يبدو أن أمريكا تعاني كثيرا من خطر الإفلاس، حيث أن أكبر اقتصاد في العالم يعاني من الديون وياترى ما مصير باقي أكبر اقتصادات العالم، وما قصة المكالمة التي جاءت للرئيس الأمريكي والتي ستنقذ بلاده من سيناريو كارثي؟
سيناريو التخلف عن سداد ديون الولايات المتحدة حاجة غريبة وجديدة على أكبر اقتصاد في العالم، وده لأنها بتواجه أزمة بسبب الديون المتراكمة، وهتقلب بكارثة لو أمريكا مقدرتش أمريكا تسدد اللي عليها الشهر الجاي.وده مش كلام وخلاص ده اللي وكالة التصنيف الائتماني فيتش، في بيان ليها نشره موقع مصراوي
وقالت كمان إنها حطت التصنيف الائتماني لأمريكا تحت المراقبة عشان تخفضه،وده بيحصل بسبب إنهم موصلوش لاتفاق بشأن رفع حد سقف الدين.وده لأنها شايفه إن امريكا احتمال إنها تتخلف عن سداد التزاماتها الخاصة بالديون.
والمفترض حسب اللي أعلنته فيتش فـ قيمة الديون المستحقة على الولايات المتحدة 31.4 تريليون دولار، وده الرقم اللي بيعتبر آخر حد اتسمح للحكومة الأمريكية بالاقتراض عنده.
ولما وصلت الحكومة لـ الحد الأقصى وهو “سقف الدين” المسموح بيه، بدأت تطالب برفع السقف ده ودع عشان تتجنب فكرة التخلف عن السداد، وسط معركة محتدمة بينها وبين الكونجرس الأمريكي.
ولحد دلوقتي الكونجرس الأمريكي والبيت الأبيض مستمرين في نقاشات عن الشروط اللي هيتم عندها السماح للحكومة بالاقتراض مرة تانيه.
لكن رويترز طلعت النهاردة وقالت مفاجأة وهي إن رئيس مجلس النواب الأمريكي، كيفن مكارثي -أكد أن الكونجرس والبيت الأبيض وصلوا لـ اتفاق مبدئي” بشأن رفع سقف الدين العام، وده بعد مكالمة هاتفية لمدة 90 دقيقة مع الرئيس جو بايدن
وحسب مجلة بلومبرج فـ الرئيس الأميركي جو بايدن قال إنه قدر يوصل مع رئيس مجلس النواب كيفن مكارثي لـ اتفاق نهائي بشأن رفع سقف الدَّين وده عشان يتجنب تعثُّر الولايات المتحدة عن سداد ديونها.
وخلي بالكم الاتفاق ده مكنش سهل خالص وده لأنه كان في مفاوضات طويلة وكانت الحكومة منتظره دعم امن الكونجرس الأمريكي.
واللي كانت لازم تخلص قبل المعاد النهائي في 5 يونيو وده التاريخ اللي توقعت في وزارة الخزانة الأمريكية أنه تنهار فيه البلاد، وده اللي قلق الصين واليابان مهو لما يحصل كده لأكبر اقتصاد في العالم يبقى باقي اكبر الاقتصادات لازم تقلق.
والقلق ده مش بيترجم عادي كده لأ ده بيأثر على امريكا خصوصا وإن الصين واليابان بيعتبروا من أكبر المستثمرين الأجانب في سندات الخزانة الأمريكية.
وده لأنهم بيمتلكوا بشكل مشترك 2 تريليون دولار واللي تعتبر أكتر من ربع قيمة سندات الخزانة الأمريكية اللي بتحتفظ بها الدول الأجنبية، وطبعا معروف إن سندات الخزانة الأمريكية بتعتبر واحدة من أكثر الاستثمارات أمانًا في العالم.
طيب هو إيه هيحصل يعني لو أمريكا مسددتش ديونها؟
هقولك ياسيدي حسب تصريحات لـ محافظ بنك اليابان حذر من إن الولايات المتحدة تتخلف عن سداد ديونها وقال إن ده ممكن يسبب اضطرابات في الأسواق المختلفة وهيكون ليه عواقب وخيمة على الاقتصاد العالمي.
وده اللي قاله ماركوس نولاند، نائب الرئيس التنفيذي ومدير الأبحاث في معهد بيترسون للاقتصاد الدولي فب تصريحات نشرتها بلومبرج.
قال فيها إن التخلف عن سداد ديون الولايات المتحدة معناه تراجع سندات الخزينة، وارتفاع أسعار الفائدة، وانخفاض قيمة الدولار وتقلبه.
وإن ده ممكن يتسبب في انهيار الاقتصاد العالمي والأسواق المالية.وعموما وزيرة الخزانة الأمريكية حذرت من تخلف أمريكا عن سداد الديون بداية من 5 يونيو لو محصلش اتفاق بين البيت الابيض الكونجرس قبل المعاد ده
قولولنا رأيكم في اللي بيحصل وهل شايفين إنه كان ممكن يأثر علينا ؟
