بعد تعويم الجنيه، وانخفاض قيمته بنسبة كبيرة، أصبح الكثير من المصريين يبحثون عن طريقة للحفا على قيمة أموالهم من الانهيار، ويتسائلون هل فعلا ستطرح البنوك شهادات بسعر فائدة 20%؟ هذا ما نتعرف عليه من خلال التقرير التالي:
خلاص الجنيه اتعوم وانخفاض قيمته بقى أمر واقع مفيش مفر منه، والسؤال المهم دلوقت: تتصرف ازاي عشان تحافظ على قيمة فلوسك من الانهيار؟ وهل فعلا البنوك هتطرح شهادات بسعر فايدة 20%؟ ولا الشهادات بفايدة 17.25% هتبقى القرار الأخير؟
بالتزامن مع قرار البنك المركزي لتحرير سعر صرف الجنيه حسب العرض والطلب في السوق ورفع الفايدة بنسبة 2%، 3 بنوك حكومية طرحت شهادات ادخار جديدة بأسعار فايدة وصلت إلى 17.25% حسب دورية صرف العائد.
بس هاني جنينه، الخبير الاقتصادي، توقع طرح البنوك لشهادات ادخار تانية بعائد مرتفع جدا، احتمال يكسر حاجز الـ18% ويوصل لـ20%، بس بشرطين: تكون مدتها قصيرة ومربوطة بفك الدولار، ازاي؟
حسب توقعات الخبير الاقتصادي، مدة الشهادات غالبا هتكون مابين 6 شهور إلى سنة، وبعدين يتم إيقاف العمل بيها زي ماحصل مع شهادات الـ18%.
ولو فاكرين، البنك المركزي لما خفض سعر الجنيه ورفع الفايدة بنسبة 2% برضه في مارس اللي فات، طرح شهادة مدتها سنة واحدة بس، يعني اللي اشتراها هياخد العائد في مارس الجاي 2023.
الشهادة كانت متاحة في البنك الأهلي وبنك مصر لشهور معدودة، وبعدين اتوقفت في مايو بعد تحقيق حصيلة 750 مليار جنيه.
اما الشرط التاني وهو فك الدولار، فمعناه ان الشهادات دي تكون متاحة بس للأفراد اللي معاهم دولار، ساعتها هيروحوا البنك ويطلبوا تحويل المبلغ للجنيه عشان يشتروا بيه الشهادات بفايدة 20%.
ومن وجهة نظره، قرار ربط شهادات الادخار بفك الدولار من العوامل المهمة اللي هتحافظ على قيمة الجنيه، لأن الطلب عليه هيزيد.
وعلى فكرة دا كان هدف من أهداف شهادة ال18%، ولما طرحتها البنوك بسعر الفايدة العالي دا، كان غرضها تخلي الاستثمار في الجنيه مكسبه أكبر من الاستثمار في الدولار.
ودلوقتي بقى في سؤال مهم افرض البنوك منزلتش شهادات بفايدة 20% ايه تفاصيل أعلى شهادة في مصر دلوقتي؟
مافيش غير الشهادة الثلاثية بفايدة 17.25% والموجودةزفي في البنك الأهلي باسم الشهادة البلاتينية، أو شهادة القمة في بنك مصر ، أو شهادة بريمو جولد في بنك القاهرة.
بس لازم تعرف انك في الحالة دي هتاخد العائد مرة واحدة كل سنة, اما لو عاوز تاخد عائد كل شهر، ساعتها سعر الفايدة هينزل إلى 16%، وفي كمان إمكانية لصرف العائد كل 3 شهور بسعر فايدة 16.25%.
وزيهم زي اي شهادات ادخار تانية، تقدر تاخد قرض بضمانهم وقيمته بتبقى مرتبطة بقيمة الشهادة اللي اشترتها، وغالبا بتبقي بين 85% إلى 90% من قيمة الشهادة. وطبعا متقدرش تكسر الشهادة وتسترد فلوسك قبل مرور 6 شهور من تاريخ الشراء.
انتو بقى قوللنا رأيكم هل هتشتروا شهادات الادخار بفايدة 17.25% ، ولا هتستنوا شهادات 20% ؟ ولاعندكم حل تالت؟
