول سنة و18٪ للسنة الثانية و16٪ للسنة الثالثة والعائد بيتصرف فيها شهري.
والمفاجأة إنك لو من الناس اللي قدمت على شهادة الـ 19% وبتفكر تشترى عربية، فـ البنك الأهلي وبنك مصر يقدم ليكم مفاجأة وهي عبارة عن قرض لشراء السيارات المستعملة.
والقرض ده بيكون بضمان شهادات الادخار اللي انت اشتريتها، وده لأن البنك الأهلي ومصر مش بيقبلوا تحويل المرتب كضمان لقروض السيارات المستعملة زي مابيحصل لو العميل قدم على قرض لشراء السيارات الملاكي الجديدة.
طيب ياترى لو انا عايز اقدم على القرض ده هعمل إيه؟بص يا سيدي حسب سياسة البنك الأهلي ومصر فـ القرض ده بينزل للعميل من غير ما يحتاج يقدم على أي ورق وده لأن الشهادة بتعتبر ضمان للبنك ومش محتاج اوراق تانية.
و كل اللي بتعمله إنك بتروح البنك وتبلغ الموظف و هتحتاج بس تقدم موافقة بحظر الشهادة أو كسرها وعليها توقيعك.
في خالة القرض بضمان الشهادة، البنك بيحتفظ ليها كمان عنده زي ماقلنا، وده معناه انك متقدرش تكسر الشهادة أو حتى تستلم فلوسك لو مدتها انتهت الا بعد سداد القرض.
يعني بكل بساطة فلوسك هتفضل مربوطة في الشهادة لغاية ماتسدد اخر قسط في القرض.
بس متقلقش العميل بيقدر يستمتع بعائد الشهادات زي ماهو بعد ما ياخد القرض، لكن بيكون مطالب بسداد فوايد القرض واللي بتزيد بنسبة بسيطة اوي عن العائد اللي بيقدمة البنك على القروض بضمان الشهادات، وده طبعا غير انك هتسدد القسط الشهري للقرض.
ولو بتسأل عن قرض العربية في البنك الأهلي المصري، فهي دي التفاصيل:
نسبة الفايدة على قرض السيارة المستعملة بتكون بزيادة 2% عن سعر الشهادة أو الوديعة يعني بالظبط بنسبة 21% سنويا على الاقتراض بضمان الشهادة اللي بفايدة 19%.
ومدة التمويل للقرض بتوصل لـ 7 سنين كحد أقصى.كمان نسبة التمويل بتوصل لـ 90% من إجمالي قيمة الشهادةيعني مثلا العميل يقدر ياخد قرض بقيمة 90 ألف جنيه مقابل شهادة إدخار بـ 100 ألف جنيه.أما نسبة المصاريف الإدارية فبتكون نسبتها 1% من إجمالي قيمة القرض ودي بيتم خصمها مرة واحدة.
أما بقى قرض العربية المستعملة من بنك مصر، برضه سعر الفايدة عليه ببكون بزيادة 2% عن سعر الشهادة أو الوديعة يعني 21% سنويا على الاقتراض بضمان الشهادة اللي بتكون بفايدة 19%، وبردو نسبة التمويل بتوصل لـ 90% من إجمالي قيمة الشهادة.ومدة التمويل بـ تبدأ من 12 شهر وتوصل لـ 10 سنين كحد أقصى، وهتدفع مصاريف إدارية 1% بس.
قولنا رأيك في قرض العربية المستعملة من البنك الأهلي ومصر؟
