المصريين كلهم قلقانين من استمرار أزمة الدواجن في مصر، وهذابعد ما زادت أسعار الفراخ والبيض بشكل غير طبيعي لدرجة إن كثير منهم بدأوا يقاطعوها ودشنوا حملة لمنع الشراء اعترضا منهم على غلاء الأسعار, المفاجأة أن أزمة الدواجن على وشك الانتهاء ..للتفاصيل تابعونا من خلال التالي سنكشف مفاجأة.
أزمة الدواجن هتنتهي خلال ايام وهنشوف انفراجة كبيرة الفترة الجاية وتراجع في الأسعار خاصة مع جهود اللي الحكومة اللي عملتها عشان تفرج عن كميات كبيرة من الذرة وفول الصويا والأعلاف، دي كمان قدرت تمسك تجار السوق السوداء اللي أثروا على الاستيراد وده طبعا أثر بشكل مباشر على صناعة الدواجن في مصر وساعد في رفع الأسعار.
وده مش كلامنا ده كلام خبراء الاقتصاد اللي أكدوا إن أزمة الدواجن اللي عاشها المصريين كانت الأسوأ ومحصلتش سنة 2006، ده احنا لأول مرة نشوف أسعار الأعلاف تزيد بنسبة 60 و70% وأسعار الصويا زادت لوحدها بنسبة 150%.
اسباب الأزمة
هقولك يا سيدي، خبراء الاقتصاد أكدوا إن الأزمة كانت بسبب ارتفاع أسعار الذرة والصويا والأعلاف واللي طبعًا بـ تعتمد عليها صناعة الدواجن كلها وده لأن الأعلاف بتشكل 75 بالمئة من تكلفة الإنتاج.
ومش بس كدة ده قطاع الدواجن كله أتأثر بالأزمات العالمية وده بعد ما ارتفع سعر الدولار وزادت أسعار الأعلاف والخامات بشكل كبير على التجار.
وطبعًا لازم يكون في ناس تستغل الأزمة عشان تحقق أرباح، وده اللي شوفناه مع تجار السوق السوداء اللي استغلوا الأزمة وساعدوا إن الأسعار تبقى مضاعفة.
لكن صغار المستثمرين في قطاع الدواجن اتأثروا بشكل سلبي جدًا خلال الفترة اللي فاتت ده كمان في منهم ناس مقدرتش تكمل وقفلت مشاريها بسبب ارتفاع الأسعار.
طيب إمتى هنقدر نقول إن مفيش أزمة خلاص؟
احنا جايين نبشركم بحدوث انفراجة بالفعل وده بعد القرارات اللي أخدها مجلس الوزراء الأسبوع اللي فات، وقدرت بعدها الدولة تفرج عن كميات كبيرة من البضائع في الموانئ ومنها طبعًا الأعلاف.
والأيام دي تراجعت أسعار الصويا من 35 ألف جنيه للطن لـ 25 ألف للطن، دي كمان الذرة الصفراء سعرها نزل من 14500 جنيه للطن لـ 10500 جنيه للطن.
ده كمان وزير الزراعة وعد باستمرار الإفراج عن الأعلاف في الموانئ للقضاء على السوق السوداء ومافيا الاستيراد.
ومش محتاجة أقولكم إن كل ما زادت الإفراجات عن الحبوب والذرة والصويا كل ما ده هيساعد على تشغيل المصانع الخاصة بالأعلاف بكامل طاقتها، وبالتالي الأسعار هتقل والمواطن يستفيد.
غير كمان إن الحكومة لما هتوفر الأعلاف بأسعار مناسبة ده هيخلي صغار المربين يرجعوا تاني ويشتغلوا بعد ما خرجوا من القطاع الفترى اللي فاتت، وده لأن الطلب هيكون كبير على الدواجن خاصة إننا داخلين على مواسم .قولنا رأيك في جهود الدولة لحل أزمة الدواجن في مصر؟
